عند كشك الجرائد قابلني جاري (عبدالحميد) وبعد التحية إنتحي بي جانباً والدهشة تعلو قسمات وجهه وسالني : - قريت كلام الوزير؟ - ياتو وزير ما كووولهم غير الكلام ما عندهم حاجة - وزير الصحة - قال شنو؟ - وزير الصحة د. حميدة يا أستاذ قال إنهم قاموا برصد ولقو إنو في 3 أطفال مجهولي الأبوين بيتم ألقائهم في الشوارع يومياً - ده في الخرطوم بس ! - أيوه والله .. يعني لو في كل ولاية 3 يكون عندنا أكتر من خمسين طفل يومياً .. يعني 18 ألف طفل سنوياً .. ودي ما المشكلة يا أستاذ - المشكلة شنو؟ - المشكلة إنو ديل البيلقوهم .. غير القاعدين يدفنوهم ويرموهم في السيفونات و... - معني كده العدد أكبر من كده ! .. تفتكر يا حاج السبب يكون شنو؟ - شوف يا استاذ الكارثه دي كووولها عملتا ثورة التعليم القالوها دي - كيف ؟ - أقول ليك .. هسه البت تجي من (القرية) الكانت فيها للعاصمة تصرف على نفسها من وين؟ أبوها يكون دخلو الشهري ألف جنيه .. لو أكلت ليها وجبتين بس فول بي عشرة جنيه في الشهر عاوزه ليها 300 جنيه .. أها وين طباعة المذكرات ووين الحاجة البارده ووين (الكريمات) ووين العبايات ووين المواصلات ووين الصابون ووين معجون الأسنان و - ويا ريت تكون بتقرأ ليها (علوم ذرة) وللا (فيزيا حيوية) تلاقيها بتقرأ في دبلوم حاسوب ! - والله يا حاج السودان بقى كووولو دبلوم حاسوب التقول عندنا (مايكروسوفت) - أها يا أستاذ زي البنية دي مش مشروع أنحراف ؟ - صاح يا حاج .. عرس ذااتو مافي - عرس شنو يا استاذ .. الأولاد ديل يعرسوا بي شنو ؟ وقول عرسو يعيشوا بى شنو؟ - وتفتكر الحل شنو يا حاج عبدالحميد ! - حل ؟ والله يا استاذ الحالة الوصلنا ليها دي إلا بس (العناية الإلهية) لكن زول (بني أدم) كده يقدر يصلح الحصل ده مافي .. جنس (اللبع) و(الهبر) الحصل ده (لبع نصاح)؟! - ليه التشاؤم ده يا حاج - لا تشاؤم وللا حاجة .. عشان المسألة تتصلح والشباب ده كان يتزوج ويبعد عن الحرام كان مفروض الدوله تعمل مشاريع تنموية عشان تكون في فرص عمل والشباب ديل يشتغلو ويكون عندهم مصدر دخل ويكونو عندهم المقدرة على الزواج ! - والحصل شنو؟ - الحصل إنو المسؤولين عملوا المشاريع (لى روحهم) وبقوا هم يتزوجو مثنى وثلاث ورباع ، ده غير (فك التسجيلات) ! - مش ممكن يا حاج الأمور تنعدل شوية .. والحالة الأنحنا فيها دي تتغير .. ويجي رخاء والأولاد ديل يلاقو وظائف .. ويكون عندهم دخل محترم .. والغلاء ده يقيف ويقدرو يعرسو؟ - والله يا أستاذ دي عاوزه ليها معجزه ولحدت الكلام البتقول فيهو ده يا استاذ يحصل نحنا عاوزين لينا (دار مايقوما) قدر (المدينة الرياضية) قبل ما يشلحوها وكده ! كسرة : بالمناسبة (الغير سعيدة دي) أخبار المدينة الرياضية شنووووووو؟ هي متل العمايل دي ما الياها خلت ده يحصل .. وللا شنوووووو؟ كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو وووو وووو)+و؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟
