تقف الكلمات عاجزة عن التعبير من هول الصدمة، ووقع الفاجعة التى ألمت بنا بهذا الفقد الجلل. إن إستشهاد الشاعر الوطني الفذ، شاعر الغلابة و المساكين، المرحوم محمد الحسن سالم “حميد" يشكل علامة فارقة فى تاريخ الفن السوداني عموما، وفى تاريخ شعره وأشعاره على وجه الخصوص. وبإستشهاد هذا المناضل الوطني الغيور يكون بالفعل قد إستشهد السودان. أسأل الله الرحيم الغفور أن يجعل قبره روضة من رياض الجنة، وأن يحسن إليه بقدر ما قدم لوطنه من مآثر ستظل محفورة فى وجدان الشعب السوداني الى الأبد. آآآمين . دموع الدم يوم حدت طرابيل نوري والبركل علي حميد حزنا لي فراقو شديد هو راجلن مو هوين عاد راجلن كان بيسوى جبل ... جمل الشيل قلبو يميل محل ما قلوب الغلابة تميل يطربوا لى غناهو الكان مشحون بي تمر ونخيل وده التريان بى موية النيل ويشلع زي بريقن شال للمسكين يضوي الليل ... قليبو يميل... مع التربال.. والواسوق مع العتاله.. جوا السوق يكابس بالنهار والليل كايس لي حصانو علوق مع الأيتام.... يساسق الليل نهارو يحوم فشان فد حق وخليك من تكون دي حقوق ... هو كان ضكران قدام الصفوف تلقاهو ماهو جبان... بى حب القلوب مزدان هو كان فارس... يمين من أشجع الفرسان ... فارس الكلمة مافي كلام يوم كان النضم ممنوع يقيف فى الحلي... وسط الحلي... يقول آ ناس... تعالوا هني... خلونا النحارب الجوع ... يمين بالله زي حميد ما شفناهو فى الأزمان من ترهاقا... وكل جدودنا ناس عبد الفضيل الماظ يوم كان البلد ودران ... فى صف النضال تلقاهو متقدم دوام متصدي للكيزان آ زينوبة ولدك كان يمين من أشجع الفرسان هو فارس الحوبة مافي كلام يوم يتحرر السودان ... فى دروب النضال مارق يوم جانا الخبر حزنان قام من نوري للخرتوم فى صبحن دقش عجلان مو عارف القدر راجيهو قبال يدخل أم درمان ما إستشهدت إنتا براك يمين إستشهد السودان ... جسمو هناك مع الميتين جدودنا الكانوا حراس دين هن فوق الجبال باينين ود الكرسني المعروف وداك ود حاج... وحاج الماحي قام من قبرو قال آ زول... تعال بى جاي... تعال إتوسط الزينين ... وشيخ حميد قعد وسط أهلو ماهو غريب... نهارو مديح... ليلو دليب... ... هو من ولدوهو فى الخلوه حافظ لى أصول الدين مشايخ نوري والبركل سارو السر... طول الليل هو يتهجد وينده ربو... فى التلت الأخير لليل فشان ما ينظلم مسكين ... كلو منانا كان حميد يحضر من جريف نوري فشان الزفة فى أم درمان يوم تتكامل الرايات وكل زول بي هناك عجلان يوم تتحرر الأوطان يوم يتحرر السودان يومت يسقطوا الكيزان ... يمرقوا الناس كبار وصغار رجال ونسوان وكل زول ماشي يتلفت يسأل نفسو وين حميد؟! وينو الفارس المغوار؟! وينو الدخري يا ربي؟! البيعمر الأوطان ... يوم داك الوطن يبكيك يوم تمطر سما السودان يوم تمطر عمارن أسودن بلحيل بدل مويتن تفيض بالنيل فشان حيرانا للألواح تقوم وتشيل.. ويكتبوا بالعمار أشعار كلامن جايي من حميد للشبان أمسكوا شديد... لا تفريط.. ولا تهديد لا دبابة لا دوشكي فشان يتعمر السودان ... فشان تتعمر الأوطان لى ناسن عزاز وحنان ساكنين فى بلد منكوب ساكنين فى بلد منهوب هن فرسان يشقوا الصي لكين أمرهم مغلوب ... يا حميد... يوم داك الوطن يبكيك تبكيك النخيل والخيل تبكيك الجروف والنيل وشجرة المنقة تابا تشيل تجري دموعا زي الدم تخالت لي دموع قنديل ... وشوف يا شيخنا ود سالم مهما سالت الأحزان وشقيش الدموع بتسيل ما بتغسل وجع أوطان وطن مفجوع... وطنن كان... رافع راسنا من أزمان محل ما نمشي وسط الناس نقيف ونقول... شوفوا وطنا ده السودان وطن شامخ... وطن ود عز... قبال يمسكوا الكيزان 21/3/2012م
