مرات انا بعمل فيها (حريف) بحاول اطلع من الموضوع. زي لمن تمشي للدكتور تشكي ليك من (صداع). الواحد بدون مناسبة يقول ليك رأسي عاوز يتفتح على اتنين زي (المجوز). المجوز دا يا جماعة شنطة من صفيحتين..(ناس السكة الحديد بعرفوا الكلام دا جيد). هسع دا ما موضوعنا. يقوم الدكتور بعد ما تشكي ليه من (الصداع) بدون مناسبة كدا يقول ليك اعمل لي قياس للضغط. انت بي فهمك (اللاطبي) ح تقول هسع علاقة الصداع بي ضغط الدم شنو؟. لو ما ساي. رغم ان 90 % من اوجاع الرأس ..سببها (ارتفاع ضغط الدم). والبعمل فيه اتحاد الكورة دا. هسع ملعب (النجعة) دا ملعب ليكم. رجعتونا للوراء 1800 سنة. يا زول (ارتفاع ضغط الدم) الدخلو في العمود دا شنو؟...وعلاقتو شنو بي الكلام البتقول فيه دا. المناسبة شنو؟. تقيس ارتفاع الضغط...يقوم الدكتور يقول ليك ...اعمل كشف للنظر. انت بي فهمك المحدود ح تقول علاقة (النظر) بي وجع الرأس شنو؟. تقعد تتعقد من نفسك. تحول (الطبق). رقم ان 10 % من اوجاع الرأس سببها (ضعف النظر) والقعاد قدام الجهاز ..والدخول في (الواتس آب). واتس آب شنو في السخانة دي؟. ما قلت ليك عاوز اتذاكي عليكم ..عاوز اطلع من الموضوع. هسع دا ما طلوع بالواضح كدا. بحاول اتذاكى. رغم ان القاريء السوداني اذكى مننا جميعا. عشان كدا ..نحن وقت نتذاكي ..اول حاجة بنقول ليهم نحن عاوزين نتذاكي. يعني بنجيهم بالواضح . القاريء السوداني اوعك تجيه باللفة. تجيه ب (اللفة) يقول ليك ماشي (شرق). تجيه بالشرق يقول ليك ماشي (صنقعت). ما عاوز اجيب ليكم سيرة لمباراة الهلال والمريخ الفاشر. لكن ما بخليها. ما عاوز اقول ليكم شكل الهلال من حيث المبدأ كان جيد. شفتوا الزول من يجيب ليكم سيرة (المبدأ) في الكورة ..اعرفو طوالي الزول دا (مغلوب). مبدأ شنو كمان؟. كورة هي وإلّا ندوة (شعرية). عليكم الله نحن بلا (من ناحية المبدأ وكدا) العملها في شنو؟. البلد كلها مسكت ليك في (من ناحية المبدأ وكدا)..لمن بقينا اي قائمة فقر او جهل او مرض نكون نحن في صدارة الدول الاكثر نسبة. الجزار الفي يقول ليك (من ناحية المبدأ وكدا). الاستاذ الفي يقول ليك (من ناحية المبدأ وكدا). بتاع الدكان يقول ليك (من ناحية المبدأ وكدا). بتاع البطيخ يقول ليك (من ناحية المبدأ وكدا). الكمساري يقول ليك (من ناحية المبدأ وكدا). يا جماعة من (ناحية المبدأ وكدا) خلوها لينا نحن الصحفيين ..يعني عباراتنا دي ما تلاحقونا فيها. بقيتوا تشاركونا في (اعمدتنا). هسع عليكم الله من (ناحية المبدأ وكدا) ما طلعت ليكم من كورة الهلال ومريخ الفاشر. انتوا عاوزين تطلعوا ..انا عارفكم. اداء الهلال كان جيد (عاوزين تتبسطوا). طبعا الهلالاب ديل ما بقولوا حاجة في هلالهم ..اصلا ما تقول ليهم الهلال كعب. لو الهلال كعب...تعال ليهم بي فوق ..(قول ليهم الارضية كعبة). خليك حريف. وانت وقت تقول (الارضية كعبة) براهم بفهموا ليك الحاصل. عليكم الله دي (ارضية) تلعبونا فيها. تقول (عقوبة). لكن بالجد كدا ..