تبدأ الخيانة الزوجية حينما يقل اهتمام طرف بالآخر فيشعر ذلك الطرف بالفراغ العاطفي ورويدا رويدا ينخرط احد الطرفين في الخيانة ، احيانا تكون الزوجة منهكة بالاعمال المنزلية وتمني نفسها بجلسة انس وسمر مع زوجها مساء، ولكن يأتي الزوج وهو يدعي الارهاق وينشد الراحة وباختصار ما داير ازعاج، وفي الحقيقة يكون الزوج قد أمضى وقته في العمل مابين القاء نظرة فاحصة على هذه الزميلة ومتابعة تلك بنظراته وربما قفشات ودردشات على الماشي مع احدى الشلابات وده طبعا حال الرجل السوداني وحينما يعود مساء الى منزله يكون قد اكتفى من النظر والحديث وكل شي يعني بيجي شبعاااااان من عينو وجيعااااااان في بطنو وداير يأكل وينوم عشان يقوم الصباح يكرر نفس البرنامج حتى ان كثيرا من الزوجات يشتكين من ان العلاقة اصبحت أداء واجب والسلام ويجأرن من الملل الذي يجتاح العلاقة علما ان مسألة تغيير الروتين وخلق البرامج ليس من ضمن مسئوليات الزوجة لوحدها بل ايضا من مسئوليات الزوج ، وكأني بلسان حال الزوجة يقول (أجيب ليك برنامج من وين ياحبيبي) خاصة وان الكثير من الزوجات يمضين أوقاتهن النهارية مابين النظافة والطباخة ومراعاة الأطفال والغسيل والمكوة وغيره من الخدمات . تكون الزوجة جميلة جدا وانيقة ومهتمة بجمالها وفجأة كدة يظهر ليها واحد زي (قطعة الشيطان) يقوم كدة ويختها هدف في بالو لانها جميلة وذات انوثة طاغية وطبعا الراجل بتكون مسخت ليهو وبقى شايفها عادية جدا وماتنسو رجالنا عندهم مثل بيقول (ما لازم كل يوم فول) في اشارة منهم للملل الذي اصاب علاقاتهم بزوجاتهم . اهاااا قلنا شنو يقوم يشوف زوجتك واحد شفاتي كدة وينظر ليها بعين الاعجاب وهو يعلم تماما انها متزوجة وطبعا مابيكون جادي في الزواج لانه هو ذااااتو يا إما متزوج وشاعر بالملل من زوجتو يا إما أعذب وعايز يعيش اللحظة ويبدأ يزن على ودان المرأة تارة بانها لو كانت زوجتو ماكان حيخليها تتعب كدة ولا كان حيحوجها للحاجة وتلقى مرتو ذااااتها شقيانة اكتر منك وهو ولا معبرها لا وكمان عامل فيها سلطان زمانو وبيملس للمرأة المسكينة مرة لمن يلقاها في صف العيش او في الخضار ولا لمن تمشي الدكان او سايقة الشافع مودياهو المدرسة وهكذا ، المهم بكترة الحنك بيجيب دماغها ويبدأ في علاقة وونسة ودردشة وقد تكون الزوجة بريئة لكن هو ما بريء ونواياه سيئة واحتمال كبير تنصرف الزوجة بكل مشاعرها ليهو وتهمل زوجها فالنفس تميل الى من يدللها ويهتم بها ومن ثم تبدأ المشاكل وغالبا ما تنتهي بالانفصال والبغل الكان سبب الانفصال مابيعرسها ولاشي بس اللهم كان بيعيش اللحظة او كمان يكتشف الزوج خيانة زوجتو والشغلة تطير فوقا رقاب عشان كدة لازم الابواب دي تتقفل من البداية فيا سيدي الزوج اهتم بزوجتك وقدم لها الرعاية الكافية وساعدها وآنس وحدتها وتفقد أحوالها وكن رقيقا مع رفيقة دربك ولا تترك ثغرة للكلاب الضالة .
