ما بتختشي؟ الليلة راجيكْ من دغيش حرّم ألاقيكْ بالمواويل والقوافي! طاريكٓ ترقص لي عديل رقصة الموت يا عليل رقصة الموت؛ وإنتا حافي! ماني خايف من كلابك ماني مرعوب من سيوفك ماني خافي! ترقص على جُرح الوطن؛ قسّمتو كيري على كلابك؛ ماكا ناكر وماكا نافي! ترقُص على وتر الخليل سيرٓة عريس مجدول وصافي! حرّمْ تَراقِص ضُلّك المهزوز عديل ضاع الوطن يا يُمة خافي! يا ضيعة الوطن اللي ضاع يا ضيعة الليل و القوافي! أسفاً عليه؛ "ابيَضّت العينين" علي وطني الجفيتو وماهو جافي! غنينا من تبينا فيه "وطن الجدود" المِن زمان وصّونا بيه وطناَ جميل وطناَ مُعافَي! جانا من وين العدم؟ أصلو من وين السجم؟ ياتو كُبّة؛ من قُرى الوطن الخُرافي؟ قسّمتو يلعنك الله كيري؛ وماكٓ نادم وماني عَافي! سلّيت سكاكينك نَهار كتَّلتٓ أولادنا الصُغار والشيخ صِبِح ضامِر هزيل: ووبين على أمي الدموع كبّتها صافي! هرب الخلوق ضاقت مواعين الطبوق قدحك تقيل يا زول عوافي! صِبِح الزمن ممسوخ علي أمي وابوي أختي وأخوي صبح الزمن زمناً خرافي! يا حليل أٌمي التلولينا و تزغرد فوق جروف الساقيِّ لا بقراً حلوب يا الله كافي! يا حليل جِدي البكفكف دمعة المفجوع يحاحي الطير يقيّل في الجوافي! بكت الجروف حزناً على وادينا والقُنديلة يا فرح القوافي! النيل بكى سالت دميعات الجروف النايمة فوق ارض النخيل حرقتْ لحِافي! ووبين على وطناً حكمتو رقصتٓ فوق حوشو الكبير أصبحنا مافي! حرّم لقيت كضبك عجيب رقصك غريب بكِّيتْ سما الوطن المقسّم والقوافي! دينك كُتر دين النفاق غشيتنا من اول خطاب فكروك صٓحابي وإنت كضبك لونو صاااافي! سافرت بينا على محطات الخراب... صليت على قِبلة شواطينك مرضنا ومافي زولاً صار مُعافي [email protected]
