1- كريستي والتون.. قيمة الثروة: (36,7) مليار دولار. وهي من مواليد عام 1955 في أميركا, أرملة جون والتون الذي توفى عام 2005. أها يا ناس اللوتري.. المرا دي راجلها ميت.. شدو حليكم.. وسِنو الحنك.!! 2- ليليان بنتكورت.. قيمة الثروة: (34.5) مليار دولار. وهي من مواليد عام 1922 في فرنسا.. دي غايتو قررررررربت على الحرُكرُك.. غايتو إن بقى عندنا زول في فرنسا اليعافر.. 3- أليس والتون.. قيمة الثروة: (34.3) مليار دولار.. من مواليد عام 1949 في أمريكا. 4- جاكلين مارس.. قيمة الثروة: 20 مليار دولار.. من مواليد عام 1939 في أمريكا.. وهي ابنة فورست مارس بتاع الشكولاتة "مارس" بينتجو 400 مليون قطعة في اليوم. 5- جينا رينهارت.. قيمة الثروة: (17.7) مليار دولار. من مواليد 1954 في أستراليا, وهي تعد أغنى امرأة في أستراليا, حيث أن ثروتها تأتي من مشاريع الفحم والحديد الخام. ناسنا الفي استراليا.. دي شفت صورتها مرا ماااااااكنة ومانعة.. دي اختوها.. لا تلقى قروش ولا تلقى رويحتك.. مرا قدر الهجمة وشغالة في الفحم والحديد.. باقي لكم دي مرة بتتعاشر.!؟ 6- سوزان كلاتين.. قيمة الثروة: (17,4) مليار دولار. من مواليد عام 1962 في ألمانيا. 7- أبيغيل جونسون.. قيمة الثروة: (17,3) مليار دولار. من مواليد عام 1961 في أمريكا.. دي قالو مرا عدييييلة.. وكريمة.. لكن باقي لي، لي حسي ما بتبقى قاعدة بلا راجل. 8- آن كوكس شامبرز.. قيمة الثروة: (15,5) مليار دولار. من مواليد عام 1919 في أمريكا وهي مالكة الشركة الإعلامية (Cox Enterprises) التي ورثتها من والدها جيمس كوكس.. أهااااا يا ناس اللوتري تاني جاتكم.. دي بتبقى خرفّت.. حمم لها كلبها وفسحو.. وخليهو يحبك.. وهي ذاتها دلعها.. اشبكها بيبي بيبي بيبي.. كل بيبي تديك مليار.. خمسطاشر بيبي تلم العندها وتجي راجع بالسلامة.. عشان يلاقوك التماسيح في المطار ويشبكوك انت بيبي بيبي بيبي.. لكن ما تشتغل بهم.!! 9- لورين باول جوبز.. قيمة الثروة: (14) مليار دولار. من مواليد عام 1963 في أمريكا, 10- جوانا كواندت.. قيمة الثروة: (12.8) مليار دولار. من مواليد عام 1926 في ألمانيا, وهي زوجة (هربرت كواندت) وتملك 50٪ من الشركة مع ابنها ستيفيان وابنتها سوزان.. دي باقي لي راجلها حي.. غايتو إن بقى عندنا زول في ألمانيا يصلهم.. ويرقد لهم في الواطا دي ويقول لهم اتبنوني..!! ويخلي بالو طويييييل.. كل مرة يخم واحد يوديهو الحمام.. المصيبة يبقو مخرفين..تشيل واحد في كتفك.. ويشعبط فيك وكل ما تدور تنزلو من كتفك ترقدو، يقعد يبكي.. شيلو واقيف لمن ينوم.. وبراحة ختو فوق سريرو.. المصيبة الأكبر.. تكون شايلهم الاتنين ويابو ينزلو من أكتافك... أطرى البلد دي.. اتحمل.. دي 12 مليار ما لعب.!! غايتو مرا طزيانة من ديل تعرسها وايدك فوق قلبك.. حياتك كلها خايف تطلقك.!! الباب البجيب الريح- صحيفة اليوم التالي
