المعني الفعلي لشعار اى كوز ندوسوا دوس …. شخص ما كان يبرطع في البلد زى ما عاوز يختار الوظيفه الدايرا ويصرف مرتبات من اكتر من حته وعضو اكثر من مجلس ادارة ويشخط وينتر في الناس ويخوفهم بسلطاته وقد يحمل سلاح ويضع علامات الرتب التى يختارها ويعمل غارات على الاحياء والبيوت الآمنة بلبس عسكرى او مدنى ما مهم المهم السلطات التى تسمح له بتخويف البسطاء رجال او نساء او اطفال وقد يعتقل البعض من الناس الما عاجبنه و لكن يكون فاضى وزهجان ممكن يمشى بيوت الاشباح ويعذب المعتقلين ويتفشي فيهم وطبعا بيسافر على حساب الحكومة او التنظيم مافى فرق وبيصرف نثريات بالدولار ويمتلك عربات اخر موديل بدون دفع القيمة الحقيقية واولاده يقروا على حساب الدولة باعتبار ان ابوهم او امهم قياديين في التنظيم ممكن القراية دى تكون جوه البلد او بره حسب مزاجهم او حسب علاقاته و طبع بيصيفوا سنويا او يقضوا رمضان في القاهرة او تركيا او لندن او اى مكان ويمشوا الحج او العمرة مرات على حساب الحكومة وممكن يكون امير يعنى يدفعوا ليه مصاريف الحج وكمان يدوه حافز وظيفة الامير …. ويبلغ عن اخوانه واهله واصحابه للاجهزة الامنية ويعتقلوهم ويعزبوهم حتى الموت والبنوك مفتوحه ليه عشان يصرف قروض بدون ضمانات ويصدر ويستورد بدون اتباع الاجراءات ويرتكب اى مخالفات اخلاقيه والحساب مرفوع عنه لانه في التنظيم ومسئول طبعا فاتورة ايجار البيت والعلاج مرفوعه عنه يا بالدفع المباشر او التعويض …… وووووو ممكن نزيد الى ما لا نهاية …. و فجأة وفيما يشبه الاستيقاظ من حلم لذيذ يصحو فزعا علي فقدانه كل تلك الميزات والمخصصات والسلطات ويجد نفسه مواطنا عاديا ويقيف في كل الصفوف من الخبز للوقود اذا السيارة لازالت موجوده ..الى الغاز وفى عز الصيف ويتدين عشان يتم مصاريف الشهر وكل الناس تنظر اليه شذرا وبكراهية وتنتظره محاكمات على ما اقترفت يداه وينتظره استبعاد من الخدمة لتوليه وظيفة لا يستحقها ويسير منكسرا في الشارع … عندما ترى هذا النموزج تعرف انك امام كوز طبق فيه شعار الثورة اى كوز ندوسوا دوس … اللهم لا شماته.