فضفضة (الجمعة) سعد الدين ابراهيم نبدأ الفضفضة برسالة الصديق "محمد عثمان كجك" والتي يقول فيها:- السلام عليكم يا استأذنا الرائع وأصدقاء الفضفضة الرائعين.. إليكم بعض المعلومات عن التجاهل:- التجاهل وقت الغضب ذكاء، التجاهل وقت الإساءة تعقل، التجاهل وقت المصاعب إصرار، التجاهل وقت النصيحة غرور، فاحذر متى تتجاهل ! الصديقة "ليلى الوسيلة" تقول في رسالتها:- ابنتي "أمل أبو القاسم" تحية عطرة أن تصدر حروفك تدعو ل (تعقل لابد منه في الطلاق) تحسب لعقلك الواعي رغم صغر سنك وقلة تجاربك.. (وبينما يمضي الوقت) بنا أصدقك القول بأن الأمهات أو الأخوات أو النساء اللائي تجاوزن غضب الأزواج وحافظن على بيت الزوجية طلقن (كرامتهن) بالفعل حفاظاً على الكيان، لأن من يتفوه بكلمة الطلاق في كل كبيرة أو صغيرة يكون سلبها منها. الصديق "إسماعيل الجعلي" أرسل مسداراً يقول فيه:- في الزمن الجميل الناس كان بقولوا المسامح زول كريم والتسامح كان طبيعي لأنو نادر تلقى بين الناس لئيم.. وكانت حياتن جد بسيطة وبالرضا والقناعة ديمة عايشين في نعيم وهسه في زمن الخداع والاحتيال بقى المسامح زول غشيم. أرسل الأخ "الهادي محمد" من النيل الأبيض (تكسبون الأحامدة) رسالة يقول فيها:- أخي الأستاذ "سعد" السلام عليكم قد انقطعت عنكم بسبب مرض الوالد له الرحمة والمغفرة واليوم قد طالعت عمودكم الجميل ود الشواطين والمدير جد أعجبت به شديد، لأني أتابع ما تكتبه بهمه أستاذي الجليل . أرسل الصديق "حسن محمد صالح" (شقي شقي) رسالته تقول:- لماذا لا نستفيد من الطاقة الشمسية!؟ في توليد الكهرباء؟؟ هذا المورد الكبير والمتاح للطاقة بدون أي عوائق مهمل تماماً ! أين علماؤنا ! أين مركز أبحاث الطاقة؟ كم تقدير ما يوفر إذا استغلت هذه الطاقة للتشغيل. الصديقة "أميرة فيصل المبارك" (زيتونة) تقول في رسالتها :- السلام عليكم أستاذي الفضيل عندنا في العامية السودانية كلمات نفهما برانا ليها مدلولات تخصنا زي كلمة (ساكت) أو (ساي) كما ذكرت .. عندنا قريبتنا تشير بكلمة (الحاجة دي مثلاً من زمن أسكت) معناها قديمة شديد. من مختاراتي :- قبل أسبوع قرأت خبراً عن فتى وفتاة من مدينة ود مدني شباب (زي الورد) أقاما حفل زواجهما وعقد قرانهما بطريقة مبسطة جداً دون تكاليف باهظة وضربا مثلاً للشباب يحتذى به في مكافحة غلاء المهور والبذخ والإسراف في حفلات الزواج أهديهما هذه القصيدة التي قد تشبههما تماماً ولد وبت ولد وبت ماسكين بعض يختالوا في عز الصبا طايرين على صدر الأرض والأرض بيهم معجبة كده بسحروكم يا شباب حلوين كده ورايعين كده الريدة وصلت للسحاب بيكم تقول الحب بدا قدلة ثقة وملمح تقى ودر مخاوفي وبددا في جيل جديد واعي وعنيد دغري وشديد وقلب حديد طالع على الغد سنبله عارف يحل المسأله ويبدى ويعيد
بت من عصير البهجة تطرح برتكان ود من أحاجي بلدنا عامل مهرجان ود النمير فاطنة أم ضمير بالريدة واشتعل المكان اتفضلوا..على حجرة في ركن القلب استعجلوا .. خلونا نتناسى الغلب ألم البعاد جرح الوداد بكره الجميلة بتقترب اتماسكوا خلوا الايدين قابضات سوا اتوالفو خلو الأمل يبقى الدوا ده شباب جميل راقي ونبيل عارف تفاصيل الهوى ولد وبت مارقين من العادي ورتيب ولد وبت عاصرين على موسم خصيب رامين هنا وما ضل دليب راسخين سنا وموكب مهيب ولد وبت..إن شاء الله يا حظ ما تخيب.
