1- كيف جاءت فكرة هذه المقالة؟!! (أ)- ***- اتصل بي صديق عزيز يقيم في موسكو، وطلب مني ان امده باسم وزير الاستثمار في الحكومة الحالية في الخرطوم، استغربت من سؤاله كثيرآ علي اعتبار سهولة الحصول علي الاسم مباشرة من الانترنيت دون الرجوع الي جهة !!، عندها طرأت عندي فكرة القيام باتصالات مع سودانيين يقيمون داخل السودان وخارجه، لمعرفة نسبة الذين علي دراية ومعرفة باسماء الوزراء ووزراء الدولة ال(74) في الحكومة الحالية التي تشكلت قبل عام؟!!..وهكذا جاءت فكرة المقال. عدد الذين اتصلت بهم كانوا (80) شخص يقيمون في ثلاثة عشر دولة هي:(السودان، المانيا، بريطانيا، روسيا، هولندا، اوكرانيا، النمسا، اليونان، ايطاليا، اسبانيا، امريكا، المجر، مصر). (ب)- ***- عنوان السؤال الذي وجه لكل واحد منهم كان:( هل تعرف اسماء وزير الاستثمار والسياحة والاعلام في الخرطوم؟!!...وايهما اكثر شهرة: هؤلاء الوزراء ام الفنانة ندي القلعة؟!!). 2- كانت حصيلة الاتصالات كالاتي: (أ)- (66) من مشاركين لم يعرفوا اسماء وزراء الاستثمار والسياحة والاعلام. (5) من المشاركين تعرفوا فقط علي اسم وزير الاعلام الدكتور أحمد بلال عثمان. (6) من المشاركين لم يسمعوا اصلآ بوزارة السياحة. (3)- تعرفوا علي اسماء وزراء الاستثمار والسياحة والاعلام. (ب)- كل ال(80) صديق - بلا استثناء-، الذين اتصلت بهم، اكدوا ان الفنانة ندي القلعة هي اكثر شهرة وصيت من وزراء الاستثمار والسياحة والاعلام، بل واكثر شهرة من كل الوزراء ووزراء الدولة. 3- كانت حصيلة التعليقات كالاتي: ******************** (أ)- لا وزير السياحة الحالي، ولا الذين كانوا من قبله نعرف اسماءهم!!.."ندي" بالطبع اشهر بكتير من وزراء هم في الاصل غير موجودين في الواقع المعاش !! (ب)- انا ما بعرف اسماء الوزراء في السودان، لكن بعرف انو ندي القلعة بتدفع ضرائب، والفلوس بتروح جيوب الوزراء!! (ج)- طبعآ "ندوية" اشهر مليون مرة من كل الوزراء، وكمان "قيافة" اكتر من غندور!! (د)- بالغت ياعمي الصايغ، تلم الفنانة الكبيرة ندي صاحبة الجولات في الخارج ورفعت اسم السودان برة، مع وزراء اصلآ ماعندهم اي حس ولا خبر!! (ه)- اكتر وزير مشهور في الحكومة هو بتاع (القطوعات الكهربائية)!! اصلي ما سمعت بوزير للسياحة!! (و)- وزير الاستثمار هو الدكتور مصطفي اسماعيل!! (ز)- رغم ان ندي القلعة عندها الشهرة الكبيرة، الا ان الحكومة تحاربها وترفض ظهورها في التلفزيون، وتعطي الفرص للهواة والمقلدين!!..هي ماشغالة ولا مهتمة بالاعلام الحكومي بتاع الوزير بلال!! (ح)- لابد من تغيير وزراء الاستثمار والسياحة والاعلام لانهم طوال سنة ما قدموا اي انجاز!!، خصوصآ وزير الاعلام ده، ما عنده اي مؤهلات اعلامية وخرب التلفزيون خراب شديد، وخلي الناس تهرب للمحطات الاجنبية!!..حكاية السودان يكون بلد سياحي دي عاوزة اعادة نظر، كيف السودان يكون بلد سياحي وهو ما فيه لا كهرباء ولا مياه شرب صحية؟!!، كيف السائح الاجنبي يقعد في فندق ما فيه كهرباء كيف السائح يجي لبلد ما عنده سعر واضح للدولار؟!!..السائح لو عاوز يزور اي منطقة سياحية خارج الخرطوم لازم ياخذ اذن من جهاز الامن!!...قال بلد سياحي قال!! (ط)- وزير استثمار؟!!، البشير ده بضحك علي الناس ولا شنو؟!!، من سنة 1994 وبنسمع بالاستثمارات، منذ زمن دخول اسامة بن اللادن باستثماراته للسودان وبنسمع بارقام واحصائيات واسماء دول دخلت باستثماراتها المليارية، وين الانجازات؟!!وين المشاريع الاجنبية دي؟!!..وين اختفت اخبار المستثمرين؟!!...ندي القلعة قاعدة تخفف علينا من المصائب ومحن الحزب المطلع دينا!! (ي)- والله والله بالله تلاتة، وزير الاعلام ده هو السبب في رفع "ضغط دم" الملايين، هو السبب في وفاة الاموات من الغيظ!!..الغريبة الناس تموت كمد من سياسته الاعلامية، وهو كل يوم يسمن!!..ارحمونا من الزول ده يا حكومة!! (ك)- لا اعرف اسم وزير السياحة، لكن طالعت في الصحف المحلية عن ارقام كبيرة بالعملات الصعبة، قال وزير السياحة انها من السواح الاجانب!!، لكن حسب ظني، انها ارقام غير حقيقة الهدف منها ان الوزير يرغب في اعلاء شانه حتي لا يقال ان وزارته "فشنك"!!...والله ندي القلعة عندها فلوس اكتر من ميزانية وزارة السياحة!! (ل)- ليه ياعمي الصائغ اخترت وزير الاستثمار والسياحة والاعلام دون الاخرين؟!!..يا اخي كلهم في الحكومة ما مشهورين، ولا عندهم اي ظهور محلي او عالمي، -ومش كده وبس- وكمان مكروهين من المواطنين كراهية العمي. طبعآ ندي القلعة تتمتع بشهرة كبيرة لم يصلها وزير من الوزراء القدامي ولا من الجدد. (م)- اشمعني يعني اخترت ندي القلعة؟!!، علي العموم انت حر في اختيارك، لكنها اشهر فنانة الان في الساحة الفنية رغم محاربة التلفزيون لها، لا اعتقد ان هناك من لا يحب اغانيها، اجمل شي فيها انها تمثل الجانب الافريقي وافتخرت بانها افريقية. (ن)- لا تقول لي وزير اعلام ولا سياحة، الحكومة دي فيها زول واحد بمشي الشغل كله هو محمد عطا!! الباقين "كومبارس" ساكت، ودي حقيقة كلنا عارفنها!! 4- هل حقآ وزير الاستثمار والسياحة والاعلام -(سودانيآ)- يفتقدون الشهرة و(ضلهم ميت)؟!!..هل هؤلاء الوزراء يعرفون هذه الحقيقة عن انفسهم؟!! 5- هل حقآ وزير الكهرباء والموارد المائية معتز موسى عبد الله، يعتبر من اكثر الوزراء شهرة بسبب الغضب الشعبي العارم عليه طوال اكثر من عام؟ !! واخيرآ: ***- اليس غريبآ، انه في الوقت الذي فيه عشرات الوزراء ووزراء الدولة، وايضآ نواب في المجلس، وهم الذين حصل بعضهم علي اعلي الشهادات الجامعية ، تتفوق عليهم الفنانة ندي القلعة شهرة، ومكانة كبيرة في قلوب الملايين، وحب الناس في داخل السودان وخارجه؟!! بكري الصايغ [email protected]
