توقيع رياضي معاوية الجاك عملوها الرجال # هذا هو المريخ إبنك يا أفريقيا السمراء.. هذا هو المريخ زعيمك وخبير بطولاتك دون غيره من كل أندية السودان صاحبة المحلية المؤصلة # هو المريخ وحده من بين كل أندية السودان مجتمعة.. ظل يحمل راية الشرف والعزة والكرامة وحده # شرف السودان مرات ومرات.. وأفرح الملايين مرات أكثر. # هو المريخ العظيم على هامة السودان علامة وشامة وهو المريخ قامة ورفعة وإباء وشموخ وكبرياء # هو المريخ الذي عرف به السودان ورفع إسمه عالياً بين أندية القارة دون غيره # ظلت كل الأندية السودانية متقوقعة في المحلية الموغلة ولكن المريخ ظل الشامة الوحيدة والعلامة الفارقة في تاريخ الكرة السودانية # ظلت بقية الأندية محلية حتى النخاع ولكن المريخ ظل هو السفير الأوحد للكرة السودانية أينما ذهب # هو المريخ العظيم دوماً حقاً وفعلاً لا قولاً.. هو ناثر الفرح وجالب الكاسات المحمولة جواً وغيره جالب الخيبات والإنتكاسات المحمولة جواً وبراً وبحراً وشكاوى # عظمة المريخ دوماً تتشكل في أنه الوحيد الذي يسعد أمة السودان ومن قبل أسعدها في العام 1986 ثم 1989 ثم 1994 وكل هذه الإنجازات على مستوى القارة السمراء # وغابت فرحة الأمة السودانية رياضياً منذ العام 1994 لينتفض الأسد الهصور ويعيد الفرحة بالأمس. لحظات عصيبة وعجيبة وسعيدة # تابعنا مباراة الأمس بين المريخ وجيش رواندا بطريقة درامية # كنا داخل مركز راشد دياب للفنون حينما هاتفنا الصديق الحبيب هشام عز الدين المنتج بفضائية الشروق وبرفقته المريخي الغيور الحبيب عمار شبو وأمين المريخابي الصميم # داخل مركز راشد دياب إجتمعنا لنغادر وأمامنا المريخي الرجافة أباذر صوب مقر قناة الخرطوم الدولية # وهناك وجدنا صفوة خلص يتابعون المباراة يتقدمهم مدرب الصقور مازدا والكابتن عادل أبوجريشة والزميل ود الشريف وقطب المريخ الشاب قرشي أحمد الهادي وبرفقته أبناءه أحمد وحسن # هشام وعمار شبو لم يحتملا متابعة المباراة فإنسحبا إلى خارج القناة وإتجها صوب النيل وجلسا تحت الشجر وأغلقا هاوتفهما # الكابتن عادل أبوجريشة كان متوتراً ومنزعجاً من بداية الشوط الثاني وهو ينتقد التكتل المبكر بخبرة السنين # قرشي أحمد الهادي لم يتبقَ له سوى أن يقتحم الشاشة ليبعد الكرات وكان يصيح بعنف وكان يغادر بين الفينة والأخرى مكانه خارج القناة ثم يعود ومارس قمة الجرسة والخوف والرعب حتى طالبه الكابتن أبوجريشة بالهدوء حتى لا يُصدر توتره إلى بقية المريخاب # عقب نهاية المباراة إختلطت دموع المريخاب داخل قناة الخرطوم الدولية ببعضها البعض وهم يتبادلون التهاني والتبريكات # الأستاذ أمير التلب تحدث عن فوز المريخ بسيكافا يعتبر إنجازاً بطعم خاص للسودان وهكذا أمير التلب دوماً صاحب عمق بعيد في تفكيره. توقيعات متفرقة # قالوا الوالي إشترى كأس سيكافا من الجيش الرواندي نادي الحكومة والوالي حول الدولارات لي كيجالي # قلنا ليهم يعني شنو.. ما جبتو جديد.. نحنا عادي بنشتري أي نادي تابع للحكومة # طبعاً الأندية التباعة للحكومة معروفة وعندها علامات مشهورة ومعروفة # يعني لو لقيت ليك نادي عمرو 84 سنة وما عندو بطولة خارجية أعرف طوالي إنو ده من أندية الحكومة زي الجيش الرواندي الإشتريناهو أمبارح وشلنا منو الكأس # الجيش الرواندي تابع للحكومة.. وأمبارح حكومة رواندا كلها قاعدة في المقصورة من الرئيس بول كغامبي راعي بطولة سيكافا لغاية أصغر وصيفي رواندي # الوالي طلع خطير.. إشترى الجيش الرواندي عديل كده # طيب ما قلتو الوالي ما مفتح وما عندو حاجة # يعني بالمختصر الوالي إشترى رواندا بي رئيسها وأنديتها بإختصار أكتر إشترى رواندا كلها # نرجع لي جماعتنا القالوا إشترينا البطولة من جيش رواندا التابع للحكومة # أها نحنا قبل كده جبنا كم بطولة محلية وفي النهائي لعبنا مع فريق كده عمرو 84 سنة وبرضو ما شال ليهو بطولة خارجية # أها الفريق المحلي ده شلنا منو البطولات كتير جداً لكن الغريبة أهلو ما قالوا إشتريناهو زي الجيش الرواندي # أحلى مافي بطولة سيكافا ثري بتاعة كيجالي أنها إتزامنت مع خروج الوصيف الأصلي من البطولة الأفريقية # يعني الفرحة (دبل) مضاعفة وعندنا فرحة قديمة بتاعة الشكوى الطلعت ……… # طلعت شنو الشكوى؟ # ما عارف طلعت شنو لكن أمبارح جمهورنا جوه الإستاد هتف ليهو هتاف كده عجبني شديد وكان عندو علاقة بالحاجة البيعملوها في الفول # الشكوى الشكوى.. طلعت حاجة كده قريبة للمكوة.. بس غيروا لي حرف الميم وإختاروا إنتو الحرف المناسب # وصيفاب رواندا لم يقصروا وشجعوا المريخ بعنف وطلعوا أفضل من وصيفاب الخرطوم.. الفيكم إتعرفت يا وصيفاب الزريبة # شكراً وصيفاب رواندا ولا عزاء لوصيفاب الخرطوم رفقاء الصفر الدولي # عاشق المريخ خفيف الظل جحا من مدينة شندي أرسل يقول: عليّ الطلاق شدة ما فرحت صليت المغرب تسعة ركعات كل مرة أسجد سجود سهو.. وأضاف جحا: وأكتب على لساني الكاردينال يحاول تنظيم سيكافا كان إستمر في الوصيف لأنو يا دوب عرف قيمتها # جحا قال الآن إنضمت كيجالي إلى نظيراتها موانزا والخرطوم لتعمل الموجات التلاتة ضمن البرنامج الأحمر بأم درمان وناشد جحا المريخاب الراغبين في السفر من شندي إلى الخرطوم لإستقبال أسود المريخ الإتصال على الرقم 0918371379 أبوراس وجحا.