(ومن حيث المبدأ ايضا) واضح ان الهلال يفتقد للمهاجم القناص. بكري المدينة وكاريكا وكوليبالي جميعهم بقوم بادوار دفاعية ..وبرجعوا للخلف اكتر من (الشغيل) ذاتو. انت يا كاريكا البرجعك شنو؟. الرجوع دا خليه لي ناس خليفة. لا اريد ان اتحدث عن اسلوب النابي ..لأن النابي عنده فكره ..وهو ادرى به. لا بد من القول ان بصمة النابي اضحت واضحة في الهلال ...فقد بدأ يفرض النابي اسلوبه. رغم التعادل امام المريخ الفاشر والخسارة امام الاهلي شندي (هدفين ما حسبوهم لينا). اثق ان الامور مع النابي سوف تمضي الى الافضل..خاصة بعد ان تعرض الهلال الى تجارب حقيقية. اتمني ألا يكون النقد قاسيا على النابي ..لأن الخسارة والتعادل امور واردة في كورة القدم. لكن مع هذا ..فاننا نصدر وجهة نظرنا ..عسى ولعل نصل الي الهلال الذي نريد. حسابيا ..الهلال الان جيد ..فهو في (9) مباريات في الممتاز لعب (5) مباريات في الولايات ..وهذا رقم كبير. بقينا ناس ولايات عديل كدا. طبيعي ان يتعرض الهلال لمثل هذه النتائج ..خاصة في ظل الاستهداف الواضح للهلال من الاتحاد والحكام والاندية التى يلعب امامها الهلال. ديل قاصدننا عديل. لكن كل هذه الاشياء ..يجب ألا تغطي على عيوب الهلال ..وهو حاجة الهلال الواضحة الي مهاجم قناص. فترة التسجيلات القادمة ..على الهلال ان يبحث عن مهاجم قناص بمواصفات خاصة ..وبي اي ثمن. لأن الهلال بشكله الحالي سوف يكتمل بدرا اذا ضم لكشوفاته مهاجم قناص. اما بدون مهاجم قناص وصريح ..فان كل البطولات سوف تفلت من الهلال ونفقدها بهذه الصورة. من الملاحظات الجديرة ايضا في مباراة الهلال امس هو المستوى الرائع والجميل الذي ظل يقدمه كابتن الهلال عمر بخيت. عمر بخيت يقدم في اجمل مواسمه مع الهلال على الاطلاق. ايضا نحسب الاجادة التامة لدفاع الهلال مالك وسيف الدين مساوي وسيسه الذي يتطور هو الاخر من مباراة الي مباراة. ايضا من اشراقات الهلال في المباريات الاخيرة المستوى الممتاز الذي يقدمه سيدي بيه هذه الايام. اضف الي هذا اللمسات الرائعة التى يتناقل بها لاعبو الهلال الكورة. وان كنا نرى ان العلة الاساسية في الهلال تتمثل في الكورات المقطوعة من لاعبي الهلال والتى تشكل خطرا كبيرا على الهلال. اها يا جماعة قصرت معاكم. عشان ما تقولوا عاوز اطلع ليكم من الموضوع. الامر المهم الذي اريد ان اتحدث عنه هو السلوك غير الجميل من فريق مريخ الفاشر والذي اجبر الهلال ان يلعب المباراة في ملعب عرَّض لاعبي الهلال لاصابات كبيرة. والهلال مقبل لمرحلة المجموعات ..ربما يفقد بشه ..وبكري المدينة الذي اكمل المباراة (مخدرا). غير هذا فان الانتصارات التى تأتي عبر وسائل غير كريمة تفقد الكورة نكهتها الحقيقية ..ومتعتها. كان يمكن ان يقدم مريخ الفاشر مباراة اجمل من تلك المباراة لو لعب في استاد الفاشر. لكن مريخ الفاشر لأنه يعرف ان لاعبي الهلال ينخفض مستواهم بصورة ملحوظة في الملاعب التى تكون ارضيتها سيئة..