بسم الله الرحمن الرحيم يفتح الستار علي شاشة الحاسوب الضخمة التي تغطي كالعادة كل الخلفية. الاضاءة حول جنبات الخشبة تخفت تدريجيا ، بينما تفتح الشاشة علي خلفية ناصعة البياض نقرأ : حكومة السودان الاليكترونية قاعدة البيانات الأساسية للدخول الي النظام : 1- أدخل كلمة المرور : كان غلبتك ...... مش مهم 2- عرف نفسك : كان مواطن "أغبش"..حبابك ألف 3- اختر نوع التخاطب : * نصي * صوتي * نصي/صوتي * فل ملتيميديا 4- اختر اللغة : *عربي قح * عربي مكسر * رطانة * انجليزي * انجليزي مطعم *حقوق الملكية محفوظة لكل الشعب السوداني تظهر شاشة النظام كلمة "بسم الله الرحمن الرحيم " ويكتب تلقائيا ما يلي : نحنا...ونحنا....الشرف الباذخخخخخخخخخخخخخخخخخخخ ( يسمع صوت فقاعات عالية....يعقبها شخير أعلي). بعد قليل يدخل من يمين الخشبة أربعة أشخاص: ثلاثة من الرجال، أعمارهم متقاربة وفتاة، يبدو أنهم أشقاء ، يدفعون أمامهم شيخ هرم علي كرسي متحرك ، حتي يصلوا به إلي منتصف الخشبة فيوجهون كرسيه قبالة الشاشة الضخمة. الشيخ : ( لأحفاده ) مالكم وقفتو؟ حفيد1: ( لجده) خلاص ياجدو ....وصلنا المركز الجد : ( وهو يطالع أمامه ) يهو دي المكتبة؟ حفيد1: ( لجده) مكتبة شنو؟!....لا يجدو.... دا مركز المعلومات .... أي معلومة دايرها ... تلقاها هنا الجد : ودا بشغلو كيف؟ حفيد2: نحنا حانوريك ياجدو ... كده قول أنت داير شنو؟ الجد : (مغالطا) معقول ... أنا قلت ليكم داير مركز !!...مركز شنو قلتو؟ الفتاة: ( مكملة)...مركز المعلومات....يهو ذاتو ياجدو ( تبحث في جيبه عن النظارة، وتلبسها له) إنت مش قلتا : داير كتب ومراجع..؟ كده ألبس النضارة وانت تشوف كويس الجد : ( يتنهد ) وين يابتي ..؟ النظر ما طش زمان ... راح في الشغل ....وراح في القراية( يصمت قليلا ثم يتنهد) هسع شوفتنا بقت بالقلب ساهي. حفيد 2: ما أنت الغلطان ياجدو.... كتب ما خليت ...جرايد كملتها .... حتي الإذاعة إشتكت منك!!. الجد : ( لحفيد2 الذي يبدو أنه أصغر إخوانه سنا ) هسع عليك الله أنت في عمرك ده... قريت كم كتاب ؟ حفيد 3 : علي الطل ( ينتبه أنه يحادث جده فلا يكمل ) الجد: سكت مالك.... عليك بالشنو ؟ .....( بحده ) أنت أتعلمت الكلام ده وين ياولد ؟ حفيد2 : ( يتدخل وهو يعدل وضع كرسي جده المتحرك ) شباب الأيام دي اصلهم كده ياجدو ... بحاكو الكبار ساهي وشنبهم لسه ما خدر حفيد3 : كتب شنو ياجدو ؟.... نحنا ما بنقرا كتب الورق ديه ....نحن بنقرا الكتب الاليكترونية... أي واحد حسب هوايته أو تخصصه. لكين ....أكتر حاجة .. قاعدين نتونس بالموبايل ...ومرات بنخش مواقع التواصل الاجتماعي. الجد : ( مستغربا من الكلمة) شن قلتا ؟ حفيد3 : ( مرتبكا) في شنو ياجدو؟ الجد : التواصل ديك ... يعني شنو ياولد... تتواصلو كيف؟ حفيد3 : ( يستنجد بإخوانه كي يسعفوه في الرد ) التواصل.... التواصل ياجدو يعني الناس برضو تتونس ...بالنت ... دردشة ، محادثة .. يشوفو بعض بالكاميرا..يعني حاجة كده ...( لنفسه بصوت خفيض)... يوروه كيف دا؟ الجد : ( مستغربا ) يعني داير تقول أنو إتخرجت م الجامعة وما قريت ولا كتاب ؟ حفيد3 : لا ... كيف ياجدو ؟ يعني ممكن تقول قريت مرجعين تلاته .. ما أكتر ... والباقي كلو شيتات. حفيد1 : ( يحاول التدخل ) ما أنت عارف ياجدو .... القراية إنتهت من زمان .... ديل مكتباتهم تعبانة ومراجعهم بسيطة وتلقا الطلبة بشاكلو عليها. ( يهمس لجده بالرطانة )In Bitan Gagada ( يعني الولد دا ضعيف شديد فيومئ الجد برأسه مؤيدا) الجد : (لحفيد1 ) واضح.... ما دايرة كلام الفتاة : ( معززة الرأي ) والله ياجدو كلام أخوي صاح.... نحنا ذاتنا قرينا وإتخرجنا بالشيتات ساهي. حفيد2 : ( لجده ) أما نحنا .... يدوب حصلنا قرينا في كم كتاب وكم مرجع .... وبعد داك....الباقي كلو نت وجرايد. الجد : ( لأحفاده متسائلا) أهه .... ونفعتو بلدكم...... نفعتو نفسكو؟ حفيد3 : ( لجده ) ننفع منو ياجدو.......؟!! ..... لا نحنا نافعين ولا البلد نافعة حفيد1 : إنت قايل الشغل بقي بالساهل .... زي زمان الفتاة : كان ما عرفو ... قبيلتك شنو....ولونك شنو ما بشغلوك. الجد : ( مندهشا) واللون دخلو شنو في الشغل ؟ حفيد 2: هي بتقصد اللون السياسي .... كان شجرة .... يدوب فتحو ليك أبواب السعادة و " المنجهة" وباقي المتقدمين للوظيفة .. يركبو الشارع تاني. حفيد2 : بيشيلو الزول ويختو مكانه " كوز". الفتاة : النافع في البلد دي هو الحرامي بس ياجدو ( لنفسها بحسرة ) ياريت كت إشتغلت فنانة .... والا كت إشتغلت حتي " رقاصة" .... عند عمو الشريف بتاع الدولارات. ( إخوانها ينهرونها ويطاردونها بين أنحاء الخشبة ) حفيد2: نحنا ناقصينك.....الحق موش عليك ..... الحق علي الطراطير اللي بهناك (الجد يدفع بكرسيه المتحرك بنفسه ويذهب مبتعدا إلي العمق ، قريبا من الشاشة الضخمة ، يستطلع يمناه ، ثم يدفع كرسيه إلي أقصي اليسار ويفعل نفس الشئ). الجد : التتار ديل خشو من وين .... وإتلمو كيف ؟.... ( يصمت قليلا) .... نحنا دخًلنا العرب بس .... قالو لينا : دايرين ننشر الدين ......الإسلام ...دين السلام والمحبة بين الناس .... قلنا ليهم : مرحبابكم.... خشو.... البلد بلدكو ... دي أرض المحبة والسلام ...... وياهدي القعدة ( يستدير بكرسيه ويعود حيث أحفاده ويحادثهم بالرطانة ) Ouy arabreaga Joon dinga collajjanagya eadajuss ter bess beledta khorabsa ناس الحاكورة ديل ما سوو شئ ... قلبو الواطة.... فرقو الناس .... نشرو الفساد ....( يدفع بكرسييه متفقدا كل جوانب الخشبة) فساد....