شهر كريم ما بجي تاني إلا بعد سنة لو ربنا أحيانا والسعيد هو من يحضر رمضان الجاي عشان يعالج فيهو سلبيات صيامه في رمضان ده وعشان نكثف العبادة كما ينبغي أن تكون وعشان نتقرب من الله كثيراً أيها الناس الله سبحانه وتعالى خلقنا في المقام الاول لنعبد ومن بعد ذلك تأتي بقية الاشياء الاساس هو العبادة يعني يفترض ان لا تأخذنا امور الدنيا عن العبادة نسأل الله ان يتقبل منا رمضان هذا وان يجعلنا من المعتوقين وان يبلغنا رمضان القادم قادرين على صيامه وقيامه على الوجه الاكمل المهم الاتحاد الافريقي لا يحترم قدسياتنا ولا دياناتنا ولا يعتبرها شأنه شأن الاتحاد الدولي وحقو نبقى ناس واضحين كل الدول الاسلامية تطالب بلعب التنافس اثناء رمضان بعد الافطار فليس من المعقول ان يلعب الناس وهم صائمون وليس من المعقول ان يفطروا لاجل تنافس رياضي واذا تمسكنا بالحتة دي صدقوني الاتحاد الدولي والافريقي والآسيوي كلهم سيستجيبوا غصباً عنهم صاغرين ما كتر خيرهم وحقو اتحادنا يتبنى الفكرة دي المهم هناك من رخص الافطار للاعبي الهلال ونعوذ بالله من ان نفتي في امور خطيرة كهذه ولكن حسب علمنا المتواضع خلقنا لنعبد ولم نخلق لنأجل العبادات لامور دنيوية المهم مسعود اوزيل لعب بعض مباريات كأس العالم وهو صائم وحارس الجزائر كذلك وكل منتخب البوسنة وغيرهم من اللاعبين المسلمين في المنتخبات الاخرى فاذا اوزيل لعب صائماً البفطر خليفة وفداسي شنو ؟؟؟ خليكم واعين شويه ناس اذا كان الريس حارس الجزائر يستبسل وهو صائم معز محجوب البفطروا شنو؟؟؟ ويفطروا لي شنو ؟؟؟ وهل في افطارهم ضمان للانتصار ؟؟؟ انا شايف مافي داعي للافطار البقت بقت وعشان ما تبقى ميتة وخراب ديار حقو الناس تمسك في الله قوي ورخصة الافطار ما بدوها في مكتب المرور اها إعدادنا يسير بصورة جيدة وبقليل من الصبر نتطور ونبني الفريق الذي نحلم به وده دور الجماهير ومباراتنا ضد اهلي شندي امتحان نتيجته تبين وصلنا وين متأكد تماماً اذا طمنا اولادنا وشجعناهم سننتصر على اهلي شندي بسهولة ففارق العمر بين حمودة بشير ومجدي كفارق المسافة بين السماء والارض ولا خوف علينا طالما في محاورنا ايمن وعلولو وباسكال وطالما في حراسة المرمى اليوغندي وطالما امير بلعب بدون استهتار وطالما الجمهور يقف بقوة خلف الفريق ايها الناس كلنا في الاستاد من بدري من نخت كباية الحلو مر المهم الجو اليومين دي جميل والسرير التاني برد شديييييييييييد وحلاة النومة يوم الوقفة بره في الحوش هبوبك يا الله ويا بخت البرازيل هزيمتها من المانيا سننساها سريعاً جينيس سيسجل رقماً جديداً في موسوعته ايها الناس إن تنصروا الله ينصركم أها نجي لي شمارات والي الخرتوم كان شفت يا والينا رمضان دخل العضم والناس دخلت السوق لقينا رمضان في العضم أبرد من الزول في السوق السوق السنة دي للفرجة يا والينا رفعتوا المحروقات ورفعوا الملبوسات واصبحت فرحة العيد معنوية فقط يا والينا سلك كهربا ننساك كيف والسوق السنة دي إلا تدخلوا ماشي ساي والى لقاء سلك
