بسم الله الرحمن الرحيم في السلك *بالامس اسدل الستار علي بطولة افريقيا *البطوله المحببه لاخوتنا الاهله *حب من طرف واحد *حابنها العمر كلو *وللاسف ما بادلتهم الشعور ولا ثانيه *قصة الحب من طرف واحد دي *ذكرتني قصة صاحبا لي زمان *لما كان الحب موضه *والناس البتحب تفتش لي اسباب لقاء المحبوبه *مثلا العصر كده هي تقول ماشه تجيب كتاب *وتسوق اختها الصغيره *تقابلوا علي وعد في الطريق *ويقوم لزوم الرشوه يشتري البسكويت والحلاوه للصغيره *عشان في البيت ما تكلم زول *وبتفوت عليهو حكاية انو الصغيره اول ما تدخل البيت *بتقول لي ناس البيت *سوفوا هلاوتيييييييييي *وعندي بستويت كمان *يقولوا ليها الجابهم ليك منو *وتفتو *دابن لي ولد ساحب امل لاقيماهوا في السارع قبيل *هنا امل تقوم تقول ده اخو رنده صاحبتي *تعمل فيها انها قالبتو صدفه *المهم *في قصه زي دي *كان في واحد اسمو خالد *ما بزيد في كلمة خالد *لانو لي اسي قاعد *والحكاية دي ممكن تجيب ليهو نقه مع اولادو *خالد ده زي الهلال *حبه واحده في الحله حب شديد *وقرر يكلمها *وقابلها *ماشين في الشارع مدنقرين *بعد تلعثم وتردد شديد قال ليها *المويه في البحر والطير في الشجر ومشاعري جداول وصوتك بلابل وكلام زي ده *قالت ليهو والله يا خالد انا محترمه مشاعرك *لكن ما عندي احساس زي ده تجاهك *مادايره اغشك ساي *لكن اعدك ل حسيت باي شئ زي ده تجاهك بكلمك وما بدس عليك *خالد زي الهلال *مابهمو يحبوهو *كل البهمو يحب هو وبس *قال ليها ما مشكله *طالما ما عندك احساس تجاهي ما مشكله *العندي انا بكفينا الاتنين *وده حال الاهله *البطوله المحببه ما بتحبهم ولا حا تحبهم *لكن زي خالد قالوا العندهم بكفيهم الاتنين *المهم *فيتا طار *ومجموعة الهلال كلها صفر علي الشمال *وفاق سطيف البطل من الباقير الوراني *من المجموعه التانيه *لاقال محببه *ولا عزم الحكم كبده *ولا حلق للحكم في نمرة اتنين *لادقت محل الحقنه *ولا قدم شكوي *خدمة يمين وعرق جبين *لاقال حابنها ولا اتلصق فيها *وبمناسبه وفاق سطيف ده *الفريق الشرد منو الهلال ومامشي كورة الرد لي الليله *مدرب وفاق سطيف واااااحد *وولد صغير لابس جينز وداقي سيستم *الجماعه مدربنهم تلقاهم قاعدين تقول عندهم عقد *كتاااااار وكبااااااااار ونصهم العتب علي النظر *عشان كده دايرين يمرقوا كاريكا مرقوا صلاح الجزولي *الواحد فيهم يمسك جمعه ويقول ليهو *تعرف يا المعز *سيمبو يعمل بلنت ابو شنب ما يعدها *واحد من مدربنهم يقول مساوي ده حيرنا *طواااالي بلنت بلنت بلنت *ايها الناس *شكوي الهلال ضد فيتا الحصل فيها شنو ؟؟؟ *الفيفا عيانه يا ربي ؟؟؟ *يا فطومه *يا الناطقه بي لسان الجماعه *انطقي وورينا *الشكوي الحصل فيتا شنو ؟ *اقصد الحصل فيها شنو ؟؟؟؟ *ايها الناس *البطولات الجويه دي *ما بالامنيات *ولا بالمكابره ولا بالمتجاره ولا بالاعلام *ولا بالنفخه الكضابه *بالعمل والموهبه والاصرار والاعتماد علي الله *عشان كده جبناها بدري *وفشل غيرنا قريب مية سنه يطولها *تاني ما تقولوا البطوله المحببه *سموها البطوله العمرو الهلال ما بطولها *ايها الناس *خواجة الهلال الجديد ده انا شايفو في حته *ما متذكر لكن بتذكر *الزول ده زي الشفتو في الواتساب *بتذكر وبكلمكم *ايها الناس *كم سؤال كده *الحصل في شكوي الخرطوم شنو ؟؟؟ *دوري الرديف الذي نتصدره ختامو متين ؟؟؟ *بكري لي اسي ماوقع ليه ؟؟؟ *صمت جمهور الهلال اثناء التتويج ليه يا قدورة المجنون ؟؟؟ *سيدي بيه تاريخ تسجيلو كلاعب وطني قبل ولا بعد ما سجلوا ليه ؟؟؟ *الارباب حايجي بخشم الباب ويترأس النادي متين ؟؟؟؟ *صحي البرير قال لكردنه لو رجعت سيدا برجعك الجنوب ؟؟؟؟؟ *جوبا حلوه يا كردنه *لكن مع حسابات ناس سيلفا وباقام اموم *اخير تستقيل وتقعد هنا وتنوم *الحساب قالوا ولد *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *وجع البطن لما يجينا نقول ايبولا *ولو سالت نخرينا نقول ايبولا *ولو عطس واحد فينا نقول ايبولا *والبرعف يا والينا اكيد ايبولا *جرح المشاعر الفينا اكيد ايبولا *والبلد بتنزف يا والينا تكون ايبولا سلك كهربا ننساك كيف ولو داير تقول كورة تقول ايبولا والي لقاء سلك
