(9) حكم المباراة تحول من يا (ابوشنب) الى يا (ابومروة) قناة قوون قدمت لنا مباراة القمة متل (التطعيم) شفناها – جرعة – جرعة ، مباراة منقولة كانت بالسيسي """"""""""""""""""""""""""""""""""""" انتوا يا جماعة الكورة دي منقولة بي (عربية باسطة) – دي لو نقلتوها بي (كارو) كان وصلت """"""""""""""""""""""""""""""""""""""""" حكم الراية لو كان وقتها بتابع ليه في (فيلم هندي) في قاعة الصداقة كان يفترض ان يكون قد شاهد اعتداء جمال سالم على مهاجم الهلال الجزولي """"""""""""""""""""""""""""" لو ناس اتحاد الطائرة شاهدوا مباراة القمة امس سوف يختاروا بخيت خميس لمنتخب الطائرة """"""""""""""""""""""""""""""""" عبر قناة قوون لم يتوفر لنا مشاهدة مباراة الهلال والمريخ امس – إلّا بمقدار ، اذ كانت المباراة مثل (التطعيم) يجيبوها لينا جرعة – جرعة. متاوقة. حبة – حبة. كأنها منقولة بالسيسي. منقولة بي (درب) بكسر الدال. طبعا ناس (التطعيم) بظهروا كل (9) شهور مرة. ومباراة القمة امس كانت بتظهر لينا في الشاشة كل فترة – الشوط الاول اظن شفنا فيه (10) دقائق فقط. شحدة بس. انتوا يا جماعة الكورة دي منقولة بي (عربية باسطة) – دي لو نقلتوها بي (كارو) كان وصلت. ولم نشاهد اكتر من (20) دقيقة في الشوط التاني. لن اتحدث عن نقل المباراة في هذه المساحة – لكن اقول ان ما توفر لنا من خلال اللقطات القليلة التى عرضتها لنا القناة وضح لنا الظلم الكبير الذي تعرض له الهلال من حكم المباراة الفاضل ابوشنب. كان في ظل الظلم الذي تعرض له الهلال من خلال اللقطات القليلة التى عرضتها قناة قوون لو خسر الهلال بطولة الممتاز كان يمكن ان تحدث (كارثة). جماهير الهلال حتى وفريقها فاز ببطولة الممتاز البطولة المحببة للهلال – خرجت غاضبة من الملعب. ومع انها في استادها إلّا انها رمت الملعب بالالعاب النارية. اسوأ ما في المباراة ليس هو (اشارة البث) المقطوعة – اسوأ ما في المباراة (الحكام). ديل لا عندهم حاجة اسمها (ضربة جزاء). ولا عندهم (كرت احمر). حاكمين بالجودية. حكم المباراة فشل في ان يصدر اي (قرار) قوى في المباراة – حتى اغرى ذلك لاعبي المريخ ان يفعلوا ما يشاءون. لولا ان الهلال لعب في المباراة ببرود – ولولا ان عمر بخيت ضبط الملعب كان يمكن ان يحدث (ضرب وعك) كتير في المباراة. حكم المباراة لم يكن له وجود إلّا في (ضربة التماس). حتى الضربات الركنية كان حكام المباراة بتحاشوا من احتسباها لصالح الهلال. انتوا قوانينكم الجديدة دي ما فيها (كورنر). ضربة الجزاء خليناها. حالة الطرد سبناها. الكورنر ما عاوزين تحسبوه لينا. رغم اللقطات القليلة التى شاهدناها – وعبر دقائق محدودة – إلّا توفر لنا بصورة واضحة وثبت لكل الناس ان حكم المباراة صرف للهلال (ضربة جزاء) واضحة بعد ان لامس لاعب المريخ بخيت خميس الكورة بيده بصورة لا تحتاج حتى