المجموعة السودانية للديمقراطية اولاً الملخص الإسبوعي: " ... ليه عشان زول واحد عايز يدمر العالم دا ! أقبضوه؟؟ أنا دايرة عمر البشير دا يحاكمو في محكمة بتاع الجنائيات..." حليمة كيقا، ناجية من حرب جنوب كردفان ولاجئة بمعسكر إيديا بدولة الجنوب ببداية هذا الاسبوع تبدأ المجموعة السودانية للديمقراطية أولاً بالتعاون مع فريق " عيون واذان" الإخباري تسليط الضوء وإيصال أصوات ضحايا الأوضاع الإنسانية وجرائم حقوق الإنسان المغترفة في مناطق جنوب كردفان والنيل الأزرق، عبر مقاطع متنوعة من الصور وتسجيلات الفيديو مع الناجين من الموت ونيران قوات المؤتمر الوطني. مرفق مع الملخص الحالي مقابلة مصورة مع الناجية حليمة كيقا، قام بها الصحفي راين بويتي من داخل معسكر إيديا للاجئين بدولة جنوب السودان. االنص الكامل للمقابلة تجدونه مرفق مع الملخص وعلى الوصلة التالية: http://youtu.be/K-B-EiGkVgY ببساطة وتلقائية، وبألم بائن، تحكي حليمة كيقا قصة ما يفوق المليون من المدنيين المتضررين(ات) والناجيين من حروب المؤتمر الوطني الحالية، بما فيها ما يفوق الأربعمائة الف من النازحين(ات) واللاجئين(ات) داخل المعسكرات. وكما نتعلم من حليمة كيقا على مدي المقابلة المرفقة ماعجزت في إستيعابه مؤسسات حقوق الإنسان المحلية والعالمية والمجتمع الدولي طيلة أزمة دارفور، تعلمنا حليمة كيقا أن العدالة والسلام، بما فيها إستقرار الأوضاع الإنسانية، لا يمكن لهما التحقق إلا في تتداخلهما وترابطبهما الوثيق وإعتمادهما المتببادل. فتحقيق السلام، وتحسين الأوضاع الإنسانية دون محاسبة من تسبب في تدهورها يعتبر مضيعة للوقت والجهد، وتعميق لأزمتي العدالة والوضع الإنساني وإطالة أمدهما. ومع دخول الكارثة الإنسانية شهرها السابع في منطقة جنوب كردفان، والرابع في النيل الأزرق، يستمر حزب المؤتمر الوطني في إستخدام الغذاء كسلاح في حروبه ضد مواطنيه، مهدداً بمجاعة وشيكة خلال أقل من شهرين من الأن، وذلك بمعنه المتعمد لوكالات العون الإنساني من الوصول للمتضررين، ليؤكد على سجله في إرتكاب الجرائم الجسيمة، خاصة وان منع وصول الغذاء والدواء والمأوى لضحايا الحروب تشكل في ذاتها جرائم حرب. تضم المجموعة السودانية للديمقراطية اولاً صوتها وبشدة الى صوت حليمة كيقا في الفيديو المرفق، وتدعو المجتمع الدولي الى التعامل مع الازمة الإنسانية في مناطق جنوب كردفان والنيل الأزرق بالجدية الكافية، قبل دخول المنطقتين في مرحلة المجاعة الكاملة خلال مارس القادم، وعدم الرضوخ للإبتزاز وتضيع الوقت الذي يمارسه بحنكة حزب المؤتمر الوطني خلال خبرتهم الطويلة في إبتزاز المجتمع الدولي خلال الأزمة الإنسانية الجارية بدارفور. وتدعو مجموعة الديمقراطية اولاً، في هذا السياق، لممارسة الضغوط الكافية على السلطة الحاكمة في الخرطوم وعلى الحركة الشعبية لتحرير السودان الشمالي لتوقيع إتفاق ثلاثي يضمهما معاً الى جانب هئية الأممالمتحدة لضمان وصول الإغاثات العاجلة ودون تأخير. وفي حالة تعذر ذلك تدعو المجموعة السودانية للديمقراطية أولاً المجتمع الدولي الى تبني خيارات التدخل المباشر لتأمين الوضع الإنساني ووصول الإغاثات دون مزيد تعطيل، أياً كانت مواقف وردود أفعال حزب المؤتمر الوطني في الخرطوم. وكما تدعو بإلحاح في الفيديو المرفق حليمة كيقا