مدخل : يشكل يوم السبت التاسع من يوليو حدثا تاريخيا بكل ما في الكلمة من معنى .. وكان لانطلاق الاحتفالات من عند ضريح القائد والمفكر الراحل المقيم الدكتور جون قرنق دلالات كبرى ومعان عميقة لما يمثله الرجل من قيمة ورمزية .. وانه يحق لأهلنا في دولة الجنوب الوليدة أن يرقصوا ويغنوا على انغام الطبول والدفوف وهم يرون علمهم الجديد يرفرف فوق رؤسهم وفي سماء جوبا الفتية .. كما يحق لهؤلاء الذين عاشوا عقودا انتظارا لهذه اللحظة التاريخية أن يتذكروا هذا الزعيم العظيم .. وهنا يطل سؤال كبير : هل كان الحال سيكون على ما نحن عليه اليوم اذا كان لا يزال هذا القائد على قيد الحياة ؟؟.. سؤال لا شك انه يسيطر على ذهن وفكر الكثيرين غيري ممن يعرفون قدر الرجل ويعايشون واقع اليوم المخزي الحزين الباكي بالنسبة لكثيرين ولكنه – وبنفس القدر - كان يوم فرح غامر طالما حلم به البعض من أهلنا الكرام بجنوب وطن ماكان له أن يتمزق لو ان العصبة الحاكمة في الخرطوم عرفت قدره ومكانته ارثا وتاريخا .. شعبا وأرضا !!!..أليس كذلك ؟؟. ******************************* وببكيك أنا ....... وحزني يغمر الوطن الفسيح بى آهة .... بي دمعن وحيح وبى وجعة من قلبن جريح ببكيك أنا ....... وببكيك أنا . كم فقدناك يا (قرنق) كم شربنا المرة بعدك وكم بكاك الشعب ياما يانسمة في الزمن القبيح يا بسمة للساكن الصفيح وعينو ما لاقت مناما آه ... وتاني آه .. آه من فراقك ياعظيم يا أمان أمة وسلاما أنت يا حلم اليتامى وباقي في التاريخ علامة في القلوب حبك تنامى وفوق جراح الكل تسامى .. ليه بترحل انت ليه والبلد مليان مآسي الجرح ما زال بينزف وكل زول مسكين يقاسي اليتيم ما زال بيحلم تمسح الدمعة وتواسي وشعبنا المكلوم وتائه زي مريكب دون مراسي حلمو كان يلقاك معاهو تصلح العوج السياسي .. ليه بترحل يا أبانا وليه زمانك جار وأبانا ورحت سبتنا في أسانا كنا بس دايرين معانا تبقى دارنا .. وضل ضرانا وفي الفجايع والمهانة تبقى وحدتنا المصانة وضي مصابيحنا المزانة خيمة للعايش مشرد وغيمة تسقيلنا البطانة وتبقى بسمتنا وغنانا فوق شفاه كل الحزانى .. ليه بترحل انت ليه وكنت الأمل عايشين عليه قلنا بكرة تلمنا وبي عزة تجمع شملنا وعشنا راجين المدد الا فجأة علينا غبتا ومن بلدنا مشيت ورحتا وفينا جمرك ما خمد وانت عارف يا أسد الدموع سكنت معانا والفرح فارق شرد الخوازيق دون عدد وملت التماسيح البلد .. ليه بترحل انت ليه ونحنا عارفين وانت عارف انت ياك رجل المواقف مش حرام يا جون تفوتنا وتسيبنا للريح والعواصف بلدنا زمن يفتش ليك وشايل الصبر مستنيك نيلو يبكي .. وموجو راجف وطن عالة سنين أوجاعو تتوالى وماعارف محل واقف .. ****************** خضرعطا المنان العاصمة الدنماركية / كوبنهاغن أغسطس 2005م
