بسم الله الرحمن الرحيم ونسة حرامية (7) ( المسرح التفاعلي) الفصل الثالث المشهد الأول الزمان : : نفس اليوم ، في الصباح الباكر المكان : الستار لا زال مغلقا ، أصوات موكب المسؤول تقترب حتي تتوقف بالخارج . بعد هنيهة يسمع صوت جلبة لمجموعة من الناس يدخلون من مقدمة يمين الخشبة في شكل صف جد عجيب ، ففي المقدمة رئيس المجموعة بعمامته وجلبابه الأنيق ونظارته السوداء ، يتحسس طريقه بعصاه كالأعمي ، ثم يتبعه في صف واحد خمسة أشخاص من الشباب ، يبدو أنهم من المسؤولين الجدد ، فهم يرتدون نفس الزي ، ونفس النظارات ويتحسسون طريقهم بعصيهم أيضا . رئيس المجموعة : ( يهتف بصوت عال) لا لدنيا قد عملنا... المجموعة : ( ترد بصوت هامس )سف سف سف... لغ لغ لغ . رئيس المجموعة : ( يهتف بصوت عال) نحن للدين فداء.... المجموعة : ( ترد بصوت هامس ) سف سف سف...لغ لغ لغ ... نحن للنار غذاء ... رئيس المجموعة: ( يهتف) إلحس كوعك ، إلحس كوعك . المجموعة: ( تهم بترديد الهتاف الا أنها تتوقف ) إلحس .... رئيس المجموعة: ( يتوقف عن السير دون أن يلتفت)...مالكم ما هتفتو؟. مسؤول2: ( بتردد) الكلام دا ما عاد يجيب حقو ياريس... مسؤول 1: ( يكمل ) ...جاب لينا الشباشب والمراكيب...... حنعيدو تاني؟ رئيس المجموعة: ( مندهشا) ما جاب حقو كيف؟ دا يمكن هو الانجاز الوحيد اللي حققناه للبلد.... تعجيز المعارضة. ( أفراد المجموعة يخلعون نظاراتهم ). رئيس المجموعة : (يقف أمام الصف آمرا) أي والي ، أو سفير ، أو وزير ، أو مدير ، أو مراسلة ، أو غفير ....يتقدم خطوة ويدي التمام. مسؤول5: ( يتقدم خطوة) وزير المالية الجديد ..سعادتك رئيس المجموعة : عرفت حتسوي شنو ؟ مسؤول5 : نعم سعادتك.. حطفش نص الشعب الفضل...واقرض النص التاني. رئيس المجموعة : (لمسؤول5) المرة دي دايرنك تنفذ لينا الخطة (ن) ... عارفا؟..... آخر حاجة في جراب الحاوي. مسؤول5 : نعم سعادتك ...: أي واحد بمرق من بيتو ويشم الهوا دا يدفع حقو وأي واحد بمش في زلطنا دا برضو بدفع رسوم ذهاب وإياب ، وأي ناس حلة يعملو صندوق جماعي والصرفة الأولي تكون لزولنا ، رئيس اللجنة الشعبية ، يصرفها وبعدين يقوم يعمل ليهم شكلة ويفرتكو الصندوق والقروش يسلمنا ليها. رئيس المجموعة : ( لمسؤول5) أهم حاجة بعد شهرين تلاتة يدور الصندوق تاني ، والمرة دي إجباري وبرضو يصرف الأول. الحكاية ماشا ليها في زنقات وشغل الدستوريين داير ليهو مصاريفم كتيرة.( يلتفت للآخرين ) .......اللي بعدو. مسؤول 2: ( يتقدم الصف ويعرف نفسه) السفير الدائم بالأمم الغير متحدة رئيس المجموعة : ( بغير إكتراث) مهامك؟ مسؤول2: أول حاجة... أوزع العمل ( يرتبك فيصحح).... قصدي الهدايا علي أعضاء الدول ، أول ما يلمسها العضو يتبكم ويقيف في صفنا طوالي ، وبعداك تعال شوف... المنح والمعونات والاستثمارات تنزل علينا زي المطره. رئيس المجموعة : ( يثني عليه ) مهمتك معتمدين عليها شديد.... البلد قربت تقع والدولار شح خلاص. وبعدين أهم من دا كلو... تمشي لينا لاهاي وتكشح التراب اللي في الكيس اسلمو ليك الفكي في وش المرة ديك الجديدة. مسؤول 2: ( يكمل) وبعداك أقرا التميمة بتاعة الجني اللي حيجيب لينا الملف إياه ، أقوم أستلم الملف منو وامسح إسم زولنا بالكوركت وأغير إسم البلد ويرجع الملف في محلو. رئيس المجموعة : تمام ..... ولو إنو خايف من الجن المرسلينو... يضرب لخمة ويلخبط لينا الشغل كلو .......