أهدي هذا إلى جميع الأمهات بمناسبة عيد الأم استجابة لطلب بعض الأصدقاء وقد حظي هذا النص في جزئه الأول بالغناء. وقد حظي الفنان الراحل المقيم “عبد العزيز” بالجزء الأول من القصيدة المعرف باسم (جواب للبلد) والجزء الأخير صدح به الفنان الصديق “كمال ترباس” (جواب للبلد)، ضل الضحى الرامي وشمس شتوية دفاية، وريحة البن لما يفوح في قلاية وفروة جدّي، صورة جدّي لمن جيت أمد يدّي ( جدّي أديني تعريفه) ( بتقرأ الحمدو يا المبروك) ( بقراها شان تعريفة ألقاها) بجود في القراية كمان وأيه يا يُمّة، والله زمان وسبحة ( بنت الفكى) والطورية والواسوق، وسعف حبوبة والكورية والحنقوق وصورة سعدية بت جيرانا وصورة عرفة لما تخمج الدلوكة غناية وحبة فريك لموه لي رمضان، مصرور في مخلاية صور محفورة جوايا ومن يوم داك ولي الليلة ولي بكرة وبعد باكر شان الزمن غدار وما معروف زمن مكار زمانا كلو خوف في خوف. وأيه يا يُمّة والله زمان مشتاق يُمّة لى ملاح النعيمية وريحة صاجك المحروق ولما تسوي طعمية وغباشة روب وعنزة حلوب بدور أرجع أجيكى هناك ضاقت بيه يا يُمّة هنا بدور أتمسى بعيونك وأصابحك يا حبيبتي أنا صباح الخير على عيونك أتاري الدنيا من دونك شينة ومرة ما بتندار ومرة مرارة يا يُمّة دي مرة وحارّة زي النار ولو بتدوري أحكيلك كيف أحوالي في البندر من وين عايزة أبدالك من وين أبدا بس من وين موشيتاً غريب وعجيب ده شيتاً كلو شين في شين هنا الزول العديل ونصيح وحاتك إنت يا الغالية بعيش حياتو يوماتي بي وشين وزولتي الحتى حبّيتها لقيتها براي تحب زولين وأيه يا يُمّة والله زمان دي قشة عيني من النوم معاي بشيل هموم باكر قبل ما أشيل هموم اليوم أخطها خطواتي الأولى أعدي الباب تبدا تدق طبول الهم خواطر تذهل الألباب واقابلك يا شوارع الجن وفي جوايا حاجة تئن أشد وتر الحزن وأعرف تموت غنواتي يا يُمّة ويخنقني الغنا وأنزف وتنتر في العروق حمى صور تنزاح وتتلم وتاني وتالت آ يُمّة وأشوفك بي خيال حالم تشاوري وترقص السبحة ملامح العابد الصايم تشع فوق جبهتك سمحة وشييك يحاكي ضي النور مزدان يُمّة في الطرحة وتبسمي لي أمدّ إيدي الحلم وأصحى ويدفق عرق مالح ويسكن فيني كل الهم وأشم ريحة ندم جارح وأرفس زي بخارج الروح وزي عصفورة منجرحة فارقت الفضاء البارح وتاني وتالت آ يُمّة وهم كل المداين وهم وهم غرقانة في زخم الحضارة حضارة بتحصد الإنسان وتزرع في مكانه نغم وقصد القول يا شايل اللوم ويا ما جابني للبندر وحاتك إنتي يا الغالية ده يوماً شوم والا بنسى الخجل من راسي لي كرعي شايلو وأحوم وهادي الحالة في الخرتوم زي عايش شقي ومهموم 0 أمي الله يسلمك ويديكي لي طول العمر وفي الدنيا يوم ما يألمك أمي الله يسلمك أمي يا دار السلام يا حضني لو جار الزمان يا مطمناني بطمنك أمي الله يسلمك خيرك علي بالحيل كتير يا مرضعاني الطيبة بالصبر الجميل يا سعد أيامي وهناي أمي الله يسلمك أنا مهما أفصح عن مشاعري برضو بيخونّي الكلام وقولة بحبك ما بتكفي وكل كلمات الغرام يا منتهى الريد ومبتداه يا لليا الله يسلمك ويديكي لي طول العمر وفي الدنيا يوم ما يألمك أمي الله يسلمك.
