الصادق المهدي ماسك ليهو ورق ولافي وحايم من مطار لي فندق ما خلي بلد قال إيه عاوز دعم! منين يا حسرة! عامل زى الأولاد البلفوا من موقف حافلات لي موقف بصات شايلين برضوا ورق مكتوب فيهو "ساعدونا يا جماعة.. عليكم الله يا جماعة". ولاية الخرطوم منعت التسول وقامت بتسفير بعض المتسولين خارج البلاد، التسول السياسي الذي غالباً ما ينتهي بعبارة "يفتح الله ويستر الله" البمنعوا منو؟ بعدين يا ود المهدي "اتفاق باريس" ده وقعتوا أنت براك عشان تساسق بيهو براك وناس عرمان وجربان وخربان قاعدين في الفنادق يسفسفوا ويجغمو ويمزمزوا ويسكسكوا وأنت يا حبة عيني دايخ السبع دوخات. عزيزي الصادق: علي طريقة بروف غندور نقول: بلادك حلوة ارجع ليها دار الغربة ما بترحم، أما موضوع لو جيت بالمطار أو بالدرب التحت حيعتقلوك أو ما يعتقلوك ده ما بعرفوا. بس أنت كدي الزوبعة بروقة اليانصيب دي خليها و"تعال منا تبتعد قرب" بتعرف البحصل ليك شنو وأن شاء الله يحصل خير خاصة والنائب الأول بتاعك في المعتقل وأنت بره البلد خالين الحزب صقيعة وناس برمة وبت نقد الله ما عارفين يسووا شنو وما قادرين يطلعوا نفرين تلاتة في وقفة الاحتجاج علي اعتقال النائب الأول. أقول ليك حاجة يا سيد صادق: لو لفيت العالم من القطب الجنوبي للقطب الشمالي والتقيت برئيس الاسكيمو ذاتو – يا ربي يكون سمع بيك؟- وما خليت بلد وطلعوا ناس برمة وسارة يلفوا معاك شايلين فوتوكوبي من "ساعدونا إعلان باريس" ده كلوا ما بفيد. واللا أقول ليك بفيد شركات الطيران والفنادق واللوكندات لو قروشكم قصرت. حوامتك الخارجية ما بتفكك من الإنقاذ ولا بتجيبك رئيس في حكومة انتقالية دون انتخابات عشان تنقلب أنت والشيوعيين واليساريين والمتمردين وكل "ال علمان" في الداخل والخارج علي الإنقاذ والإسلاميين. يعني بالعملتو ده يا ود المهدي نهيت تاريخك تمضي علي اتفاق مريب مع ناس عقار وحقار وبمبار المريبين وبالدس كمان وتشحد في الأجانب البسوي والما بسواش طيب كان أولي أنت أو حزبك تعلموا جولة داخل السودان مع جماهيركم. إذا كان لسه عندكم جماهير، تعرفوا رأيها في الوقعة الوقعتوها بالتوقيع ده. طبعاً خايفين ما تطلع عندكم جماهير زي ما حصل في وقفة الأسرة أمام مقر جهاز الأمن، أو تطلع شوية الجماهير غير موافقة علي البتعملوا فيهو ده. فصلت إدارة مدرسة ثانوية بولاية تينيسي الأمريكية احدي الطالبات لأنها قالت لزميلها الذي عطس "يرحمكم الله". مثل هذه المدرسة تستحق عندما خرجت الطالبة منها أن تقول "الحمد لله الذي اذهب عني الاذي وعافاني". تضامنت الطالبات مع الطالبة بارتداء قمصان طبع عليها عبارة "يرحمكم الله". لو إن هذه العبارة موجهة الي إدارة المدرسة كانت تكتب "الله لا رحمكم". يقول العلماء أن سرعة العطسة مائة كيلومتر في الساعة وعند العطس يتوقف القلب عن النبض وتتوقف جميع أجهزة الجسم التنفسية والهضمية والبولية رغم أن زمن العطسة ثانية أو جزء منها وإذا عطست بقوة يمكن أن تكسر احد إضلاعك وإذا حاولت إيقاف عطسة مفاجئة من الخروج يؤدي هذا الي ارتداد الدم في الرقبة أو الرأس ومن ثم الوفاة إما إذا تركت عينيك مفتوحتين إثناء العطس من المحتمل خروجهما من مخرجيهما. لو كنت موجوداً في الولاياتالمتحدة سأهدي مدير هذه المدرسة شطة قبانيت وبهارات وتوابل قوية الرائحة فإذا عطس بقوة مفتوح العينين وخرجت عيناه لعله يعرف قيمة "الحمد لله" و"يرحمكم الله". قبل أسبوع تم ضبط الفي دجاجة فاسدة في طريقها للأسواق وقبل ذلك تم ضبط أكثر من عشرة أطنان فراخ فاسدة بالحاج يوسف. وفي كل مرة تضبط فيها الفراخ الفاسدة تظهر أخري، والله أعلم كم عدد الفراخ الفاسدة التي تزوغ من الضبط وتدخل بطون الناس؟ هناك حل واحد: بدلاً عن ضبط الفراخ الفاسدة وإبادتها اضبطوا وأبيدوا الشخصيات الفاسدة التي تقف وراء المتاجرة بالفراخ الفاسدة. نقلا عن صحيفة الصحافة 27/8/2014م