أصلو بسكر كتير. (مسؤول 3 يرفع يده طالبا السؤال فيؤذن له)..... هو سعادتك....حتسلمونا عدة الشغل متين؟ رئيس المجموعة : ومالك مستعجل علي رزقك كده؟....اصبرو شوية لغاية ما العكاليت العجايز ديل ينكشحو.. ( باستغراب ) يازول دا كل واحد جايب فكيهو معاه وآبي يفك الكرسي . مسؤول1 : ( يفرك يديه ) دايرين ندبل سعادتك وبعدين نتلت علي راحتنا. مسؤول 4: ( بلهفة ) دايرين نعيش الأبهة ، نركب عربات موديل السنة ، ونلف بالمواكب ويصورونا بالكاميرات ، وننوم ونصحي بالحراسة ، والناس يقيفو لينا محل ما نمش ، نعمل لينا هيبة كده ونبيض وش الحزب. ( جوال رئيس المجموعة يرن فيفتح الخط ويذهب ليرد بعيدا عنهم بينما المجموعة تقوم بحركات تتنافي والإنضباط السابق ويبدو انهم يتأهبون لتقديم عرض ما ). المجموعة : ( تغني وترقص علي طريقة الراب ) نحنا من حزب الحرامية.... منهجنا الإفك وسوء النية... كذبنا عليكم؟ آي آي أكلنا قروشكو؟ آي آي خربنا الواطا ؟ آي آي هضمنا حقوقو ؟ آي آي فتحتو خشمكو لا لا قدرتو علينا ؟ لا لا كتلنا عيالكو؟ آي آي خرستو خرستو ؟ آي آي. مسؤول 5: (للجمهور ) إنشا الله ما نكون تقلنا عليكم؟. مسؤول 3: ( باعتذار للجمهور ) واللا ما تكون زفارتنا وصلتكم؟ مسؤول 1: (للجمهور ) تستاهلو أكتر من كدا... خليكو ف نومتكو. مسؤول 4 : ( للجمهور ) حبوباتكن مش قالن ليكم : الخواف ربي عيالو. مسؤول2: ياللا .... خلي حكومة الضلالية ديل ينفعوكم . مسؤول 1: زي ما كتمو نفسكو... حيغطسو حجركو. مسؤول 3: واللا المعارضة ذاتا المجهجهة.... مسؤول4 : برضو دايرين الكراسي. مسؤول3: ( بحرقة ) الوطن العايشين فوق ترابو دا بيضيع ياهووي. مسؤول 5: علي بالطلا... ( لا يكمل) شكلوكو كدا طمعانين في الدنيا أكتر مننا. مسؤول2: حبات السبحة كان إنفلتت ... تاني ما بتبقي سبحة. مسؤول 4: شفعنا علمناهم الهزيمة .... وكمان حا نورثهم الخيبة ؟. مسؤول 1: عشان تتصلح... يهي واحدة من إتنين : ياإنتو تتوبوا مسؤول 4: ( يكمل ) يا نحنا نتوب . مسؤول 4: ( لزملاءه ) إذا كان دعوة مظلوم واحد بتشتغل...أمال دعوة شعب كامل تعمل شنو كان مرقو؟ مسؤول 3: أنتو كدا ظلمتو نفسكو لأنو ما أخدتو علي يد الظالم. مسؤول 5: ما في طريقة....خت ربك في قلبك .....وإتغير. مسؤول : أكان شافين الباطل باطل.... إتلمو علي الحق وفوضو أمركم لله. مسؤول2: ( يدعو ) فمن ينصرني من الله إن عصيته . مسؤول 1: ( يتضرع ) فدعا ربه : أني مغلوب فانتصر. ( رئيس المجموعة ينهي المكالمة ويعود اليهم ). رئيس المجموعة : أنا جبتكو هنا الليلة عشان تعرفو تاريخ حزبنا علي حقيقتو وكيف إتعلمنا الأونطة ومن منو؟ ( يذهب الي منتصف الستار ويتهيأ لفتحه) .... هنا قهوة المعلم طرطش..... في الحقيقة هو اللي علمنا الشغل وكلنا باريناه ....الليلة حنجتمع بيهو.... نجدد ولاءنا ويديكم في المرة آخر دروسه الحديثة عشان نجدد دماء الحزب وكدا. ( رئيس المجموعة ومن معه يفتحون طرفي الستار فنري قهوة طرطش كما هي ، بينما يجلس اللصان والشيخ وسطهما وقد علاهم الوجوم). *** ( يتبع المشهد الثاني من الفصل الثالث باذن الله ). الدمازين في :22/11/2013م. محمد عبد المجيد امين ( عمر براق)
