محمد عبد الماجد دق الدلجة نقل مباشر لمباراة عزام.. (ضربة جزاء) للمريخ في الدقيقة الخامسة عندما لعب الهلال مباراته امام فريق (كي ام كي) الزنزباري ..استبق اعلام المريخ الاحداث وقال ان هناك فريق قدم مجموعة من الهواتف الذكية والجلاكسيات لطاقم مباراته الافريقية. هذا الخبر جاء قبل 24 ساعة من مباراة الهلال وكي ام كي. بل ان الخبر هذا جاء عنوانا رئيسا لصحيفة (الزعيم) المملوكة لجمال الوالي رئيس نادي المريخ. والمريخ سوف يلعب بعد ايام مع (عزام) واعلام الهلال ممكن يرد هذا (المكر) بمثله ..العين بالعين والسن بالسن والباديء اظلم. لعب الهلال امام كي ام كي ..وتلفزت المباراة وشاهدها العالم كله وانتصر الهلال انتصارا (حلالا) ما فيه اي (جلاكسي) ولا حتى (شاحن جلاكسي). ولا فيه ريحة تلاتين عشرة. ولا شاحن ابرة. بل ان حكم المباراة ظلم الهلال عندما صرف له ضربة جزاء لم يحستبها الحكم للهلال امام كي ام كي. صحيفة الزعيم عندما جعلت (هدايا اجهزة الهاتف الذكية) عنوانا رئيسا لها – فات عليها ان المريخ سوف يلعب امام (عزام) الذي هزم المريخ في تنزانيا…وان (الجلاكسيات واجهزة الحاسوب) ممكن برضو يسأل منها الهلالاب. الموضوع ما يبقى ليكم حار الان – انتوا اتهمتوا الهلال في عنوان رئيس في الصحيفة المملوكة لرئيس نادي المريخ. اعلام المريخ ..لم يحتاط ولم يعتبر ان اعلام الهلال ممكن ان يعاملهم بالمثل …والمريخاب لن يستحلموا اذا جاريناهم فيما كان ينشرونه. الهلال لم يكن يهمه الخبر ولم يهزه لأن (العارف عزه مستريح)..المباراة (متلفزة) ..والعالم كله سوف يشهد المباراة. المريخاب لن يستحلموا اذا كتبت صحف الهلال ذلك وقالت ان هنالك (110) جهاز جلاكسي اضافة الى (120) جاهز لاب توب وشاشة 44 وتلاجة 12 خرجت من سوق ليبيا. مشت وين؟. هو الكلام بي قروش؟. يمكن بالطريقة نفسها ان يروج اعلام الهلال لما روج له اعلام المريخ. اعلام المريخ ايضا خرج بعد مباراة الهلال والنسور يتحدث عن ضربيتن جزاء للنسور. والمباراة متلفزة. والناس كلها شافوا المباراة. لم يتبق لاعلام المريخ إلّا ان يقول ان جمهور الهلال اخرج (الشرطة) من الملعب. وان جمهور الهلال اعتدى على معلق المباراة. وان الشغيل اضاع ضربة جزاء. والحكم قام بطرد لاعب من فريق النسور على طريقة (كرنقو). اذا كان اعلام المريخ يصطنع احداثا ووقائعا لا اساس لها من الصحة بعد المباراة وتلفزتها دعونا نقول ان سيناريو مباراة المريخ وعزام يبدو واضحا حتى قبل ان تلعب المباراة. والمباراة غير متلفزة. يمكن ان يكون للمريخ في هذه المباراة اكثر من ضربيتن جزاء اضافة لطرد اكثر من لاعب من فريق عزام. المباراة غير متلفزة يا عالم ..لكن هذه الامور يمكن عبر الاذاعة ان تثبت وتعرف. يعني ما عاوزة ليها تلفزة. بعض المواقع الاسفيرية تقوم بنقل المباريات عبر تقديم نشرة تفصيلية لكل مجريات المباراة. يمكن نحن في هذه المساحة ان نقدم نقل مباشر لمباراة لمباراة المريخ وعزام…حتى قبل ان تلعب المباراة ..وتقارنوا بين هذا الذي ننقله وبين الذي سوف يحدث في المباراة. والمباراة غير متلفزة. لكن (الشرطة) موجودة. الى النقل المباشر للمباراة. انطلاق مباراة المريخ وعزام التنزاني. الدقيقة الاولى ..حكم المباراة يوقف المباراة ويتحدث مع حارس مرمي فريق عزام التنزاني وينزره بالكرت الاصفر على تأخيره للزمن. الدقيقة الثانية …ضربة تماس لفريق المريخ يحستبها الحكم ضربة جزاء للمريخ. بكري المدينة يسدد كورة خطيرة على مرمي فريق عزام في الدقيقة الثالثة من عمر المباراة. الكورة في الشكافات ..