للاعادة. نحن ساعة ونص بنتغالط في (بخيت خميس) فاكرنو (جمال سالم). بخيت خميس من كوستي يا ناس المريخ جبتوه من فريق طايرة. الزول دا يا لاعب (طايرة) – يا لاعب (سلة) – عشان لمسة اليد بتاعتو اوضح من (المحطة الوسطي) ام درمان. اصلو دا ما لاعب كورة قدم. ما في لاعب كورة بلمس الكورة بالصورة دي. نحن لاعب كورة القدم بنعرفو – واضح وظاهر – وبتاع (الطايرة) بنعرفو. لو في شكك في الحتة – بكون في هل بخيت خميس لاعب طايرة ان لاعب سلة. كورة القدم دي مستبعدة تماما منو. ما عندو اي علاقة بالموضوع دا. على العموم لو ناس اتحاد الطايرة شاهدوا مباراة القمة امس سوف يختاروا بخيت خميس لمنتخب الطايرة. واحتمال لو شافوا (اللمسة) يمنحوها كابتنية منتخب الطايرة. هنالك (ضربة جزاء) اخرى ارتبكت مع بشه – نعتبرها مشكوك في صحتها. ما عاوزنها – اصلا نحن متعودين على الحاجات دي من حكام مباريات الهلال. لكن ضربة الجزاء التى ارتكبها لاعب المريخ (البرلوم) بخيت خميس لا تحتاج لها حتى لحكم نص. حكم قاعد في بيتو ممكن يحتسبها. ملامسة بخيت خميس للكورة بيده – يتخيل لي لو المباراة ما كانت منقولة او لو كان البث معطلا كان شفناها. لمسة اليد دي في (الراديو) واضحة. ولا عاوزة ليها (تلفزيون). لكن مع ذلك صرفها الفاضل ابوشنب ولم يحسبها ..وكأن المريخ وقتها استنجد بي (ابومروه) ..فتحول الفاضل من يا ابوشنب الى يا ابومروه. يا ابومروه إلحقني. يا ابومروه انقذني. يا ابومروه ما تحتسب عليّ ضربة جزاء. يا ابومروه ما تحتسب علينا (كورنر). يا ابومروه ما تطرد لينا لاعب. والفاضل سمع الكلام دا – ما قصر الجماعة. حكم المباراة (انقذ) المريخ من خسارة اكيدة وكان فعلا (ابومروه) للمريخ – وهو يخرجهم من خسارة اكيدة. ابو مروه واصل حمايته للمريخ – وتغاضي من طرد حارس المريخ اليوغندي (جمال سالم) الذي اعتدى على مهاجم الهلال صلاح الجزولي – وكان الحكم قريب من الواقعة. وحكم الرأية كان هو الاخر بشاهد في الحالة – لو كان وقتها بتابع ليه في (فيلم هندي) في قاعة الصداقة كان يفترض ان يكون قد شاهد اعتداء جمال سالم على مهاجم الهلال صلاح الجزولي. الطاهر محمد عثمان حاول يخفف على المريخاب – قام قال صلاح الجزولي (متسلل)...وهو قد ثبت الصورة والكورة في السماء. لحظت ضرب الكورة صلاح الجزولي لم يكن متسلل. قول متسلل – هل يعني ذلك ان يضربه الحارس. جمال سالم يضرب – ويقع في الواطة. الطاهر محمد علي حاول يعمل (ترضيات)...