بسم الله الرحمن الرحيم سودانيز زهايمر حكومة السودان الاليكترونية ( 11) يفتح الستار علي نفس المشهد السابق ، حيث نري الجد يجلس علي الآرض " متمحنا" وبجانبه الحمار وكرسيه المتحرك ، بينما نري أوراقا مبعثرة هنا وهناك. ( بعد قليل نسمع صوتا صادرا من الحمار) الحمار : ( للجد ولكن ينهق بلغته ) هم الشباب إتأخرو مالم ؟ الجد : ( صادف أن يرد علي النهيق بزهق ) شنو..! .. مالك ...؟ .... ما مشو يشوفو ليك جردل موية وحاجة تاكلها. الحمار : ( للجد ) .... أهه .... لقيت شنو في الورق ديا ؟ ( الجد ينهض ويمشي بخطوات متثاقلة ليلتقط الأوراق المبعثرة ويعيدها الي مخلاة الحمار بعدما يعيد قراءتها بسرعة...) الجد : ( لنفسه بصوت عال) يبقي الولاد ديل عندهم حق.!!.... معقول كل الهيلمنات والشهادات دي تحكمنا وحالنا يبقي كده؟( مستغربا) ده حتي واحد فيهم متمكن من تخصصو مافي!!.( يتوقف قليلا) تخصص شنو!!..... ديل ولا واحد فيهم بشتغل في تخصصو!!. ديل شكلهم كلهم كده متخصصين في حاجة واحدة بس : اتشليع ( يذهب الي حيث مخلاة الحمار ويقلب في الأوراق).. إمكن تكون مضروبة!!...... حتي لو ما كانت مضروبة ... أكيد اللي أداها ليهم برضو حمار!!. وين الأبحاث والدوريات بتاعتا... اللي ما سمعنا إسم واحد فيهم..." عالم" واللا " خبير"؟!.نتفاخر بيهو قدام العالم .. ولا حتي ما شفنا ليهم شغل علي الأرض غير كسير وسمسرة وبيع!!. ( باستغراب) أنا اللي بعرفو إنو العلما أكتر ناس بخافو الله...معقول!!... ولا واحد في ديل بخاف ربو؟!!. اصلو لو كان فيهم عالم واحد حقيقي ما كان جنب معاهم لحظة. الحمار : ( لنفسه ) مسكين بني آدم ده ...... إبليس جننو جن؟ ما بتعب نفسو... بس يخت قدامو سلطة وثروة ونسوان. الجد : ( متابعا لنفسه) ما هو تعليم بلا تربية ما بنفع.... أكيد ديل بكونو فاقد تربوي بديكور تعليمي ساكت!!. واللا يكون ما عندهم أهل ربوهم ع الصاح والغلط ؟. واللا يكونو أولاد ح...( يتوقف ثم يواصل) استغفر الله . بلد ينهبوها ويذلو أهلها ويفرتكوها ستين حتة يبقو أكيد ما بكونو أولاد بلد أصلا.... ديل أكيد بكونو عساكر إبليس ... غشاهم وطمعهم في الملك وبعد شوية حايتبرا منهم!!. ما دي شغلنتو يا فهمو. ( بحركة من يده ) يلا.... خموها كلها ... ونحنا برضو في المرة. الحمار: ( يتحرك في مساحة ضيقة كأنه يفكر)... هسي كان خيروني أكون حمار في البلد دي واللا زولا مسئول...أبرطع في ميري الحكومة...أسرق ... أنهب... أفتري علي الناس... وآكل قروشهم وأأكل جناي حرام في حرام.... أخير أكون حمار. ( فترة صمت) اقلها الحمار باقي علي العهد ... بعبد ويسبح ربه.... عارف شغلو....لا يكل ولا يمل ... بحفظ الأمانة وبعرف دربه كويس ولا يورو ليهو. ( يصمت قليلا).... حمار زي ده ذكرني بإبن عمي .... حمار مفتري برضو..... ما بعرف غير الرفيس. سيدو قام وداهو لدكتور البطري. كشف عليهو وقال: الحمار ده تاني ما بنفع.... عندو زهايمر حاد.... كل ما تجيهو الحالة بفتكر نفسو فرعون زمانه... يقوم يرفس ويجعر زي الحمار. قام الحمير الصعاليك إتلمو عليهو وغشو ... قالو ليهو : إنت رئيسنا ونحنا مأيدنك ... نشكل حزب .... وشكلو حزب ..... نشكل حكومة .... وشكلو حكومة. قالو ليهو : آهه.... البرنامج شنو يا ريس؟ قال ليهم : وأنا بعرف أفكر... خليتو ليكم. قالو ليهو : سمح خليها علينا... وياهو ده الحال: بلد " مشلع " وشعب " داقس". الجد : ( متنهدا) ....الله يخلي الشعب الفضل ...