معدودة أيّامنا وقت الرحيل مجهول.. تشرق شمس يومنا خصماً على المأمول في سكة الأفراح.. أو سكة الأحزان قدرك بجيك يازول!! ونعيشها أحلامنا.. يتحقق المعقول ونستنى يوم باكر.. وجايز يفوت الحول ما تنفرج كُربة! مطر الفرج ممطول!! وقت الرحيل مجهول!! {{{ وبين صرخة الميلاد وبين صرخة الأحزان.. معدودة أيامك محسوبة يا إنسان .. ما تشيلك الغفلة يمكن تجيك الآن ساعة الرحيل وتفوت.. ساكت بلا استئذان وآ حسرتك يا زول.. لو دفترك خسران!! ما تلقى ليك حسنات.. بترجح الميزان حُسن الخواتم خير.. أحسن تكون ربحان!! {{{ ساعات تجيك لحظات.. تنسى الوداع والموت وساعات تجيك أيّام.. تتمنى هسّه تفوت وساعات تكون محتار.. وصدرك يكون مكبوت ما كل شيء جايز.. وكل حي بيموت ونقوم من الأجداث.. والبعث عندو شروط وساعة الحساب بتجيك.. في عظمة الملكوت ومن هيبة الموقف.. كل الخليقة سكوت!! {{{ والبشرى للموعود.. بي جنة الرضوان غادر حياتو نضيف.. لا ذنب لا أدران عبر الصراط بسراع.. مبسوط وجد فرحان لاقو الملايكة صفوف.. هنوهو بالغفران حمد الإله كبّر.. واتفيّأ الأفنان وزفوا الحواري العين.. وحاطوه كم ولدان من كل مشروب ضاق.. رويان وما ظمآن عمر الحياة قصير.. لو قسنا بالأزمان والرحلة مهما تطول.. بتقيف وليها أوان في كل يوم يرحل.. واحد من الخلان ودعنا يوم "وردي".. وكان قبلو فات "زيدان".. و"كسلاوي" قبل ايَّام.. قبرنا في أمدرمان والقايمة ماشة تطول.. مليانة بالحبّان يا ربي دورنا متين؟! باكر!! وللاّ الآن؟! {{{ من نعمة الرحمن.. السلوى والنسيان موت الفجاءة يجي.. وما كان على الحسبان تتعدد أسبابو.. وفي الحال يجيك ضمان سبحانو رب الكون.. القادر الديّان خلق الحياة والموت.. وكرم بني الإنسان أدَّاه الخلافة دهور.. شان يوزن الميزان لكنو أسرف زاد وصبح حسّير ندمان.. {{{ وحضرنا كم دافنة.. ليه ما بجينا الخوف؟! وليه ما نعيش يومنا.. بالحُسنى والمعروف؟! ناكل في بعضينا.. يوماتي وهسة بشوف ننهش في لحم الناس.. نعزف ندق في دفوف وهديك أوزارنا.. مرصوصة مالية رفوف وحسناتنا في نقصان.. عريان وخاوي الجوف ود اللحد راجيك.. ليه ما بتعرف الخوف؟! {{{ لو ذرة من معروف.. بترجح الميزان أبداهو عمل الخير.. أبداهو منّ الآن شان ينصلح حالك.. وللآخرة تمشي أمان تسعد في دنياك.. والجنة تبقى ضمان الخير مشتت قُوم.. لملم وتب عجلان أبسط إيديك راحم.. أهلك وكُل عدمان ولمن يتم يومك.. ترتاح تنوم فرحان {{{ شايل القلم تكتب.. تختار في سقط القول وتسوِّد الصفحات.. تملاها عرض وطول تنهش في عرض الناس.. بهتان وقيعة وزور استنى للراجيك!! يوم الحساب والهول وتشوف كتابك شين.. وتقول: ده ما معقول هناك غلاط مافي.. ولا في شيء مستور سطر حروف الخير.. قلمك بكون مقبول {{{ واتولى أمر الناس.. لا جاه ولا سلطان وشيل عظمة التكليف.. لي خدمة الإنسان وأكل حلال طيب.. لا زيادة لا نقصان بتعمّر الدنيا.. وبعدين تكون ربحان وافهم هدى المعصوم.. واتدبر القرآن خليهو منهج ليك.. دايماً في أي مكان تشلع تبق زي نور.. مغسول من الأدران
