بسم الله الرحمن الرحيم نفتش ليك في حرف السكون والمد وبين الشولة والواو السكن وامتد يقين إيمانا بتجدد ونفتش ليك في حدقات عيون الناس في جلسات شراب الشاي في الهم البزيد واشتد نفتش ليك با الموجودة فايته الحد نفتش ليك في الضحكات في الصرخات في مرسى الخطاوي التائهة تتردد تتوه في مرسى الضياع والضيم وتتأوه من حُرقة هجير الصد بتهرب من وجع لي نار وتنزل في الليالي قِفار ليها ما غنَّت غناوي الشوق ولا همَّاها بالها إروق ولا حزنت عشان تاهت خطاها سنين واسوقني الشوق .. محل خاطر الصبا الروَّح حنين عضم الشليل نوَّح زمان قمر الفريق لوّح ورعشة شهقة الأرض الغِشاها رُشاش تبقى دُعاش تخش الروح ونتأوه تقالد شوقنا والإحساس نساهر الليل نفتش ليك في النجمات وفي الهجعات وفي درب الهوى مرات وفي خلجات رموش ناعسات دخلنا على عِينة العشم تائهين نتحسس مساراتك زادنا حقيبة السفر الطويل والهم .. و أخدنا ندور على زاوية جداراتك مسحنا خدود حدود الليل رفعنا ستار جبينك نور يبين رقراق الأمل والضل ويلوح قمر الأماني أطل نميل بي شوقنا ملهوفين نعرِّش في البوادي تُكل نفوت نركب رجا الأشواق لا قدامنا .. ولا بعد اليقين مسبوق ولا فرس السكون مطلوق محل خاطر الصبا الأيام وحنين عضم الشليل رزَّام وزمان قمر الفريق أحلام ونفتش ما يفوتنا وجه من العابسين من الضاحكين وعند أم الشهيد (قُرقُر) تقيف نظراتنا تتأمل يقينك يا (عفافنا) أمل وهل تقبل ؟! تموت يا قُرقُر الضحكات مع الزمن الردي وأشتر متين يا قُرقُر الأيام تصير وجهاً نفتش ليهو إصحِّي قلوب غشاها سُاكت إنادي النيل يفيض صرخات تهد عرش الطغاة والضيم ويعود ضل الضحى الواسع نقالد ريحة السمر الطويل والبن نرش بالإلفة ساحاتنا وإبقى وطن إفاخر بيك ... * (قُرقُر) اسم شهرة للشهيد أحمد يوسف ممحد عمر ود عفاف بت جدنا عبد الرحمن .. قرية ود النور مدني .. عُروة علي موسى ،،، [email protected]