لأن عنصر (التكتيك) والموهبة عند لاعبي الهلال كبيرا. هذا بالتأكيد لا يعفى الهلال من المحاسبة لأن معظم ملاعب القارة الافريقية بهذا السوء. يفترض ان يكون الهلال بخبراته العريضة اقدر على اللعب في هذه الملاعب اكثر من مريخ الفاشر. على العموم ..النتيجة جيدة ..والتجربة مفيدة ..على الاقل هي قدمت لنا الهلال بعيوبه. افضل ان نكشف عيوبنا الان ..من ان نكتشفها في مباريات حساسة. لا سيما وان هذه العيوب تظهر قبل فترة التسجيلات ..وهي بالتأكيد محمدة. علما ان هذا الذي نقوله ..ليس للتبرير ..ولا للتخفيف ..وانما هي وقائع وحقائق يجب ان نتعامل معها كما هي. من الافضل ان نرى الهلال بصورته (الحقيقية) من ان نراه بصورة عاطفية ..ونحسبه مكتملا بدرا..ومازال الهلال فيه الكثير من النواقص. المهم هو ان نعرف ان نتعامل مع مثل هذه الظروف ..وان نتعامل معاها بحكمة ..وعقلانية ..بعيدا عن الانفعال والعاطفة ..لأن الهلال في مرحلة تستوجب (التعقل)..والتعامل مع معطيات المباراة بعقل. دائما اقول اننا نحتاج الي ان نعرف كيف نتعامل مع (الخسارة). نحتاج الي تلك الثقافة ..ونحن نفقد هذه الثقافة ..لذلك نخسر الف مرة عندما نخسر مباراة. الهلال يبقى جميلا ..ويبقى عظيما ..وهو يسعدنا في كل الاحوال ..ونحن سعداء به. ملحوظة : ادخل ليكم على البرسا والريال. هوامش كنت عاوز اتحدث عن برشلونة والريال ..في هذا العمود ..واخصصه للمباراة ..لكن خفت ناس مامون ابوشيبة يفهمونا غلط. يا سلك ..انتوا طلعتوا من المجموعات ..ركزوا مع ناس الحصاحيصا ديل. ما عندكم سكة تانية. بكرة ان شاءالله احاول ان اعود الي مجريات مباراة برشلونة والريال. ونطلع ليكم من الجو دا. على العموم البشوف برشلونة والريال ..يقول ح تلعب في (دكان الحلة) ما في فالنسيا. ناس الدكان في الحلة بتكلموا عن المباراة تقول مشارك فيها (بلة جابر). هسع لو بلة جابر بيلعب في برشلونة ..برشلونة كان نزلت التانية. شفتوا الكلام دا كيف؟. سيد اللبن سألتو امس ..قلت ليه رأيك شنو في المباراة؟. قال لي برشلونة عندها مشكلة في الاطراف. قلت ليه ..وانت عندك مشكلة في اللبن ..بتزيدو موية. بالله شوف ..عاوز يتحدث عن اطراف برشلونة. طبعا انا بكتب قبل المباراة ..عاوز ارسل العمود من بدري ..عشان اتفرغ للمباراة. بكرة ح نرجع نشوف الحاصل شنو؟. ناس النيل الحصاحيصا ديل طبعا ...المريخ عندهم زي (ولي الامر). ما بقدروا يقولوا ليه حاجة. الليلة ح نشوف لينا مباراة ...(الطيبة) كاتلاها. مباراة تبادل الزهور. مباراة (عرق) ما فيها. تنتهي خمسة يمكن. تنتهي سبعة يمكن. موش ديل ناس النيل. نحن حافظنهم حفظ. اقول ليكم ..اخير نقبل على برشلونة والريال. نيل شنو كمان؟. بس تتخيلوا يمكن (ضفر) الليلة يطلع هداف الممتاز. موش شيلميس دا ..من مباراة واحدة طلعوه الهداف. قلنا ليكم. نحن عارفين اي حاجة. بالمناسبة ..يا جماعة ..مباريات الهلال تاني بتجي في نفس القنوات البتنقل مباراة برشلونة والريال. مريخ الفاشر ..والنيل الحصاحيصا ديل ...بحولوا ليهم (الطبق). نحن إلّا تحولوا ليهم (الكرت). ... عاجل : اشوف الحاصل شنو في الكورة ..وارجع ليكم بكرة ان شاءالله.