فساد.... فساد...فساد . وين المسئول هنا ..... ( يلتف إلي شخص لا نراه ويتوعده باصبعه ) ..... قبال ما تفتح خشمك وتعترض.... نضفو كويس وطلع كلاما سمح ...ونضف واطاتك دي ....عشان تقيف في حتة طاهرة ...نضيفة لمن تقول الحق وتدافع عن نفسك. حفيد1 : مسيرة التاريخ .... فتحت مسارا في هذا البلد .... وإنتهت إلي : ( بصوت عال)... دولة الفساد الكبري. حفيد2 : كبراتنا ياجدو علمونا الفساد.... ماخدين فيها ماجستير ودكتوراة حفيد2 : لكين أبليس أبي يديهم درجة الأستاذية ..... حفيد1 : ( مقاطعا) معذور .... كان أداهم ..... تاني حايشتغل شنو ؟. الجد : الله يحرقهم بحريقة ...... نحنا ربونا عشان نصلح.....ربنا قال : صلحو ...... الحمير ديل أضانهم مع إبليس طوالي واللا شنو؟. الفتاة : ( لجدها ) إبليس شنو ياجدو .....إبليس قاعد بهناك فوق تلة جماجم لناس مسحوقة.... بينكت في جدول أعماله لمن " بغر" قال :..... حفيد1 : ( مكملا) التلامذة فاتو الأستاذ الفتاة : دا قاعد يكتب عنهم في حاجات هو ذاته ما عملها . الجد : ( مستغربا) ... والناس دي كلها رضيانة ؟ حفيد2 : أسكت ياجدو .... مش الناس بلعت لسانها وإتبكمت. الجد : (مستغربا ) إتبكمو تب؟!! أمال شنو القرضمة واللماضة اللي قالبين بيها راسنا دي : ...نحنا .... ونحنا.؟!. حفيد1 : ياجدو إنت ماك عارف .... الناس ما إتزرع في قلوبهم الخوفة من الوكت داك..... لما الجماعة ضبحو ليهم الكديس في بيوت الأشباح ومن يومها زولا فتح خشمو مافي. حفيد2: الناس بقت ما تخاف من ربها .... ديل قربو يبركو للحكومة!!. حفيد3 : حلو....يعني بقو بيبركو لتلاتة؟!! الجد : هم الناس جنو والللا شنو ؟ رجعو تاني لللات العزي ؟!. حفيد1: ( مكملا) ومناة الثالثة الأخري. الجد : ( بحسرة ) آهه .... يابلد!! الفتاة : في زمنا دا ياجدو... في بلدنا دي ....المرة ... بقت أرجل من الراجل... تنزل تبيع ف الشاي وتقطع في اللقيمات وترمي الطعمية عشان تربي وليداتها ... ( تصمت قليلا) ما الرجال شردو ياجدو ... شردو من المسئولية ....( تصرخ ) ..... آهه يايمه...وين الرجال في البلد دي ؟!. الجد : ( بحزن ) ونحنا قاعدين منتظرين يوم الحساب ..... خايفين تلفح وجوهنا النار ( يصمت قليلا ) ..... رجعوني البيت .... رجعوني البلد ... أسقي في زرعي ... أرعي نخلاتي وغنماتي حفيد1 : ( لجده) وأنت قايل حايخلوك.... ناس الضرايب والعوايد والزكاة والمحلية ما حايخلوك. سيك.. سيك ... لمن تخش السجن . الجد : وقت ما هي ما نافعة .... أمشي الجبل .... أفتش لي علي كهف .. والا كركور!!. الفتاة : ( معترضة وهي تدفع بكرسيه إلي شقيقها رقم1) لا ياجدو .... حا تفوت تخلينا برانا ....