إرتفعت الإيدى الصغيرة الناحلة لأطفال صغار إرتدى بعضهم الزى المدرسى وظل بعضهم بملابس عادية بعد ان خاب أملهم فى مواصلة تعليمهم هذا العام.. هتفت الأمهات مرددات خلف أطفالهن عايزين نقرأ ...وأحلامهن بتعليم يضمن مستقبل ابنائهن تنسرب كما العرق الذى يسيل على الوجوه الغاضبة. وقف طلاب وأولياء أمور مدرسة العرضة الإبتدائية سابقاً امس العاشرة صباحاً أمام المدرسة والتى تم بيعها وتحويلها الي مدرسة عثمان بن عفان النموذجية وهى من أقدم المدارس بالعرضة إلا انها وكحال المدارس الحكومية ظلت تعانى من إنهيار تام ورغم ذلك ظل سكان المنطقة والمناطق المجاورة متمسكين بالتحاق طلابهم بها الا انهم تفاجأوا فى اليوم الأول للدراسة بإغلاق مدرستهم ونقل الطلاب والاساتذة لمدارس أخرى ولا زال عدد كبير من الطلاب لم يتم تسكينهم بالمدارس مما أغضب الأهل ودفعهم لتنظيم الوقفة الإحتجاجية امس . إلتقت حريات بالسيدة"س،أ" والدة أحد الطلاب وسألتها عن مشكلتهم فردت: انحنا ماعارفين نعمل شنو أولادنا بيضيعوا قدامنا ويدنا مغلولة ..فى أول يوم فى المدرسة جيت مع ولدين من وليداتى واحد أصلو بقرأ فى المدرسة والتانى تسجيل جديد لقينا المدرسة مقفلة وفى تكسير شديد فيها قايلين فى صيانة ولا حاجة قالوا لينا انه المدرسة دى اتقفلت نهائى وانه نودى أولادنا مدرسة الزهراء فى أبوكدوك زعلنا وهرجنا وفى الآخر سوقنا وليداتنا ومشينا هناك المدرسة أبت تستلم وليداتنا وقالوا ماعندهم اى مساحة ليهم فى ناس من الزعل اتشاكلو مع ناس الزهراء وحصل ضرب عديل بين الاساتذة وأولياء الأمور لما الشرطة جات فضتو ..بعد يومين كده قالو خلاص الطلاب بى اساتذتهم يودوهم مدرسة الكتيابى وهناك فى ناس قبلوهم وناس لسه والمدرسة طبعا مامجهزة لى عدد كبير زى ده لافيها موية لاحمامات كفاية والمشكلة انه فى ناس لسه مامعروف يمشو وين والسنة مشت حرام عليهم. تدخلت الوالدة “م،ح" ربنا على الظالم والمفترى الناس مدخلين أولادهم فى المدارس الخاصة والانجليزية وانحنا راضين بالحكومية دى يقوموا يشيلوها مننا بركة الشهر الكريم الجاى ده ربنا يخلص حقنا وحق وليداتنا كل مرة نسمع كلام مرة يقولوا اشتراها مستثمر اجنبى داير يقلبها مول مرة يقولوا دايرين يسووها مدرسة خاصة كل مرة نسمع لينا فى كضبة كده.. الوالدة “ش" الناس البتعاين لينا من عرباتا دى بتقرى أولادها فى القبس والبريطانية ومنسورى الشارع ده مليان مدارس خاصة مامحتاجين لى مدرسة خاصة زيادة محتاجين لى مدرستنا دى انحنا مابنتحرك لو ماجانا مسئول مش يوقفوا لينا نس الأمن ديل والله مابهمنا ده مستقبل أولادنا مالعب ... ولم تستطع حريات الحصول على تصريح من إدارة المدرسة أوحتى أحد أعضاء مجلس الأباء للتطويق الأمنى الكثيف بالمكان ورغم جهود الشرطة لتفريق الجمع الا ان الوقفة الاحتجاجية ظلت متواصلة وظل الهتاف لايهدأ حتى منتصف النهار.
