دار حوار عضلي بين الرباطي سين والرباطي صاد على النحو الآتي: سين: والله الجماعة ديل كرهونا عيشتنا ياخي ، كل يوم جمعة مارقين ومالين البلد كوراك عيك عاك عوك ، عاملين فيها ثوار ثورة ربيع عربي وهم بس شوية محرشين وشذاذ آفاق زي ما قال الريس! صاد : ياخي مافي ربيع عربي والله هندي في السودان ، الناس ديل لي هسه عددم في اي مظاهرة ما حصل الف، ياخي ديل شوية شماسة ومافاهمين أي حاجة ، ياخي هم لو بفهمو يسمو الجمعة الأولى الكتاحة والتانية شذاذ الآفاق والتالتة الكنداكة ويمرقو كل جمعة من نفس الجوامع ويسهلو لينا شغلنا؟! سين : الكتاحة التكتح خشومم ، الكنداكة التكندك عيونم، صحي لو كان عندهم مخ كان يسمو "جمعة المحكمة الجنائية الدولية" مثلاً عشان يقلقلوا الريس ووزير دفاعو ويخلو ناس مجلس الأمن وناس اوكامبو يتعاطفو مع قضيتم لاكين الظاهر الرجرجة ديل ما ناقشين أي حاجة حتى في اختيار اسامي جمعات المظاهرات! ص: ما مشكلة خليهم يعملو جمعة المحرشين وجمعة الشواء والصيف وانحنا حانعمل جمعة الضرب ينفعهم وجمعة ضرب غرائب الابل وجمعة دق العيش والحشاش يملا شبكتو سين: الحمد لله ، جامعة الخرطوم خلاص قفلوها ، طلبة الجامعة ديل كانوا عاملين لينا فلقة دماغ ، هسه خلاص ارتحنا منهم وحنتفرغ بعد دا لي ناس قرفنا وشلليات الدكاترة والمحامين وناس الاحزاب البنطبق عليهم المثل البقول البحرش ما بكاتل! صاد : نحنا ما خايفين من الجماعة ديل كلو كلو وكل جمعة حنضوقم يدنا بس الخوف كلو من امريكا وكوفي عنان واوكامبو وبانكي مون والرئيس الجديد بتاع فرنسا وانا سمعتا ناس بيقولو انو قناة الجزيرة وقناة فرنسا 24 وقناة سكاي نيوز العربية جابت اخبار مظاهرات ودنوباوي والابيض في الجمعة دي سين : ما تخاف يا فردة ، العالم الخارجي كلو مشغول بمذابح الأسد في غابة سوريا وحايقعد يلوك في موضوع مذبحة التريمسة الضبحو فيها 220 زلمة وموضوع الفيتو الروسي وما بهتما بالعلقة البنديها للمعارضين في السودان كل جمعة وانحنا عاملين حسابنا شديد ولي هسه ما كتلنا اي زول ، بعدين ياخي شوف الفضائيات السودانية كلها واقفة معانا والناس قالو انو في اللحظة الكنا فيها نحنا بنوضب ناس مظاهرة ودنوباي ، قناة الشروق كانت بتقدم برنامج مع دكتور وقناة النيل الأزرق كانت بتستضيف اعضاء سابقين منشقين من الحزب الشيوعي وكانو بدقو في الصفايح ويطلعوا الفضايح وتلفزيون السودان كان بيقدم اغاني لعثمان حسين! صاد: يعني كلو تمام التمام يافردة؟ سين: ايوه يا فردة كل حاجة تمام التمام ، ياخي امشي حضر عكازك وجنزيرك للجمعة الجاية وبطل الكلام الكتير ده انحنا ورانا شغل ؟ sara abdulla [[email protected]]