الى ضرورة محاسبة ومحاكمة من تسبب في معاناتها الحالية المستمرة، مسمية للرئيس عمر البشير على رأسهم، ندعو كذلك في المجموعة السودانية للديمقراطية أولاً، وبذات الإلحاح، بضرورة تعامل المجتمع الدولي بالجدية الكافية مع جرائم الإنتهاكات الجسيمة المؤثقة من قبل منظمات حقوق الإنسان المحلية والدولية، والتي ترقي في فداحتها وضخامة عدد المتضررين(ات) فيها الى جرائم التطهير العرقي والجرائم ضد الإنسانية. وعليه ندعو بشدة الى ضرورة تشكيل وإيفاد بعثات دولية لتقصي الحقائق حول تلك الجرائم. وما ينطبق في طرق التعامل مع الأوضاع الإنسانية المتدهورة في المنطقتين وضرورة معالجتها، يدعونا أيضاً بان نطالب المجتمع الدولي ومؤسسات العدالة الدولية والإقليمية الى تبني مختلف الخيارات في التعامل مع جرائم إنتهاكات حقوق الإنسان، بما فيها إيفاد بعثات تقصي الحقائق الى مناطق النزوج واللجوء والإستماع الجاد لما تقوله حليمة كيقا وغيرها من عشرات الآلاف مثلها من الضحايا الناجيين من النساء والأطفال والشيوخ والرجال. ولنستمع سوياً لما تقوله حليمه كيقا هنا: “إسمي حليمة كيقا، انا جيت من كاتشا يوم 25 تسعة وهسع في معسكر إيديا هنا. وليوم الليلة بعد ما جينا إيديا هنا نحن تعبانين، تعبانين شديد لانو الطيارة ما ريحتنا، عمر (البشير) دا ماريحتنا بطيارات بتاعتو دا. نحن ما ابينا الشكلة، ما الشكلة دا اصلو مستمر، لكن بالطيارات دا، النوبة ديل اصلو ذنبهم شنو؟ هسع نحن تعبانين في الغابة دا مع عيالنا الصغار، وجعانين. والامم المتحدة بياكل فينا لكن عمر لسع بيجري بورانا بيدقنا بالطيارات. الزول دا ( عمر البشير) نحن ذنبنا شنو، نحن النوبة ديل، نحن دايرين حقنا منو بالتي سمح، إلا داير يدقنا بالطيرات حقو. عمر دا انا غضبان منو شديد. وأي زول لو متابع لشغله، عليكم الله عمر( البشير) دا أمسكو، أمسكو وحاسبو... يا هو نحن النوبة ديل مساكين ساكت، دايرين ناكل ساكت وهو (عمر البشير) داير يدقنا بالطايرة، نحن ذنبنا شنو ياخ! نحنا جرينا بعيالنا الصغار وفي عجائز هسع خليناهم في البيوت وما في زول بيديهم موية، ومافي زول بيديهم أكل، والناس بيموتوا في الشارع عطشانين وجعانين، دا بسبب منو؟ بسببو هو ( عمر البشير) لانو نحن دايرين حقنا منو وما داير يدينا ليه، وداير يدقنا وداير يقتلنا! أنا زعلان من عمر (البشير) دا. محكمة جنائية دا خلي يمسك عمر دا.. يحاسبوا. أولاد النوبة دا ماتوا ساكت ما عرفنا سبب عشان شنو، عيال ماتوا ساكت ما عرفنا بسبب شنو؟ نحن العجايز ماشين ساي وميتين في الشوارع، ماشين اربع وعشرين ساعة، ما عرفنا بسبب شنو؟ يعني بسبب نحنا دايرين حقنا؟ عمر دا انا دايرة يمسكوه.... يحاسبوه! نوبة ديل ذنبهم شنو؟ نحن قاعدين هنا دا السقط معانا، وشنو معانا، وهسع الحمدلله خواجة وقف معانا. إذا كان هم لسع مستمرين في الحرب وجونا لغاية محل قعدتنا هنا دا، انا داير ناسنا دا يلموهم نمشي محل سمح نحن نمشي قدام، كان نلحق سلفاكير ذاتو انا نلحق بالناس، انا داير نمشي بس... ما دايرين نقعد هنا طيارة كل يوم في الصباح يجي (نيي نيي نيي...) فوق راسنا دا... ذنبنا شنو؟ كان رجال في محل شكلة معليش، لكن المساكين والعجايز والأتايم والعيال الصغار أرواح دا، هو داير بيهم شنو؟ يمشي يشوف محل الرجال المعاهه، نحنا ذنبنا شنو النساوين الداير يكتلنا دا. ولا في مرا عندو سلاح ولا مرا عندو عدو، بس يخلي محل الرجال ويجي يدق مواطنين... أنا دايرة عمر دا يحاسبوه. محكمة بتاع جنائية جاري منو دا، أنا إسمي حليمة كيقا سبن دايره عمر (البشير) دا يمسكوه ويحاسبوه. أنا بقيف وبقول له (عمر البشير) أنا دايره حقي. نحنا مظلومين، مظلومين ولا لاقين قروش ولا لاقين اكل وحفيانين وعريانين وعيانين، وما لاقين تنمية من شغلوه. هو (عمر البشير) بيشتغل لمصلحة أهلوا في الشمالية هناك، شغال لمنو؟ ناس الخرطوم ذاتا القالوا تابعين ليه وتعبانين وراه، بياكلوا كرتة وبياكلوا في الكوشة، وبيلموا وبيشتغلوا، وزول داير يشتغل كويس بيطردوه وما بيدوه الماهية بتاعتو. هم فايدتهم شنو؟ نحن ما عندنا أي فايدة بوراهم! أنا بس دايره عمر (البشير) دا يمسكوه... يحاسبوه.. في محاكم جنائية دا. والله لو خلوه أنا ذاتي ما بعفي ليهم! شوف أنا مظلومه. كراعي دا من اربع وتسعين طلقة عوقني في كراعي وانا ليوم الليلة جري في الأرض دا. كان عمري ماشي لاتنين وتلاتين سنة انا جاري في الارض دا. انا حقي دا ضيعتو... ولدتا عيال وعيالي ليوم الليلة دا ما لقى راحة، انا أمهم دا ما لقيت راحة.... انتو عمر (البشير) دا دايرين بيه شنو؟ دايرين تربوه! هو غنماية هو؟ أمسكوه واحكموه في محكمة جنائية دا وما تخلوا... دا كلام بتاعي انا دا. انا زعلانه عشان مظلومه. لا عندي سرير وقاعده في مشمعات في الخلاء، قاعدة جعانة وباعوضه فيني... بسبب نفر واحد يدمر الدنيا دا!!! انتم دايرين بيه شنو؟ امسكوه انا دايرة عمر دا يحاسبوه في المحكمة الجنائية. ولو الناس دا عفا عنه انا ما دايره اعفا من عمر دا. ذي ما مسكوا صدام ومسكوا رئيس بتاع هناي دا، أوباما يمسك عمر دا ويحاسبو لينا. نحنا مظلومين، ولا عندنا حاجة سمح ولا قاعدين كويسين. ديل كلهم ناس ميتين في الغابة دا بسبب عمر (البشير)، ليه؟ النوبة دا ناس مساكين ساكت ذنبهم شنو وعيالهم الصغار ديل؟ انا دايرا عمر دا يحاسبوه. الدول دي ما تخلي عمر دا. انا لو جابوه وقف قدام هنا انا بوريه، انا ما بخاف، بخاف من الله بس. مما مكن نفر واحد بس يدمر ألآف، ليه؟ انتم دايرين بيه شنو؟ دايرين تربوه ذي غنامية جايين يضبحوه؟ امسكوه... اقتلوه...عشان الجاي وراه بكره داير يمسك سلطة ما يبقى زيه! يبقى زول دغري ويقسم لينا عدالة في النص... دا كلام بتاعي صغير بس... شكراً *** المجموعة السودانية للديمقراطية أولاً: تحالف عريض من الديموقراطيين، نساء ورجال، يضم النشطاء والمجتمع الأكاديمي، والنقابيون والنازحين(ات) والفاعلين(ات) سياسياً من مختلف المناطق والخلفيات الجغرافية والثقافية في السودان. وتهدف المجموعة بصورة رئيسية الى إيصال صوت الأغلبية الصامتة من السودانيين(ات) حول قضايا الديمقراطية وترابطها الوثيق مع قضايا السلام والعدالة والتنمية. وتعمل المجموعة بإرتباط وتنسيق وثيق مع المبادرات الديمقراطية المستقلة المختلفة، فضلاً عن المجتمع المدني الستقل. الملخص الأسبوعي من المجموعة السودانية للديموقراطية أولاً يقدم تجميع وتحليل لمجموعة من التطورات الخاصة بقضايا الديمقراطية والعدالة والسلام وحقوق الإنسان كل أسبوع. للمزيد من المعلومات والتقارير حول المجموعة السودانية للديمقراطية أولاً الرجاء زيارة http://democracygroup.blogspot.com