ويهديه... يعمر كل المساجد بحلقات العلم .... ويبدا من جديد . ( لنفسه) ونحنا عددنا بقي كم؟ زمان كنا ... تاشر، وبعدين بقينا عشرين... لما كنا في الزمن الجميل . وذدنا وبقينا أربعين لما فتحو سوق النخاسة ودبلو وتلتو وربعو في الحريم.( يصمت قليلا ) وتاني رجعنا وبقينا تلاتين لما خال العيال بنقتو الكتيرة قسمو الفولة نصين : نص عربي ونص زنجي . ولما خشينا في الزمن الضايع لقو النص العربي ناخرو السوس والنص الزنجي أكلو الدودو. جابو خبير محايد وسألوه : رأيك في النصين ديل شنو يا خبير...بنفعو؟ قال: الله يخيبكم ... ربنا رزقكم فولة واحدة تقومو تقسموها نصين !!.... دي تاني ما بتنفع للنماء . سألوه :والحل؟ قال : إتقوا الله وإستغفروه وتوبو...عشان يرزقكم فولة جديدة وقرا : " وإعتبروا يا أولي الأبصار". الحمار : ( يتابع) ود عمي ده فضحنا وسط القبيلة. نحنا ذاتنا إتبرينا منو.... آي ... ما هو في فرق بين حمار راقي وفاهم.... وحمار ما فاهم كل كلو كلو!!. ده كان فتحو ليهو راسه وكبو فواقا العلم ... برضو ما بتعلم!. الجد : ( لنفسه ) يعني كان الناس إتعلمو يحكمو نفسهم بنفسهم ... مش كان أخير من الذل والاهانة ديا؟!!.. أمكن في الأول يقعو لكين بقومو ويقعو لغاية ما يستعدلو. الحمار : ( يدور حول نفسه ) آي.... نحن صحيح صوتنا كعب.....وبننضرب ونتهان من بني آدم...لكين... برضو صابرين.... ما يهو ده شغلنا.... مالنا نحنا ومال المشاكل؟!. لكين .!! تاكل علي حسابي وتخليني جيعان وعطشان وعيان.... أكيد ما بخليك... أفضحك طوالي( الحمار ينهق بصوت عال). الجد : عجيب ناس البلد دي ..... زمان أجدادهم كانو بضربو الأرض ويعمروها وهسي بقو ينهبوها ويشلعوها... طيب!!... ودي تجي كيف؟!. معقول في زولا ينهب ويشلع أرض جدودو؟!!... أكيد دي عملة ما بعملا إلا....!!. ( بتعجب ) قال تمكين قال!!. ( يصمت قليلا) تمكين ..تقوم تكوش علي كل حاجة إنت وأهلك؟!! . ده أكيد تمكين بتاع الشياطين... ... ما هو ما في زولا بخاف ربه بيسوي الشيفنو ده!!. الحمار : أكعب حاجة في بني آدم .... النفاق...( يصمت قليلا ) ما ورووكم من زمان آياتو وبيناتو!!. ويهي ظاهرة قدامكم زي الشمش!. تدقسو مالكم.؟!. واللا عجبكم؟... واللا بقيتو زيهم؟. الفلاحة بس في النقنقة والطنطنة والدهنسة....خليكم في جبنكم ده لمن النسوان يجيبوها . ما الرجال في البلد دي شكلهم إنقرضو خلاص. الجد : ( لنفسه بقلق ) الولاد ديل إتأخرو مالم؟. الحمار : بخت بني آدم..... ربنا أداه عقل عشان يعمر ويصلح في الأرض. أول ما الدنيا تضحك ليهو راسو يقلب وينسي أي حاجة ويقعد يسكها وهي بترقص ليهو في جعيباتها لمن ريالتو تسيل. ولما تقبل عليهو وتوريهو وشها القبيح يقول : " رب إرجعون". ( بعد قليل يدخل الأحفاد من يمين الخشبة حاملين سطل من الماء وبعض القش ومكانس. يضعون سطل الماء والقش أمام الحمار ، ثم يبدأون في تنظيف المكان ). الأحفاد: ( بصوت واحد) فساد....قذارة.... فساد...قذارة...فساد... قذارة....فساد. ( يسمع صوت تلاوة قرآنية من الخارج يبدو أنها صادرة من نظام الحكومة الاليكترونية فينصت الأحفاد). التلاوة " وَإِذَا تَوَلَّى سَعَى فِي الأَرْضِ لِيُفْسِدَ فِيِهَا وَيُهْلِكَ الْحَرْثَ وَالنَّسْلَ وَاللّهُ لاَ يُحِبُّ الفَسَادَ" البقرة/205. في هذه الأثناء يتجه الأحفاد نحو الستار فيغلقونه بينما يتكرر المقطع الأخير من الآية الكريمة عدة مرات). ( نواصل) الدمازين في:2012/01/29 محمد عبد المجيد أمين(عمر براق ) [email protected] ا
