يلاّ يا أطفال نغنِّي طلال دفع الله [email protected] ******************* يلاّ يا أطفال نغنِّي للفَقَد عُمراً عِريِّض كسلا بورسودان وكوبر في دَبَك .. شالا .. الأُبيِّض كلو شان باكرنا يصدح بى شموس العِز وِميِّض يلاّ تاني نغني ليهو لوحه من شِعرو النِجيِّض : ( وطن بالفيهو نتساوى نحلم نقرا نتْداوى مساكن كهربا و مويه تِحِتنا الظلمه تتهاوى ) يلاّ نحلم بى وراهو بى عيونو و بى رؤاهو الحِلِم واضح معالم بى وطن آمن مسالم برضو من نشدو الرويِّض : ( مكان الطلقه عصفوره تحلِّق حولَ نافوره و تمازح شُفَّع الروضه ) نظره في أحلامو نقرا وطن واقع نَشيِّد رؤيا رؤيا .. و فكره فكره كان بغنينا النِشَيِّد : ( وطنك والدَينَك و دَينَك و كل قطرة دم من دمك كل نقطة ضو في عينك . في النَّفَس الطالع ونازل تلقاهو محل ما تقبِّل و محل ما تمد إيدينك ) . المعلِّم زاد علمنا شان نقوم الهِمّه واجبه في قرايتنا و عَملنا لو تعبنا الليله .. باكر لينا بتحقَّق أملنا نبني سودانّا الجِديِّد ، بى بسيمتو و ضي كِليمتو ياما ذكَّرنا وشملنا الوطن ضاعت نِسيمتو لما بالحرب إنشغلنا لو نعيش أحباب حِكيمتو عِزه حيرفرف عَلمنا و ياما يتصافن نفوسنا يوم يقود راينا السِّديِّد خطوه خطوه نلاقي مِيسنا كم قَريب يبقى البِعيِّد الوطن في عيونَّا ديمه بالفرح باكر مِعيِّد نحيا بالنيه السليمه فيهو عالمنا الوِحيِّد . الوطن حبة عيونو حبَّ ناسو و خلّى ذاتو البغني رهين سجونو أُغنياتو .. و تبتباتو التمني رحيق لحونو أُمو .. رِفقاتو.. و بناتو شاي صباحو و أمسياتو الغُنا الصاح الوِديِّد لى وطن لا سِيْد .. وسيِّد : ( حبابك .. ياضحى الميلاد و يا وطناً بدون اسياد و يا إنشاد عصافيراً ببالن ما خطر صياد ) . الكميل فخر الكمايل الوطن موية عيونو العديل فارس العمايل حادي شعبو المابخونو النبيل حلو الشمايل لما تتمناك تكونو لو رجع للحق عدوهو قلبو عامر بالمحبه إلا في ساعة الشدايد قلَّ زي مِتلو النِّديِّد . 2004م
