مقدمة لابد منها لفهم الفكرة:- في مطلع العام الفين صديق لي فاجئني بأن هناك ظاهرة جديدة تقدم مذهل في مجال الصحافة (الصحف الالكترونية ) يمكنها نشر راي المواطن الاغبش البسيط بدون مقص الرقيب (عجائب الدنيا الثامن) شرطها الاول إحترام الرأي الاخر وعدم الاساءة إليه، مهمتها تحرير العقول من الجهوية والغوغائية وتصحيح المفاهيم المغلوطة عن الديمقراطية والحكم الراشد ونشر ثقافة التسامح وقبول الاخر. فرحت كثيراً وكنت من أوائل المساهمين بالراي في صحيفة سودانيل بشهادة عملاق الظلام محرر العقول الاخ الاستاذ طارق الجزولي. وياما كتبنا.. منطلقين من شعار الاستاذ المرحوم أحمد الصالحين الهوني رئيس تحرير جريدة الوطن أعلي عمود أراء حرة (الرأي قبل شجاعة الشجعان) كتبنا رسالة مفتوحة لسعادة الرئيس عمر حسن البشير نشكو سوء حالنا الغبش وحال البلد وكتبنا رسالة مفتوحة لبنج سلفا كير ميارديت نشكو فيه حال قبيلة البنقو الذي أصبح مهمش المهمشين. وكان القصد ليس التشهير أنما التصحيح (إنعدلوا يرحمكم الله) ونشكرهم يا ناس مافي زول فيهم سألني وربما إستفادو من الرأي وكل واحد حاول يعدل حاله، ولكن ما لقيته بسبب نشرت مقال في سودانيل بتاريخ 13/ 11/ 2012 عنوانه الرفيق الحاكم رزق زكريا.. الرأفة بأهل غرب بحر الغزال. حاجه عجيبة يا ناس!!! حكاية عجيبة جداً. طبعاً سعادته وجد المقال وما عجبه الكلام فهاتفني يوم الجمعة 16/11 الساعة 10 و43 دقيقة ليلاً!!! رفعت الموبايل هللو..... هللو مساء الخير ح/ معاى دندرا د/ ايوه .. نعم ح/ يا دندرا إزي الحال د/ أهلاً وسهلاً سعادتك (طبعاً صوت المتصل أصبح معروف) ح/ أنا سعادتك .. أنا سعادتك وله انت ياهو سعادتك يا دندرا؟؟. أنا اتصلت عايز اقول ليك مبروك انا قرأت مقالك في النت... وكمان عايز أقول ليك انت رأجل جبان د/ يا كمرت انا ما جبان انا كتبت المقال ووضعت أسمي ومسؤول عن كل كلمة انا كتبته ح/ لا.. لا ..أنت جبان.. لوكنت ما جبان كان تعال وواجهني بالكلام الانت كتبته ده، انت ما زولي وكنت إذا في حاجه ما عجبك بتجيني في البيت وتقوله لي. د/ يا كمرت انا ما كتبت بقصد الاحراج والتشهير، أنا كتبت عندما تاكدت إنت رافض تقابل كل الناس البيقولو ليك الحقيقة. اخر مرة انا ذهبت الى منزلك شهر 3/2012 وجدنا ان الوضع تغير والحرس قال التعليمات الجديدة العنده ممنوع الدخول وقال يجب أن نتصل بيك في الاول لنأخذ الاذن!! وفعلاً إتصلنا بيك وانت إعتذرت وقلت معك مسؤول الامن ولم تحدد لينا مواعيد. كمان حاولنا كذا مرة في المكتب ولم نفلح فإستسلمنا.. ح/ يا دندرا تشتمني ؟؟؟ تشتمني أنا. د/ يا كمرت أنا ما شتمتك، ونحن رفاق لابد كل واحد يقول الحقيقة لرفيقه ح/ لا.. لا انت شتمتني واعلنت الجهاد علي وانت من الان إعتبر نفسك عدو بالنسبة لي وسوف أجاهد فيك. انت تدعو لي بانه ربنا يزلزل كراسينا. انا اعلنت الجهاد عليك د/ يا كمرت جهاد شنو؟ ودعوات شنو ؟؟ يا سعادتك انت اخونا وانت العاديت ناس مقاطعة واو بدون وجه حق حتي الناس بتسال نحن عملنا شنو بطال لسعادة الحاكم. ح/ اسمعني انا المتصل، انا أكرمتك وعينتك وعينت زوجتك في الشغل وكنت قد رشحتها لمنصب سفير درجه اولي و (مقاطعة) د/ يا كمرت أنا ما حصل جئت وقلت ليك عيني وزير وله مستشار، أنا قدمت أوراقي وتعينت ذي أي موظف في الولاية بواسطة مكتب العمل وأيضاً زوجت (مقاطعة) ح/ قلت ليك اسكت.. أسكت، أنا المتصل أنا ممكن بجرة قلم ارفدك انت وزوجتك وبعدين أنت زاجل مسير من زوجتك ما تتكلم معي، توت ... توت الخط قطع. في الحركة الشعبية تحررتنا من الخوف وعرفنا معني الحكم الراشد. وفي الجيش الشعبي عرفنا معني الجوع والصبر عليه. ( اللهم لا نسألك رد القضاء.. بل نسألك اللطف فيه، ، أرحمنا وأعفو عنا يا أرحم الراحمين) امين يارب العالمين. عاش كفاح شعبنا البطل solomon dandara [[email protected]]