قام قال الحكم مفروض يطرد اللاعبين. هذه الوقائع الظاهرة والثابتة والتى شهد بها حتى المريخاب ظهرت لنا في اللحظات القليلة التى قدمتها لنا قناة قوون عن المباراة. ما عارفين باقى المباراة حصل فيها شنو؟. اكيد في كوارث كتيرة حدثت. هنالك اعتداءات اخرى من لاعبي المريخ على لاعبي الهلال – تعامل معها الحكم ب (مسامحك يا حبيبي). اوضح تلك الاعتداءات كان اعتداء راجي عبدالعاطي على مهاجم الهلال بكري المدينة. انت يا ابوشنب اقصد يا ابومروه جايبنكم (تحكيم اهلي) الفاضل (ابومروه) خلانا نقول يا حليل وديدي الفاتح رغم ان الاخر ايضا ظلم الهلال كثيرا. لكن على الاقل وديدي كان يملك من الجرأة ما يجعله يحتسب (ضربة جزاء). وضربة الجزاء التى ارتكبها لاعب المريخ بخيت خميس اوضح حتى من ضربة الجزاء التى احتسبها الحكم لصالح الهلال في قمة كأس السودان. وهي اوضح ايضا من ضربة الجزاء التى احتسبها الحكم في قمة كأس السودان لصالح المريخ. لكن مع كل هذا الظلم الذي تعرض له الهلال – فاز الهلال ببطولته المحببة – وثبت المريخ في مركزه الثابت (وصيفا) للهلال. ..... ملحوظة : نحن الممتاز من تعودنا ليه – بي تعادل نشيلو. هوامش لا سيكافا. ولا كأس السودان. بتمرقكم من (وصافة) الهلال. في النهاية – المريخ (وصيف). رغم سوء النقل وعدم تمكن الناس من مشاهدة المباراة – إلّا ان الزميل خالد ماسا قدم استديو رائع. وكان ماسا من نجوم المباراة. رغم ما حدث من قناة قوون. بالمناسبة لو دي طريقتكم يا ناس قناة قوون ..اقلبوها (راديو). الهلال في هذا الموسم تعاقب عليه (8) مدربين. وكان هناك عدم استقرار فني في الهلال وعان الهلال كثيرا (فنيا). مع ذلك الهلال فاز بالممتاز. البطولة (المحببة). الهلال ايضا في هذا الموسم تعاقب على ادارته (3) مجالس. وكانت هناك انتخابات واستئنافات ..وطعون. مع ذلك فاز الهلال ببطولته المحببة. نحن عندنا محبة خاصة للممتاز. ممكن نفرط في كل شيء إلّا الممتاز. متعودة دائما. يا ربي الوصيف ح يشطب كم لاعب. غايتو الفاضل ابومروه انقذ ليه (7) لاعبين من المريخ من الشطب. مامون ابوشيبة شابكنا ليك بي ضربة جزاء وهمية كانت في سنة 1996. اها يا ابوشيبة بتقول شنو في (العرض) البعمل فيه بخيت خميس. تاني يا ابوشيبة ما اسمعك بتجيب في سيرة ضربة جزاء سنة 1996. عليكم الله سنة 1996 لو حصلت (معركة) بتذكرها – عشان يا مامون ابوشيبة تذكر لينا ضربة جزاء ووهمية كمان. شركة سوداني مفروض تكرم (بخيت خميس). بخيت خميس كان صاحب (اوضح) لمسة ايد في الدوري الممتاز. ساكت كنا شايلنها على سيدي بيه. اشرف الكاردينال يستحق تحية خاصة – وهو يفوز باول بطولة له مع الهلال. الموسم القادم عاوزين الهلال يفوز بكل البطولات – المحلية والخارجية. والخارجية قبل المحلية. كذلك يستحق الفاتح النقر – التحية – فقد عرف كيف يلعب المباراة. اهم حاجة عندنا الممتاز. الوصيف وصيف. عليكم الله في اجمل من كدا. مباراة الهلال والمريخ في الدورة الاولى الحكم نقض لينا هدف (بشه) بحجة تسلل قاطعو من رأسو. ومباراة الهلال والمريخ في الدورة الثانية – الحكم نقض لينا (ضربة جزاء) اوضح من الشمس. ديل يقولوا عليهم شنو عليكم الله. ......... عاجل – بخيت خميس دا دسوه (45) يوم – ما يطلع الشارع. وإن طال السفر - محمد عبد الماجد صحيفة قوون
