#المثل السوداني الذي يقول «التسويهو بي ايدك يغلب اجاويدك» هذا المثل انطبق تماماً على ما قام به رئيس حكومة جنوب السودان الوليدة سلفا، فما قام به من تجني سافر على هجليج واكتشاف خطئه الذي سواه بي «ايدو» لم يفلح اهله الامريكان ولا الصين التى سافر اليها على عجل لاصلاح ما اقترفته يداه وانطبق المثل عليه ولم يفلح اهل الاجاويد في اصلاح الامر. #لا ادري لماذا تذكرت القصة الشهيرة التى جمعت بين حصان وخروف عند رجل ثري: مرض الحصان مرضاً شديداً ولم تفلح كل الادوية في علاجه، الخروف سمع الرجل الثري يقول لابنه: الحصان ده كان في ظرف ثلاثة ايام ما بقى كويس «حرصصه» الخروف ذهب لصاحبه الحصان وقال ليه قوم في كرت اصفر اشهروه في حقك وحينقلب احمر اذا ما قمت، قوم اتحرك ونطط. الحصان لمن شاف سيده قام ينطط ويصهل، سيده انبسط وقال لي ولده خلاص ما شاء الله الحصان بقى كويس اضبحوا ليه الخروف كرامة. هذا المثل انطبق على الخروف السواه بي ايدو مشى غلب اجاويده جاب ليه الكفوة واكلوه مرارة وشية. #اخونا سلفا احتل هجليج واجبر على الانسحاب بعد الهزيمة، هو قفل انابيب البترول قمنا اعلنا الطوارئ ووقفنا اللواري وما في دعم ولو بشق تمرة واى تهريب رصاص طوالى والنائب الاول قال Shoot to Kill اجاويد الدول الاوربية والافريقية والبرلمان الاوربي وقد علمت الجاسوسة الحسناء ان الرئيس قال الا سلفاكير «يبزق التوبة». هدايا الحلقة: 1- سواق رباطابي ماشي في الشارع شاف من بعيد مرة شايلة ولدها في ضهرا والشافع حالق صلعة وكل مرة يعاين بي ضهره ومرة يتاوق بي الشمال ومرة بي اليمين لمن حصلو الرباطابي دقاه في صلعته وقال ليه «هيع داير تخرم ولا شنو؟». 2- صاحب خيال مرته قالت ليه نفسي اجرب السيجارة دي اشوفها بتعمل شنو اداها ليها وقال ليها اخدي نفس، شالت نفس قال ليها اها كيف؟ قالت ليه دخان عادي، قال ليها اخدي نفس تاني اها كيف؟، قالت ليه برضو عادي قال ليها اخدي نفس تالت اها كيف؟ قالت ليه تمام الحمد لله اتفضل خش البيت مالك واقف برة؟. 3- صعيدي عايز يعمل عملية انتحارية عمل بروفة قبلها بأسبوع!. 4- صعيدي مشى الدكتور بيشتكي من بطنه الدكتور سأله اكلت شنو؟ قال ليه علبة ساردين الدكتور قال ليه الساردين كان بايظ قال ليه ما عارف لأني ما فتحت العلبة. 5- صاحب خيال ضرب لي شركة شل قال ليهم عندكم زيت مكنة؟ قالوا ليه في زيت مكنة وزيت فرملة وزيت جربوكس، قال ليهم ما عندكم زيت طعام؟. 6- العريس قال للعروس حأفرش ليك قلبي علشان تنومي عليه قالت ليه ولو ازعجتني دقات قلبك قال ليها يخرب بيت ابو اليدلعك تاني!. 7- الام لطفلتها الصغيرة اذا ضربتي اختك حتنومي بدون عشاء، قالت ليها حاضر يا ماما حادقها بعد العشاء!. 8- اقليمية سمعت بالممثلة «ماريا مارسيدس» سمت نفسها «فاطنة هايلوكس»!. 9- شيطان مجرم عزم اصحابو عشاء قفل الباب وشغل القرآن!. 10- مفتش تعليم دخل فصل في مصر وسأل من هو اول رئيس جمهورية في مصر؟ قال ليه محمد نديب، سأل واحد تاني من هو تاني رئيس جمهورية قال ليه دمال عبد الناصر، المفتش: الاولاد ديل شاطرين جداً بس بينطقوا الجيم دال، ناظر المدرسة قال ليه وهو دا المدنيني. خاتمة: نحن السودانيين لا نرفض الاجاويد لكن لا نرضى الحقارة ونؤمن بالمثل البقول «المابى الصلح ندمان» نقول لى سلفا العترة بتصلح المشي، ونأمل ان ينصلح مشيكم. مع تحياتي أحمد دوله