بسم الله الرحمن الرحيم في السلك [email protected] *امس اكد لنا التحكيم ان الحال في حالو *وانه يخطئ دوما لصالح جهه معينه *معقوله بس *زول يتحاور بي فوق *ويمسك الكورة بايدو *والحكم يحتسب الحاله مضطرا *ومافيها كرت يا ناس !!!! *الف مخالفه واضحه وخطيره *يصرفها سيادته *ولا يحتسب لصالح المريخ مخالفه *الا مضطرا ومجبرا *الا تجيب الدم *المهم *هدف علاء الدين هو هدف الموسم *قبل يبدأ الموسم *ما حايجي هدف احلي من كده *وهدف الهلال بتاع الدربكه ده *استهتار امير كمال كان سبب فيها *برغم ان امير لعب مباراه كبيره *ايها الناس *بكري لما ختف الكوره وجري *مساوي وقع في اتير *واتير وقع في الواطه *فطومه اختي وقعت في روشا *وروشا وفطومه وقعوا في كردنه *وكردنه قام جاري *لما ورق الشكوي طار من يد المحامي السويسري *المهم *انتوا عارفين كردنه مما مسك الهلال *الهلال ما غلبنا *موش قلت ليكم الزول ده حظو ضارب معانا !!! *بالمناسبه دي *فيكم زول بتذكر الهلال هزم المريخ متين ؟؟؟ *ارجعوا يا روشا للارشيف *وورونا آخر مرة غلبتونا متين *اها *محمد عبدالماجد بالدرون ده *دخل ملف عثمان حسين *بالله قال ليك محمد من جابسون رقدها لي علولو *قبال علولو يشوت *محمد عبدالماجد طلع ملف عثمان حسين *وبدأ يكتب *ذكرتني ...ذكرتني حبيبي ذكرتني *ايها الناس *مخالفات الشوط الاول بس مع اوكرا *كانت كفيله بطرد سته من لاعبي الهلال *ولكن حال التحكيم في السودان *يخطئ دوما في اتجاه واحد *ايها الناس *كاريكا امس كراكه عديل *وقع ليك خبت في ناسنا *الزول ده مهرجان تكريمو متين *الزول ده الفيهو اتعرفت *الفيهو كملت *المهم *امس ماقدرت ادخل الكورة لاسباب منزليه *حضرتها في قون *ياخ قون دي مبالغه *ماعرفتها قناة ولا حواشه *كلها اعشاب *لكن كان عندهم استوديو تحليلي رائع *بقيادة الرشيد بدوي *بس نأخذ علي الرشيد انو وقف خالد لما خالد كان يتكلم عن التحكيم *لكن لما ناس قون جابو مدرب الهلال بالجمبه *حلفت *الزول ده انا بعرفو *لما جابوهوا المرة التانيه *اتأكدت اني بعرفو *الله ميييييييييييييين *الليمبي !!!! *حبيبي يا لمبي *لمبي شربوت قيقا يا محمد عبدالماجد *ايها الناس *حظ العمايا *نزار شايت في القون *تقلش وللكورنر تمش *تلف تلقي مهاجم غشيم *جاتو من الله ده *كريم ادي غشيم *اها *ما تميت ليكم *بكري لما جري بالكورة *ومساوي وقع في اتير *والاتنين وقعو في الواطه *وفطومه اختي وقعت في روشا *والاتنين وقعوا في كردنه *وكردنه جري لما ورق المحامي السويسري طار *جمهور الهلال *وحياة الخوه *كلهم قبلوا كده *ياخ فيهم ناس اول مره يشوفوا جامعة النيلين *الكانوا في الحيطه *لي اسي مالاقنهم *تلبوا وجروا قدام بكري *مكسيم زاتو كان واقع معاهم *لكن مكسيم هش شديد *قون من شرطة الخرطوم شمال !!! *ده طبختيهو وين يا فطومه يا اختي *كتروا لينا من النوع ده *حقو ناس مكسيم يرعوا الهلال *افضل دعايه للحوم مكسيم *مكسيم بتاع الهلال بنجض من بعيد *من شارع النيل بنجض *ايها الناس *علولو جاب قونو *فضل قون سيدا *بس اوعه يكونوا اجلوها *ايها الناس *وضح انو في انضباط تكتيكي *وماشاء الله *في دفاعاتنا بتلقي سته *في وسطنا سته *وفي الهجوم سته *عشان كده كلما تعد ناس المريخ *تلقاهم تسعطاشر *هو بشه كان لاعب !!!! *المهم *ده دليل علي فكر غرزه التكتيكي العالي *وبداية تقيد اللاعبين بالانضباط التكتيكي *غرزه مدرب كبير وشاطر *بس سوء حظو سلمو الهلال قبل كده *وما لقي لاعبين *كان بعمل من الفسيخ شربات *وكان بساعدو علي ذلك التحكيم البخطئ دوما *في الاتحاد طريفي *والحكم مين كده طريفي *ورجل الخط طريفي *لذلك تأتي طرائف التحكيم *يارب تغير لينا حكامنا *وتحفظ لينا سودانا *عشان نعود لمنصات التتويج الدوليه *المهم *مباراة افادة الهلال في اعدادو *قابل الهلال فريق كبير واكيد بستفيد *وصاحب صاحبك صاحبك *طالما المريخ لعب ضد شالكا *يبقي الهلال زي اللعب ضد شالكا *يعني نقول الهلال لعب ضد شالكا بالكربون *واتكربني *ايها الناس *فيصل موسي استلم سته كور *وقع سبعه مرات *ووقع مرتين في التسلل *وبراكم شفتوا وليد علاء *اظنكم عرفتوا لماذا استغني عنهما المريخ *تفتكروا لاعبين زي ديل بكون عندهم وجود افريقي ؟؟؟؟؟ *اها *لوزان قالت شنو ؟؟؟ *حيرتونا *ايها الناس *بكري اثبت باننا لما جبناهو جبنا الزيت *ده الزيت *ده الزيت البطلع الزيت *زول يجري علي القون *فريق ادارتو وصحافتو ولاعبينو وجماهيرو يقعوا في واطات الله والرسول دي ؟؟؟؟؟ *المهم *القرعه دي ما ادتهم صدفه سااااي *محتاجين فرحخ برابقندا *لذلك لا استبعد ان تكون العمله العملوا بيها القرعه *كانت بي جاي طره *وبي هناك طره *وقالوا لي مساوي اختار طره *بعملوها الناس ديل *طايره ليهم فرحه *ايها الناس *ان تنصروا الله ينصركم *اها *نجي لي شمارات والي الخرتوم *تعازينا يا والينا *للشعب السعودي والامه العربيه ولينا *في وفاة خادم الحرمين الكان بهم بينا *الف رحمه تنزل يا والينا *علي الملك عبدالله بن عبدالعزيز *وعلي الحوت محمود بن عبدالعزيز *وعلي مصطفي سيد احمد الزول العزيز سلك كهربا ننساك كيف والفين وخمسه من شهر واحد بدت تشيل ....اللله يستر...اللهم لاترنا مكروها في عزيز لدينا والي لقاء سلك
