…… [email protected] …… تحل اليوم الذكرى نصف السنوية لتوجيهات السيد الرئيس بخصوص (ملف هيثرو) فقبل حوالى ستة أشهر وتحديداً في اليوم السادس من مارس من العام الجاري وجه السيد الرئيس بمحاسبة الجهات المتسببة في فقدان السودان لخط هيثرو الجوي واعادته او اعادة قيمته واتخاذ الاجراءات اللازمة لحفظ حقوق الخطوط الجوية السودانية ، واكد حينها السيد وزير النقل والطرق والجسور احمد بابكر نهار فى تصريحات صحفية عقب لقائه الرئيس ان لجنة التحقيق في فقدان خط هيثرو توصلت إلى نتائج دامغة في القضية تدين مجلس الادارة السابق . من الواضح أن هنالك شيئاً ما (قوي وشديد) يعيق وضع الملف أمام العدالة فإذا ما ربطنا بين توصل السيد وزير النقل إلى نتائجه الدامغة وبين توجيهات الرئيس بمحاسبة (الوالغين) في القضية فلا يمكن بأية حال من الأحوال أن تأخذ المسألة (ستة شهور) وما معروف تاني (تاخد ليها كم) ؟ العبدلله عمل ليهو فنجان قهوة وقعد في ضل الصباح وبدأ ينجر في مخو ويسأل في نفسو (الملف ده ما عايز يتحرك ليه) .. (الرئيس ووجه بالمحاسبة أها تاني شنو؟) ... حتي قبضت عليه (المدام) بالثابته حين فوجئ بها وهي تصرخ قائلة : - والله والله أنا عارفاك من زمان ح توصل للحتة دي .. وووب عليا كمان بقيت تكلم نفسك؟ المدام لا تعلم أن مرحلة (كليم النفس دي) مرحلة فتناها زمااانك وقبلها مرحلة (فقع المرارة) وأن المرحلة الحالية هي مرحلة الشلل القولوني الإرتعاشي والذي يعتبر (ملف هيثرو) إحدي مسبباته ! - إنتا الحاجه الما عارفا ما تسأل منها إحتمال تلاقي ليكا زول عارف يقول ليك ! - فكرة والله كدى النطلع على شلة (الضمنة) دي إحتمال ربنا يضع سرو في اضعف خلقو ويكون فيهم واحد عارف التأخير ده سببو شنو ! وعلى طول لبست (سفنجتي) ودرعتا جلابيتي وعلى (شلة الضمنة) حيث وجدتهم يجلسون كعادتهم تحت شجرة (النيم) امام منزل عم حسنين النجار .. وما أن جلست على أحد (البنابر) حتى توجهت بالسؤال للاسطى حسنين : - يا أسطي حسنين تفتكر ملف خط هيثرو ده المعطلو شنووخاليهو ما يتحرك؟ - يا استاذ ما تستعجلو ساكت مش ممكن يكون فيهو (غراء) كتير ماسكو ما يتحرك؟ أو تكون (الضلف) بتاعتو (كابسة) وعايزه ليها جرة جرتين (بالفاره) ؟ وهنا تدخل المعلم نصر الميكانيكي وهو يشير نحوي بيديه الخشنتين : - يا استاذ الملف ده عاوزنو يتحرك كيف إذا البلالي بتاعتو (عاضة) والإستارتر بتاعو حارق فحمات ومفوت (جلب) الملف ده يا استاذ عاوز ليهو تحقيقات أقصد إسبيرات (أصلية) إسبيرات السوق الشايفنها دي كووولها ما نافعة ولو منتظرنها تعمل حاجة واطاتكم أصبحت ! وهنا ضرب فوزى الجزار بقطعة الضمنة على التربيزه ضربة قوية وهو يقول لهم : - أها قفلتها ليكم يلا عدو العندكم .. ثم يلتفت نحوي قائلاً : - يا جماعة الخير الملف ده موضوعو منتهي شوفو ليكم حاجة تانية .. عارفين ليه؟ - (بصوت واحد) : ليه؟ - عشان ده ضبح (إسلامي) !! - (في خيبة أمل) : هسه يا جماعة أنا جاييكم توروني سر الملف (الغاطس ده) تقعدو تعملوها ليا (ضلف كابسة) و (بلالي عاضة) وضبح إسلامي وما عارف شنو؟؟ - (جميعهم بصوت واحد) : يأ أستاذ ده العندنا أنحنا ناس (معاشات وضمنة) إنتا قايلنا (أمن إقتصادي) !! كسرة : من المؤسف (حقاً) أننا في حاجة إلى (توجيهات) رئاسية للإسراع في تنفيذ (التوجيهات) الرئاسية .. وللا الفهم شنو؟ كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو وووو)+و+و؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟
