أعلنت الفنانة ميادة قمر الدين إلغاء حفلها الجماهيري بليالي البروف المقام في فندق (القراند) يوم الجمعة القادم؛ نسبة للظروف الصعبة التي تمر بها هذه الأيام وتضامناً مع المواطن، مؤكدة استعدادها لمواكب 21 الخميس، وأن الثورة مستمرة. وأوضحت ميادة، خلال بوست قامت بنشره: (أحب حاجة على قلب الفنان لقاء جمهوره وإحساسه بتقديرهم وسعادتهم، وكل فنان بيحاول يوصل امتنانه ومحبته للناس بطريقته وأسلوبه). وواصلت: (الحفلات الجماهيرية هي الحاجة الوحيدة البنحب عن طريقها نعبر عن حبنا للبلد، ومشاركتنا للناس ومحاولاتنا المتواضعة، لأننا نعكس ظروفهم ومشاعرهم عبر الفن الاتخذناه وسيلة ورسالة، عشان كده ونظراً للظروف البتمر بيها البلاد الأيام دي، وتضامناً مع المواطن الغلبان في أهمية أننا نتجاوز المرحلة دي بخير وأمان، قررت تأجيل حفل (ليالي البروف) المقام في فندق (القراند) يوم الجمعة 22/10/2021 وكلي حزناً على ما آل إليه حالنا لأنه صعب تقدم فنك لإنسان شاغل باله الفترة دي (كيف يعيش وهو آمن؟) و(يعمل شنو عشان أولاده يعيشو حياة كريمة)؟ وأضافت: (نحن الآن بنمر بمنعطف صعب محتاجين كلنا نقيف، ونسأل نفسنا عملنا شنو عشان البلد، وقدمنا شنو لي بعض؟!! ربنا يكف عننا شر الفتن ويجمع شمل كل السودانيين فى ما يرضاه، ويكتب لينا الخير والنجاة). واختمت قمرالدين: (نتلاقى قريب في رحاب سودان جميل وسعيد).
