بسم الله الرحمن الرحيم في السلك عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. *امس استضاف الاستاذ عبده قابل جمال ابو عنجه وصبحي *الحلقه كانت جميله *ويمكن ورتنا اسباب كتيرة لتدهور الوضع الرياضي في البلد دي *واعجبني اتفاقهما في ان اختلاف السبل الاداريه هو سبب رئيسي في التدهور *وقال جمال بالحرف الواحد *ان الحاج زيدان كان رئيسا لدائرة الكرة *ولكن لهيبة المنصب *ماكان في لاعب بتحدث مباشرة مع الحاج زيدان *لان الحاج زيدان وقتها كون لجنه من خمسه لاعبين *هي التي تدير الامر وتحل مشاكل اللاعبين وتنسق مع الدائره *الخمسه لاعبين ديل فيهم الكباتن ومعاهم الاقل قدما *يعني كان الحاج زيدان بيأهل اللاعب للاداره تدريجيا *من وكتو اللاعب *وده فكر متطور *عشان كده في عهد ادارة الحاج زيدان للكره *نال المريخ مانيلا ورفاقه *عشان كده نحنا بنادي طوااااالي بالاهتمام بقدامي اللاعبين *والاستفاده منهم في تسيير امور النادي *وقال صبحي ان مجزرة الشطب لهلال 87 كانت سببا في تدهور الامور بالنادي *وامن جمال علي حديثه واضاف ان مجزرة الشطب بالمريخ لجيل 89 كانت كارثه القت بظلالها علي التقدم *ايها الناس *انقطاع علاقة اللاعب بالنادي بمجرد الشطب خطأ كبير *ولان اللاعب عندنا تنتهي علاقته بالنادي بالشطب لا باللاعتزال *توصد الابواب في وجهه بمجرد الشطب *وهل حاليا يوجد لدينا لاعب بعرف باب النادي بي وين ؟؟؟ *ما الاستاد *النادي *وهل خلقنا علاقة بين اللاعب والنادي ؟؟؟؟؟ *عليه *يجب علي ادرتي المريخ والهلال *ان يراجعوا موقف الانديه من قدامي اللاعبين *وان يعملوا علي الاستفاده منهم ومن خبراتهم *وان يفكروا في تأهيلهم تأهيلا فنيا *واداريا *كي يفيدوا النادي ويفيدوا انفسهم *وفي الآخر تستفيد الدوله من ذلك النجاح الاداري *ايها الناس *قدامي اللاعبون في الدول الاخري *اداريون وموظفون وفنيون في انديتهم *لم تنقطع صلتهم بالنادي *بل وفيهم وزراء للرياضه *اين نحن من كل ذلك ؟؟؟؟ *المهم *سمعنا انو في نائب برلماني حلف بالتقطعو *قال جاهو في المنام الرسول الكريم عليه افضل الصلاة والتسليم *وسأله عن مأمون حميده *وبشره بالجنه *اذا صحت هذه الروايه *يعني اذا النائب قال كده *مابنقول كضاب *افتراضا لحسن النوايا *ولان الشيطان لا يستطيع ان يتمثل في شخص الرسول الكريم *ان بقي الموضوع كده *يعني المبشرون بالجنه بقوا حداشر *المهم *اسلام قالت لي البرد بعد مشي رجع تاني ليه ؟؟؟ *قلت ليها كسير التلج ده يابتي بلطف الجو وكان زاد ببقي برد *اها *الجماعه طبعا قالوا وجدوا كادوك معمول ليهم *وقالوا الكادوك مخصوص لكاريكا ونزار والجزولي *يعني الكادوك قديم *لانو مافيهو كيبي وجاكسون واوتاكا *يعني اسي مستوي المحترفين ده حالتو بدون كادوك ؟؟؟ *طيب ديل لو كدكوهم يبقوا كيف !!!! *اسي الطرف اليمين ده وسمبو دروشتهم دي بدون كادوك ؟؟؟ *طيب قول الكادوك مخصوص لكاريكا والجزولي ونزار *كاريكا جاب قون في هلال كادوكلي اقصد هلال كادوقلي كيف ؟؟؟ *يكون ابليس انشغل وكاريكا جاب القون ؟؟؟ *احتمال يكون الكادوك جديد *والزول العمل الكادوك قال للفكي دخل لي بوتاكو وسيمبو وكيبي *قام الفكي قال ليهو ديل مكدكين من بلدهم *الخوف ندخلهم الكادوك يكدكوا الكادوك زاتو *ديل مواسير ساااااي *ايها الناس *موش احتمال يكون مكدك كردنه عشان صدق كلام روشا وفطومه ! *وموش احتمال يكون مكدك روشا زاتو عشان اشار للمواسير ديل ؟؟؟ *واحتمال تكون فطومه اختي مكدكه *فطومه *الصباح بدري *تبخري البيت في الاركان بالملح والحبه السوداء *الكواديك دي مامضمونه *والمغربيه تبخري البيت بالقرض *وما تعطري البيت وقت النوم *عشان باقي الجن بحب العطر شديييييييييييييييد *المهم *قالوا العلاج بلح المدينه *هكذا اشار لهم زول *ارجعوا اسألوا الزول ده *اتأكدوا *قولوا ليهو العلاج بلح المدينه قلت لينا ولا بكري المدينه افتينا *المهم *قالوا الرتينزه فيها كاريكا ونزار والجزولي *مكتوب كاريكا فيها ولا مدثر ياروضان ؟؟ *لانو الجن ده مابعرف الالقاب *بشتغل باسم الزول واسم امو *يعني لو لقيتوا مكتوب كاريكا *الرتينزه ما بتشتغل *بتقعد سااااي زي هلال الفجيره *ايها الناس *احفظوا الاسامي دي *كاريكا والجزولي ونزار *والهلال مقبل علي مواجهة كي ام كي زنزبار *لو التلاته ديل جابوا اقوان *-يبقي الرتينزه قريتوها غلط *ولو ماجابوا اقوان *يبي ما من الرتينزه *من مدربكم ده *المهم *المدينه حايعود بينا من تنزانيا فرحانين *ان شاء الله *وفرح المدينه لي قدام بودينا *وبتعس اخوانا لينا *اقول ليكم *امسحوا ناس كاريكا من الرتينزه *واكتبوا فيها عنكبه والمدينه *ايها الناس *ان تنصروا الله ينصركم *ايها الناس *تعازينا لدكتور عماد فضل والاستاذ النعمان حسن في وفاة والدة الاول وهي شقية التاني *لها الف رحمه وجعل الله الجنه منزلها *اها *نجي لي شمارات والي الخرتوم *والينا *كيف جقرنا المربنو لينا ؟؟؟؟ *ما اكل شئ جديد يا والينا ؟؟؟؟ *باقي اكال وشهيتو فاتحه علينا *يوم غايتو يا والينا *نصحي من النوم نلقي جقركم اكلنا وبيهضم فينا سلك كهربا ننساك كيف ومعدة الجقر شايله وطن ومواطن ولسه بتقرض فينا والي لقاء