الحكم يحستبها هدف. الحكم ينزر اللاعب رقم (7) من فريق عزام في الدقيقة الرابعة. ضربة جزاء للمريخ في الدقيقة الخامسة من الشوط الاول…والهدف الثاني للمريخ من (اكرا) الذي نفذ ضربة الجزاء المحسوبة للمريخ. الدقيقة السادسة مخالفة للمريخ على رأس خط 18. الدقيقة السابعة كرت اصفر لمدافع فريق عزام – اللاعب صاحب الفانلة رقم (5). طرد المدافع رغم (4) من فريق عزام واشهار الكرت الاحمر في وجه المدافع التنزاني. حكم المباراة يتحدث مع الجهاز الفني لفريق عزام. مخالفة في منتصف الملعب لفريق المريخ. الدقيقة العاشرة من عمر المباراة الحكم يطرد المدير الفني لفريق عزام التنزاني. ضربة جزاء اخري لفريق المريخ في الدقيقة 20 من الشوط الاول. الهدف الثالث للمريخ من ضربة جزاء. الدقيقة 25 من الشوط الاول طرد حارس مرمي فريق عزام التنزاني نسبة لتأخيره للزمن. الحكم يطرد مساعد مدرب فريق عزام التنزاني في الدقيقة 35 من عمر المباراة. الدقيقة 43 الهدف الرابع للمريخ. 7 دقائق زمن بدل ضائع. انتهاء الشوط الاول من المباراة بتقدم المريخ على فريق عزام 4/ صفر. اها بعد كدا يا جماعة الشوط الثاني ما بيجيبوه لينا في التلفزيون. تلفزوا لينا الشوط الثاني ..عفينا ليكم الشوط الاول. ما ح نسألكم من اي ضربة جزاء. ولا من اي حالة طرد. بس تلفزوا لينا الشوط الثاني من عمر المباراة. غايتو انا مع ضربات الجزاء الكتيرة دي ..ما ح انقل ليكم الشوط الثاني. اتصرفوا براكم..وخلونا ننتقل لمباراة الهلال وكي ام كي. طبعا مع ان الهلال يلعب في (زنزبار)…وزنزبار دي قالوا (شاحن موبايل) ما فيها. ما فيها ولا (طبق). شباك ما فيها. ما بعرفوا (التلج). مع ذلك مباراة الهلال متلفزة ..ومنقولة على الهواء في قناة النيل الازرق. وناس قناة النيل الازرق ما ح يقولوا ليكم زي ناس قناة النيلين ..لفوا الطبق. وقبلوه وحولوه شرق. غايتو خالد الاعيسر عمل فينا جنس عمائل. جاء من لندن حول لينا (الطبق) ورجع. جاء من لندن عشان يعمل لينا (التلاتل) دي ويرجع تاني يخلينا نحن نحول في (الطبق). اها ح نقعد نسك الطبق دا كدا من حتة لي حتة. عشان حركات قناة النيلين ..وناس المريخ ..الهلال مباراته منقولة على قناة النيل الازرق. ناس كي ام كي ليه ما قالوا ما عاوزين نتلفز المباراة. فريق كي ام كي من ثقته في نفسو ..وافق على نقل المباراة على قناة سودانية. لا قال عاوزين استنفار. ولا قال عاوزين جماهير. ولا عمل اجتماعات في المحليات. انتوا يا جماعة ناس المؤتمر الوطني ديل دشنوا حملتهم الانتخابية في استاد المريخ وإلّا دشنوا حملتهم الاستنفارية لمساندة المريخ امام عزام؟. المحليات وشاب المؤتمر الوطني في ولاية الخرطوم انصرفوا كليا في اجتماعات من اجل مباراة المريخ وعزام. وناس الاتحاد العام والمريخ والشرطة ..طلعوا ليهم (بيان) في منتهى الرومانسية. بيان ما فيه اي (بمبان). بيان ما فيه اي زول غلطان. بيان تقول كتبوه في حدائق (حبيبي مفلس). ما فاضل للشرطة والاتحاد العام والمريخ إلّا يوزعوا ليكم مع (البيان) المشترك باقات ورود وعصائر ليمون وطيور زينة. دي شنو (الرومانسية) البتعملوا فيها دي؟. ناس المريخ اصلهم كدا. وناس الاتحاد العام ما غريبة عليهم ..البعملوا فيه دا. لكن ناس (الشرطة) ما حلو في حقهم البيان المشترك هذا. ديك مخيرين يا ناس الشرطة. وقادر الله. ………. و ناس مبارياتها في زنزبار متلفزة ..وناس في ام درمان بطلعوا الشرطة. والشرطة بطلع بيان تقول ما في مشكلة. والمشكلة. اسامة عطا المنان صرح قال الازمة انتهت. الحمدلله اعترفت – يعني كانت في ازمة. الازمة راحت وين يا اسامة؟. بي طريقتكم دي ح تظهر كوارث كثيرة. والازمة ما انتهت يا اسامة. …………. السيدة (ل)…الزول البتكلم ليك كتير عن المثل والقيم والمباديء بكون عندو مشكلة في الرياضيات. وقرّض على كدا.
