ليه يارمضان تعمل كده تخذل الصحفيين بالشكل ده .. كانوا قايلنك حارسنا وفارسنا طلعت كاسفنا .. ورمضان هنا هو رمضان أحمد السيد رئيس جمعية الصحفيين الرياضيين وليس رمضان الممثل المصري محمد هنيدي بطل فيلم (رمضان مبروك أبو العلمين حمودة) .. فقد إستحق الرجل الجائزة الكبري (مصلحتي أولا وناس الكرشة مصيرهم السلخانة) .. لم يتوقف سيل التهاني من كل قطاعات الشعب والسلطة للسيد رمضان وهو يضرب مثلا رائعا في خذلان قاعدته الصحفية في الإتحاد (إتحاد الصحفيين ) والجمعية (جمعية الصحفيين الرياضيين) برفضه إدانة قرار تصفية ست صحف و27 صحفي ويعلن بوطنية يحسدها عليه مجلس الصحافة الوكيل الشرعي للمجتمع السوداني أنه يتبرأ من صحافة (الكرشة) حسب التسريبات الواردة من إجتماع الجمعية الأخير والذي تناقلته وسائل الأنباء والوكالات المحلية والعالمية . فقد أثبت السيد رمضان أنه ملكي أكتر من الملك رغم إنتماءه للحزب الحاكم .. الجماعة قالو ليهو دين القرار .. قال مابدين.. قالو ليهو إتحاد تيتاوي أدان قال ليهم مابدين .. قالو ليهو ناس المجلس ذاتهم منقسمين دين .. قال ليهم مابدين .. قالو ليهو إختشي دين جمعيتك أدانت .. قال ليهم مابدين .. قالو ليهو ناس الحكومة زاغو من الموضوع دين .. قال ليهم مابدين .. قالو ليهو خلي الجمعية اتعاطف مع زملاء المهنة ودين .. قال ليهم مابدين .. قالو ليهو في بيوت حاتتخرب بدون وجه حق وشباب حايبقوا عطالة دين ... قال ليهم مابدين .. قالو ليهو ماتراهن علي الجواد الخاسر القرار ده ميت ومابصمد دقيقتين دين .. قال ليهم مابدين .. قالو ليهو عايز شنو أكتر من كده جريدتك ناجحة ومبسوط ورئيس جمعية الصحفيين الرياضيين وفي إتحاد الصحفيين وفي مجلس الصحافة دين .. قال ليهم مابدين .. ياراجل بتخسر كتير دين .. قال ليهم مابدين .. ودين مابدين .. دين مابدين .. دين مابدين .. تتخيل يارمضان المحكمة وقفت القرار الوقف الصحف ... تمشي وين .. مش كان إخير تدين قبل أن تدان . طلعت راجل طماع يارمضان عايز (تخم) السوق براك ماشبعت ؟ أدي المساكين فرصة يعيشوا .. لكن إنت ناسي الصحافة ماسوق بس .. في صحافة حرة .. وفي صحافة موقف .. وفي صحافة مهنية .. وفي صحافة راشدة .. وفي صحافة منحازة للشارع .. وفي صحافة صفراء ... وفي صحافة رخيصة .. وفي صحافة فضائح ... وفي صحافة مصالح .. وفي صحافة علاقات عامة .. وفي صحافة الضرب تحت الحزام .. أنت عندي في التصنيف صحافة مصالح والضرب تحت الحزام .. مش كان أحسن تدين .. معقولة عشان مصلحتك تضرب القاعدة الصحفية في مقتل ووين ؟ تحت الحزام؟ تفتكر جابوك ليه ؟ ولا ماجابوك جيت براك.. يكون جيت براك ولا جابوك ناس سونا وحاجات تانية حامياني .. أنا لو منك أستقيل من كله الجمعية والاتحاد والمجلس ومن رئاسة تحرير قوون وإعتزل العمل الصحفي وإتفرغ لكورسات في الإدانة ... كورس كيف تدين لتحافظ علي موقعك .. كورس للإدانة من أجل الإدانة .. كورس دين وأعمل نايم .. كورس إستشير قبل أن تدين ..كورس في الإدانة فوائد .. كورس الإدانة أقرب طريق لقلب المجلس يعني ممكن تقول ليهم ياناس المجلس موقفي صعب خلوني أدين ومافي القلب في القلب إنحناءة للعاصفة وكده لغاية ماتمر فكروا في سيناريو تاني وتلقوني أول واحد معاكم .. وهي ليست المرة الأولي التي يقف فيها رمضان أحمد السيد ويرفض الإنحياز للصحافة الرياضية والصحفيين الرياضيين فقد فعلها في القرار السابق بإيقاف خمس صحف وإعدام تسعة صحفيين مهنيا .. قد لايتخيل أحد أن صحيفته وهو رئيس جمعية الصحفيين الرياضيين وعضو إتحاد الصحفيين لم تشر حتي هذه اللحظة من قريب أ و بعيد لإيقاف الصحف الرياضية الذي أفرز ردود أفعال عنيفة داخليا وخارجيا وكأنها صحيفة تصدر من جزر الكاريبي وليس من داخل هذا الوطن وقد لايصدق أحد أن الصحيفة لم تنشر حتي بيان الجمعية التي يرأسها رئيس تحريرها .. وفي كل الأحوال نبشر رمضان ونقول له (مبروك) كسبت الصحف الرياضية أمس أول معاركها ضد مجلس الصحافة أمام القضاء الذي اوقف القرار إلي حين الفصل في الطعن المقدم من الصحف .. مش كان أحسن تدين . hassan faroog [email protected]
