بسم الله الرحمن الرحيم في السلك • امس السبت • مقيلين في البيت • ناس الرياضيه قالوا عندهم لقاء مع الوالي • اسلام كانت مصره تحضر اللقاء • نعست • قبل ماتنوم قالت لي لما اللقاء يجي صحيني • ونامت • وبدأ اللقاء مع جمال الوالي • عاينت لي اسلام لقيتها حلالالالالالاته نايمه هادئه • قلت اصحيها • تاني قلت اخير ليها النومه دي • وناااامت • حضرت انا اللقاء • وانتهي اللقاء • اسلام صحت • قالت لي اللقاء لسه ! • قلت ليها انتهي • قالت لي ماصحيتني مالك ؟ • قلت ليها قلت تنومي تاخدي راحتك يا ماما • قالت لي عمو جمال قال شنو ؟ • قلت ليها عمك جمال قال نصبر • قالت لي نصبر تاااااااني ! • قلت ليها ايوه • قالت لي يابابا احكي لي قصة سيدنا ايوب • المهم • طبعا الجماعه شمتانين من التعادل • قلت ليهم انتوا عملتوا شنو مع الخرطوم ؟ • قالوا لي غلبناها واحد صفر • قلت ليهم والمعز كتل المهاجم ضربة جزاء وطرد • سكتوا • قلت ليهم لو الحكم عداها برضو درون • ماتضحكوا ساااي • لكن بصراحه غاظني قون الخرطوم التاني • من بعييد • ذكرني قون مازيمبي الخامس • يا اخوانا في لاعبين قدرهم السعيد قادهم لكشف المريخ • بعيدا عن العواطف انهوا اقامتهم في المريخ الجميل • نحن نحتاج لعدد اتنين حارس مرمي وصلحوا • معقوله كوره بشمالك داير تطلعها بيمينك ! • اضانك وينها ؟ • تخت ايدك اليمين فوق راسك عشان تلحق اضانك الشمال ! • تتذكروا هدف هلال كادوقلي التاني ؟ • تتذكروا هدف اتراكو في التمهيدي • تتذكروا هدف اتحاد مدني القريب ده • تتذكروا اهداف كانو بلايزر • تتذكروا هدف زيسكو الاول • تتذكروا هدف ايفوسا • اتذكرنا لما اتذكرنا بهاء الدين • وطالما الناس تذكرت بهاء الدين يبقي يا والي فتش لعشرين حارس مرمي وخلونا من المجاملات • اي فريق بطولات لابد وان يكون خلفه حارس مرمي عظيم • فاهمني ياعبدالعظيم ! • المشكله التانيه مع مازدا مع ابراهومه مع رادان مع الجديد ده هي نفس المشكله • اوزان ثقيله وحركه تقيله • كان يتغلب كروجر علي هذا العيب الخلقي بطريقة اللعب التي يلعب بها وبشحن الجتت الوارمه دي لياقه بدنيه • حركه تقيله بس المارسيدس موديل 1974 • والموديل ده اتوزات الزمن ده بختفن منو الشارع زي الماحاصل شئ • نتفق جميعا علي ان التحكيم ساعد الاهله كثيرا بدون خجله • عندهم 52 نقطه و57 ضربة جزاء • وعليهم محرمه تلك الضربات • لكن السؤال نحن تعادلاتنا دي دور التحكيم كان فيها شنو ؟ • بالطبع لم يك للتحكيم دور في تعادلاتنا • ولكن الدور الاساسي كان للساده البهوات الذين يرتدون شعار الزعيم • نحن ياوالي صابرين • لان عدم الصبر لن يجدي بعد ماحصل الحصل • لكن صابرين بشروطنا نحن • صابرين عشان اي زول مدتو انتهت يدينا عجاج كرعينو • صابرين عشان اي زول جابو القدر في فريقنا يدينا عجاج كرعينو • صابرين عشان اي متقاعس لايعرف قدر الزعيم يفتح عينو • صابرين عشان تسجلوا لينا حارسي مرمي ومدافعين ولاعب وسط مدافع ولاعب وسط مهاجم وطرف شمال • المشكله ليست في المدرب • المشكله في المتدرب • سمعنا بان مدرب الهلال ماشي اهلوا عشان عرس بتو ومابقدر بعد العرس يرجع السودان • وسمعنا انو مدرب الهلال احتمال يدرب الفريق القومي • ياربي الفريق القومي ده بتمرن في البرازي ولا شنو ؟ • قلنا ليكم الزول ماسوره ودايرين ليكم سبب تشيلوهو بيهو • لاعب يرجع لي ورا عشان يشوف الكوره ويقولوا ليك بجي منو • منو بالما ؟ • ياناس القطاع الثقافي 000 دكتور عمر واستاذ جعفر سعيد 000 دوروا لينا الثقافه خلونا ننسي • صابرين • قالوا قرقوش بتاع حكم قرقوش داك مره الحجاج ولاه بالانابه لحدي مايرجع , قام جاهو احد الرعايا شاكيا قال ليهو ياقرقوش اشتريت لي بيت من زول قاعد فيهو لي تلاته شهور والبيت مليان فيران • قرقوش قال ليهو اقعد اصبر تلاته شهور تاني اذا صاحب البيت الباعو ليك ماجا شالها اتصرف في الفيران سلك كهربا صابرين دي محطه في الثوره والي لقاء
