[email protected] سلام الإخوة والأخوات قرآء الراكوبة لكم الإحترام جميعا وبما إنه الحال المائل فات حدو ورئيسنا فات الكبار والقدروا , وبدع في الرقيص وكسر عين البلد ,, آي نعم كسرها , النعمنو برقص بإسم رئيس السودان وحامي حماه شرعا , يعني إسميا بحكم بالشريعة الإسلامية , وشايل عصاتو ويخبت من طرف ويحاكم بي قوانينه حقتو براه , وعلماء دينه يشيلوا ويفصلوا ليهو حسب مقاسه , زول بسعلوا مافي , إن عجبكم عجبكم , إن ما عجبكم تلحسوا نص راسكم ...اها تماها امس بالرقيص والحت الشديد , الما بسوهو شباب في سن اولاده , لكن نقول شنو , ده خازوق كبير إ تحكر في نص الطايوق ودااااك الشعب ساكت وبتفرج لامن شد وركب فوق ضهرو بارتياح ويرقص ويغني للصباح .... والموجع جدا تهليل وتكبير وتأييد الكتيرين لي رقيص هذا الرئيس العلى مشارف السبعين خريف !!!! عجبي!!!!!!!!!!! متاوقة ______ يا ولي امر الشعب السوداني , ارقص وحت وسوي الداير تسوي لكن بي إسمك إت عمر البشير ود حوش بانقا , زول بسعلك مافي تب, لكن ما بإسم الشعب الحرق دمنا واعصابنا بسكاتو على العوج والمهازل ..ولا بإسم السودان التاريخو يهز العالم كلو . النبي فيك يوم واحد شفت ليك رئيس بهدل روحو وبلده زيك كده ؟ ولا حتى ناسك المعاك ديلك , شفت واحد فيهم سوا نص سواتك دي ؟ ما كلهم فاكنك ارجوز يضحكوا فيك هم في البداية ويضحكوا فيك باقي الخلق .. حالك بقت حال القصيدة الجاية دي .. مهداه ليك وللشعب الشربتوا المر وساكت ليك ويصفق كمان شدولك ركب فوق شعبك الجحجاح شدولك ركب فوق شعبك الجحجاح خازوق البلد النجض المرتاح جعجاع المسيرة الدمر الإصلاح المال بهمك وإن ما كمل ما بترتاح ********* البطن الجابتك والله ما بتنلام دي القسمة الغريبة وكلها اقسام يا الصقر الختف الفي حشانا ونام يا دود الصريف الفي الحرابة نعام ********* بابك مطبل ومركوبك يجيب الشوم لا بتعرف الكرم ولا بتعزم المضيوم نضفت البلد من الكان كتير مردوم وفي ساعة الرقيص فايت الحروم ******** ابواتك قبيل عرفوك زول عوجات عارفنك بنات الخالة والعمات في الدم والقتل إيديك دوام بارزات يا اب قلبا محجر ما بعرف الرحمات ****** طبعك بالفتن دائما تجيب اللوم في وسط الخلوق وفي الفارغة بتحوم تلقط في الكلام النصو ما مفهوم يتبروا منك ناس البادية والخرتوم ***** مع الإعتذار الشديد لشاعرنا الراحل المقيم ود الحسين ولفنانا الراحل المقيم سيد خليفة ودعتكم الله
