في الفيلم المصري (ابوعلي) لكريم عبدالعزيز ومنى زكي ...ذهب كريم عبدالعزيز لزيارة (عمته) منى زكي للاحتماء عندها بعد مطاردة البوليس لهم ...لقوا البيت كلو عامل (جوطة) ...وشكلة لي رب السما ..عشان (عمته) مني زكي (الله يديها العافية في الفيلم) اكتشفت ان التلاجة فيها (قطعة جبنة) مفقودة. قلبو البيت قلب ...عشان (قطعة الجبنة) دي ...الاكلها منو؟....واتفقدت كيف؟..والشالها شنو؟.
عمته مني زكي ..موقفة الشفع كلهم على فد رجل ..وبتستجوب فيهم لمعرفة الشافع الاكل (قطعة الجبنة).
الطريف في الامر ان كريم عبدالعزيز بعد ذلك اكتشف ان الزول الاكل (قطعة الجبنة) هو ابو العيال ذاتو...وان العيال (المزرورين) ديل ...ما عندهم أي ذنب.
الحكاية خربانة من كبارها...(زي حكاية السكر).
يعملوها الكبار ..ويقولوا ليك (الدولار) ارتفع.
هسع السكر ذنبو شنو؟.
السكر ..خلي ...الدولار ذاتو ذنبو شنو؟.
عامل (سنونك) دي ...زي شنطة الميكانيكي.
مثل هذه الحكاية ..تحصل كثيرا في البيوت السودانية (حكاية قطعة الجبنة) ...وهناك حالات فقد كثيرة قيدت ضد مجهول.
يعني مرات بكون عندك (بارد)...جبتو معاك ...ووضعته في التلاجة ..فتحت التلاجة (ساعة الصفر) وما لقيتو.
الشالو منو ما بتعرف.
فص ملح وداب.
البيت كلو ينكروه ليك ...تقول (مخدرات).
ومرات بتفقد من التلاجة ..(طعمية) او سندوتش بيرقر (لو الدنيا كانت اخر شهر).
في شفع (شفوت)...ما بخلوا ليهم حاجة في التلاجة.
قالب التلج ..ينزلوه.
عندهم حملات (تفتيش) على التلاجات بعد العودة من المدارس.
جوعة اخر الحصص دي ..بتخليك تقضي على الاخضر واليابس في التلاجة.
في شفع (عجورة) ما بخلوها.
الطماطم ما بريحوها ليك ...شفع (شواطين)..اي حاجة يشوفوها لازم يشيلوا منها (حبة).
مزاجهم كدا.
وفي شفع (الدكوة) ذاتها ما بخلوها...كيس (الدكوة) بقدوه.
شفع الزمن دا الواحد ..ترسلو لي بسكويت ...يجيب ليك صندوق البسكويت ..ناقص (بسكويتة).
تاني يا عصام الحاج ..مباريات المريخ ..إلا تلعبوها (عصرا).
اتمقلبتوا ساكت ..ودفعتوا فاتورة الكهرباء.
الكهرباء لزومها شنو؟...والكشافات حاجزين عليها.
تتفاصحوا ساكت بي ...(كشافات) ...قروشها ما دافعينها.
ويا ريت لو بقت على (الكشافات).
الأبراج التى تحمل الكشافات ذاتها (حجزوا) عليها...تقشفكم دا ..وصل مرحلة خطيرة.
الله يستر على (عربية) فيصل العجب.
اقول ليكم حاجة ...الابراج الاتبرعتوا بيها لاستاد الحصاحيصا ...رجعوها.
انتوا وقت ما عندكم قروش ...التبرع ما في داعي ليه.
ما في زول لايمكم ...جمال الوالي ..واستقال.
وناس عصام الحاج ديل ما عليهم حرج.
عصام الحاج ..لو عرف معلومة ابراج الحصاحيصا دي ..برجعها.
عصام الحاج ما بخليها ..في ظل (التقشف) دا.
البلد حالها واقف..زي الزول القافل على (كرت ميت).
والله نحن لو كنا عارفين ..توقف ضخ (النفط) بعمل فيكم كدا ....كنا عملنا المستحيل عشان الجنوب ما ينفصل.
اسوأ من دا (الكشافات) الموجودة بالمخزن ذاتها قالوا ليك حجزوا عليها.
يا عصام الحاج ..لو عندك (كشافة)..او زاوية قديمة في بيتك ...ممكن يحجزوا عليها.
الجماعة ديل وصلوا (المخزن).
دا تقشف شنو؟.
غايتو يا عصام الحاج ..اتمقلبت ..جنس مقلب في الدنيا دي.
دا وقت تمسك فيه المريخ.
ليه حق جمال الوالي (يستقيل).
يا زول جمال الوالي (الحجز) دا ما بقدر عليه ...ولا بستحملو.
انتوا عارفين (الحجز) شمل شنو؟.
كراسي الجلوس الفاخرة بالاستاد.
