}الأزمات دي كلها كوم والطاقة السلبية ال عشعشت جوانا كوم تاني.. فنسأل الله السلامة والابتسامة.. والله جد.. …. }الحقيقة أي بت أو قل معظم البنات عند الواحدة منهن فريق بحث جنائي مكون من صديقاتها المقربات.. عاملين قروب واتساب صغير كدا مع بعض (تحس إنو صندوق ضبط مواقف وكلمات) عندما تتعرض لموقف أو مكالمة استثنائية.. مكالمة تحديد مصير.. مكالمة صلح.. مكالمة زعل.. بتوريهم الحاصل بي حذافيرو وهم بحللوا.. يشرحن ليك الكلمات دي تشريح بناتي دقيق.. الجملة دي في امتحان العربي.. في الإعراب ما بتأملنها كدا.. تحليل يحير إبليس وأولياءه.. ويسألنها (قال ليك مشتاق ليك ولا قال ليك مشتاقين)؟! عشان بتفرق كتير.. مشتاقين بثبوت النون.. المهم دايرة أقول ليك فريق البحث الجنائي البناتي دا خطير وخطر.. والله جد.. ……. }في أصحاب بخلوك تعرف أي معلومة عن أي شخص بدون أي سؤال وبدون أي مجهود.. بخلوا ليك راسك دا عبارة عن دواليب لجنة التقديم.. والله جد.. }تتجاوز حاجات كتيرة وتتغاضى عن حاجات أكتر وتمسك حبال الود لمن يدينك يتجرحن وفي النهاية يجوا يطلعوك ما بتقدر.. عجبني ليك.. ……. } طال الحديثُ عليكُم أيها السُمَّرُ ولاح للنوم في أجفانكم أثرُ وذلك الليلُ قد ضاعت رواحلهُ فليس يُرجى لهُ من بعدها سفرُ هل يُنكِرُ النومَ جفنٌ لو أتيحِ له إلا أنا ونجومُ الليلِ والقمرُ أبيتُ أسأل نفسي كيف قاطعني هذا الصديقُ ومالي عنه مُصطبرُ (قالها حافظ إبراهيم.. وقالت له حبوبة جيرانا أساساً يتم تفعيل السهر بالتساؤلات).. أتفرجتوا؟! مرتبط
