بسم الله الرحمن الرحيم في السلك *الاستاذ عثمان حسن مكي *مقدم برنامج المجال الرياضي بالاذاعه الطبيه *البرنامج يا عثمان يا اخوي ماطبي *وهذا لا يعني تقليلنا من شأنك *واحترامنا لك لايعني السكوت علي مايمس كيانا نعشقه وندين بالولاء له *مجالك الرياضي يا عثمان ماطبي *نحن لا نعارض استضافتك للمعارضه المريخيه *فهي مريخيه *يعني حقتنا *ولا نعارض استضافتك للمجلس *فهو مريخي *يعني حقنا *ولكن اعتراضنا انك تركز تركيزا شديدا في برنامجك علي مشكلات المريخ *وكأن هذا البلد لاتوجد مشاكل في انديته *وطالما هدفك خدمة الانديه باتاحت المجال لمناقشة قضاياها *بطرح الرأي والرأي الآخر *الاولي بهذه الخدمه ناديك *فالهلال يرفل في مشكلات اداريه وجماهيريه منذ خمس سنوات *فئه تحتل النادي *لدرجة اصبح معها وجود اعضاء المجلس بالنادي الا تحت حماية ابو طيره *وفئه تقود مسيرات الي منزل الرئيس *وقبل ان يرد عليها *تحضر فئه اخري مناوئه لتلك الفئه *رموز توارت خجلا من الاساءه التي توجه لها *ورئيس الهلال اعلنها *لاتوجد معارضه بل يوجد ناس يسيئون للمجلس *مجلس يمنع الاعلام من متابعة الاعداد *ويعطي الحصريه لصحيفه وصحفيه محدده *كل ذلك لم يجد مجالا في مجالك الرياضي *ولكن مقاطعة صحيفه الهدف من قبل مجلس المريخ *اتحت لها المجال في المجال الرياضي يا اخي عثمان *وقربت ترقدها في الزيتونه *عشان كده بقول ليك مجالك ماطبي *وجماهير المريخ يا عثمان تعرف ذلك جيدا *وبصراحه بطنها طامه من هذا البرنامج *ويمكننا ان نجري لك استفتاء يبين لك موقف جماهير المريخ من البرنامج الماطبي *وقال الاخ عثمان ان ردة فعل الاعلام المريخي *اثبتت له ان برنامجه اقوي برنامج رياضي في البلد *في دي نحنا معاك *لان برنامجك تخصص في اقوي فريق في البلد *ومن يتخصص في الاقوياء بالتأكيد يستمد منهم القوه *اما اذا خصصت برنامجك للضعفاء يا ابو عفان *والضعف عندنا مقياسه الفشل الدولي *بالتأكيد لا انت ولا مامون حميده ما حاتتابعوا ذلك البرنامج الماطبي *ختاما *اخي عثمان ليست المشكله اتاحت الفرصه للمجلس او للمعارضه *ولكن المشكله في اغفال مشاكل اندية اخري اكبر واعنف *والتخصص في مشاكل المريخ ولو كانت اخف *يبقي القصة اكيد فيها استراتيجيه *وان كان غير ذلك *تبقي زي الزول العكس الكورة وماعارفها دخلت قون *ولما الناس جروا عليهو يهنوهوا *قام جاري منهم قايلهم جايين يشاكلوهوا *خلي برنامج طبي يا عثمان يا اخوي *لانو الشماشه بحترمو الطبي *الزول الطبي بحترموهو *الرغيف السمح بسموهوا طبي *حتي العربات *بقولوا ليك عربيه طبيه يا فرده *المهم *الليله كورتنا ضد شالكه *والموضوع ده بزعل ناس كده *موش لوكوموتيف *دحين لوكوموتيف ده ما ياها الماده الانكشحت في شارع الشنقيطي اول امس *لوكوموتيف الفسفور *والفسفور بشتعل مع المويه *ماشفتوا ناس روشا طوالي بزيدوها مويه عشان تشتعل !!! *وشالكه طبي *لوكوموتيف ما طبي *لقي الطبيه وين *والله الا طبيه عثمان حسن مكي *اخي عثمان *ممكن تتيح مجال في مجالك الرياضي للمنافسات القاريه للانديه *وتورينا منو النجح ومنو الفشل *ومنو الكعبو عااااالي في هذا الخصوص !!!!! *ولك ان تؤرخ للناس *الفريق منو والمدرب منو ومساعدو منو *التشكيله منو *ونتائج الفريق في البطوله الجابها *هنا مع منو وانتهت كم والجاب الاقوان منو *وبره مع منو وانتهت كم والجاب الاقوان منو *وما تنسي *عيسي جاري والباك جاري ورا *عيسي جاري والكنغو كلها جاريه ورا *ورينا يا ابو عفان *ايها الناس *ان تنصروا الله ينصركم *ويجعل منكم بشر طبي *مميزين في الدنيا والآخره *اها *نجي لي شمارات والي الخرتوم *كان شفت يا والينا *قدام محلات الغاز وقفنا واصطفينا *جبنا الانابيب ورصينا *سيد المحل استووا قال لينا *واستوينا يا والينا *الكتف مع الكتف *والبلف مع البلف *والخراطيش ما بتتلخبط علينا *لو في كلو محل غاز عملتو مركز تصويت يا والينا *اكيد حاتقولوا تسعه وتسعين من الشعب شارك في الانتخابات *بس ما حاتعرفوا منو الاديناهو ومنو الليهو ابينا سلك كهربا ننساك كيف ولو كلو زول واقف راجي انبوبة غاز قال لييييييييييييه تلقي الصدي راجع من البيوت من الحيط من السما من المزارع والمصانع والمدارس والضرائب والزكاه والرسوم والسماد والرماد والفساد و العلاج والانبلاج ومن تحت الصاج وسنه كامله بردد ليه ليه ليه ليه ليه لييييييييييييييييييييييييييييييييييييييييييييييه والي لقاء سلك