في غابة الوحوش ديه... لازم تورينا الحاصل شنو ... لازم تبصرنا .... لازم تعلمنا. حفيد1 : ( وقد إستلم كرسي جده فيدفعه إلي شقيقه رقم2) كان إنتو فتو .... اللي حايورينا الحقيقة منو ؟ ...... دايرين نعرف الحصل في البلد دا شنو ؟ حفيد2 : ( يستلم كرسي جده ويدور به ثم يدفعه إلي شقيقه رقم3 ) .....بلدا مسحورة .... واللا ملعونة ؟. حفيد3 : ( وقد إستلم كرسي جده ) مغضوب عليها ....مبتلية .... منو السبب؟ .... نحنا واللا الحكام واللا إبليس ؟ الفتاة : ( معترضة) عليكم الله .... ما تعملو حكاية إبليس شماعة ..... ما وروكم من الأول الجد : ( وقد اصيب بالدوار )... كفي .....كفي ..... البت دي كلامها صاح..... ما وروكم من الأول ( يقرأ) .... "ولا تتبعوا خطوات الشيطان" حفيد1 : ( مندهشا ) يعني كل زول مسئولا من نفسه؟ حفيد2 : يعني كل زول مسئول عن افعاله واقواله؟ حفيد3 : عليك الله .... خليك معانا ياجدو .... ورينا الحاصل شنو الفتاة : آي ياجدو .... ما تخلينا .... ونستك سمحة وريحتك برضو سمحة ( تشم جلبابه).... أمي قالت : ياحليل الزمن الجميل. حفيد1 : شنو هو الزمن الجميل ياجدو ؟ الجد : ( يتنهد ) الزمن الجميل هو البساطة .... هو التواضع .... هو المحنة .... هو حب الخير لكل الناس .... زمن المروة .... والشجاعة ..... زمن العلم والمعرفة ..... كان الناس فيهو إخوان إخوان .... ما بتعرف دا من وين ... وقبيلتو شنو....بيناتنا المسلم ... وفينا المسيحي.. فينا العربي والرطاني ... كلهم واحد .... المهم أنو إبن بلد .... مواطن ...اخو واللا أخت .....غير بلدهم ما عندهم شئ ..... يصنعو .....يزرعو .... يطلُعو لشمس بكرة بكل أمل . ما كان عندهم عقدكم ومصايبكم دي .... ( يتوقف ) حفيد3 : وقفت مالك ياجدو ؟. الفتاة : ( بلهفة) كمل ياجدو .... كمل. الجد : ( يتثائب ) آيه.... دنيا ..... الزهايمر حت راسي ( يلتفت لأحفاده متسائلا) .... مش برضو الدكتور قال عندي " زهايمر"؟. الفتاة : زهايمر شنو ياجدو .... تبرا.....؟ إن شاالله الدكتور ذاتو يجيهو زهايمر. الجد : هو مش قال أنو الزهايمر ....بخلي الزول يقول كلاما خارم بارم؟ الأحفاد : ( بصوت واحد ) آي !!. الجد : وقال أنو الزول ممكن ينسي نفسو .... وينسي تاريخه .... واصله وفصلو ...ويشطح كتير؟. الأحفاد : ( بصوت واحد ) آي!!. الجد : وأنو برضو ممكن يفبرك ليهو فلم هندي عن حسبه ونسبه وتاريخه....يغش ... يسرق ..يكضب... يستكبر ويستقوي علي الناس ويعزل نفسو عنهم؟. الأحفاد : ( بصوت واحد ) آي!!. الجد : ( يستدير بكرسيه ويوجه قبالة الشاشة الضخمة ) أنتو البتاع دا بشتغل كيف ؟ ........ كده ..... أقفلو الستارة وتعالو جاي... ( الجد يخرج مصحفا صغيرا ويفتحه بينما أحفاده الأربعة يتجهون نحو الستارة فيغلقونها وهم مستغربون تماما). ستار الدمازين في :2011/12/02 محمد عبد المجيد أمين(عمر براق )