وكل المكيفات الموجودة بالاستاد.
وكل الكمبيوترات الموجودة بالمركز الاعلامى.
معقولة بس ..خليتو شنو لي عصام الحاج ..يا جمال الوالي.
تمسكوه نادي (محجوز) عليه.
يعمل بيه شنو؟.
يعني لو في مسؤول عاوز يحضر ليه مباراة في استاد المريخ ..إلا تأجروا ليه (كراسي) مناسبات.
استادكم دا ...طلع ما عندكم فيه أي حاجة.
انتوا تعالوا هنا ...(سور الدقير) الحاصل عليه شنو؟.
السور مرق منها.
الشيء المحزن ...ان (الحجز)...امتد ..اكتر من كدا.
يا ريت الموضوع لو بقى على الكشافات ...والابراج والكراسي.
يا ريت الموضوع لو بقى على (طابق شاخور).
انتوا عارفين جوازات علاءالدين يوسف واكرم الهادي سليم في الامارات تم (الحجز) عليها بواسطة المحكمة.
انتوا الجماعة ديل طلعوا في (المحاولة التخريبية) وإلا شنو؟.
بالجد كدا ...المريخاب ديل حالتهم بقت (صعبة).
قولوا واحد.
التقشف ...دخل عليكم ...دخلة شديدة.
موضوع (التقشف) دا ..ذكرني حاجة.
عندنا جماعة كدا ...ما في داعي لذكر الاسماء ...اخر الشهر ...بظهر في (كديستهم).
كديستهم اول الشهر ...تلقاها مبسوطة ..وفرحانة ....منفوخة ..وتلعب بالستائر ..وتهز في (ضنبها).
اول الشهر ...الكديسة ..بتكون بتضرب في السمك ..والفراخ.
اخر الشهر ..رأسها بيضرب.
انا بعرفها ليك من حوامتها تكتر على الجيران.
هسع دحين ..يا مريخاب ....التقشف ..ظهر في (كديستكم).
معقولة (الابراج) بقت ما حقتكم ...وما بتملكوا تصرفوا فيها.
دي حالة اخير منها (الدرجة التانية).
انتوا عارفين ...لو الموضوع دا حصل في ايطاليا او انجلترا ..بلوائح الاحتراف ...النادي طوالي بنزلوه (درجة تانية).
الاتحاد العام لو طبق الاحتراف ...مفروض ينزل المريخ (درجة ثانية).
لكن عشان (هيثم مصطفى) الجاكم من الهلال وعشان تاريخه 17 سنة بنخليكم سنة في الممتاز.
تكتروا ..تقللوا ...بنزلكم التانية مع الحرية وود نوباوي.
هى الحرية ..وود نوباوي ديل وين؟.
ملحوظة : انتوا رأيكم شنو؟...خلوني انا.
هوامش
محمد عثمان الكوكي ..قال في (ساعة رياضة) مع هشام عزالدين في الشروق امس ...انه ح يطبق (الاسلوب) الذي كان يطبقه في الاهلي شندي في المريخ.
تتخيلوا.
يعني المريخ الموسم القادم ..بطلع من الكونفدرالية قبل المجموعات.
ومع (الكشافات) الحاجزين عليها دي ...يمكن تطلعوا من دور ال (32).
علاءالدين يوسف لو كان عارف ..(تقشفكم) دا ..وطابقكم المحجوز ...كان مشى (اهلي شندي).
فييرا ..جنو وجن (التقشف).
بالجد ..الكوكي امس في الشروق ...كانت نفسو مارقة من المريخ ..واجاباته غير مطمئنة.
الكوكي وقت كان في الاهلي شندي ..كان بضحك من الاضان لي الاضان.
الظاهر (التقشف) دا جاب كثافة الكوكي.
من اجابات الكوكي ..قوله عن فيصل العجب ...ان العجب ممكن يكون (كابتن) اذا شارك!!.
اذا شارك!!.
في الوقت الذي لم يحدد مشاركة هيثم مصطفى ..وعصام الحضري من عدمها.
يعني بالواضح كدا ...العجب لن يشارك في تشكيلة الكوكي.
الحجز الظاهر شمل ايضا ...(فيصل العجب).
تعليقا ..واعتراضا ..نقول ان الامين البرير في حلقته مع عوض الجيد كباشي في قناة النيلين امس الاول ..رفض التعليق عن هيثم مصطفى ..وقال ان هيثم اصبح لاعبا في المريخ.
البرير احترم المريخ ...ولم يعلق ..بينما لم يحترم البرير الهلال عندما كان هيثم مصطفى (قائدا) للهلال بتاريخ يمتد ل (17) سنة..وظل البرير يصرح ..ويهاجم في هيثم مصطفى في الاذاعات والفضائيات.
هسع وقت بقى اللاعب لاعب المريخ ..قال (بدون تعليق).
كان اجمل ان يقول البرير ذلك وهيثم مصطفى (قائدا) للهلال.
