بدون حجاب خالد عز الدين مليون دولار واسامة خسران يا دكتور
أختفي رئيس الاتحاد السوداني لكرة القدم الدكتور معتصم جعفر عن الانظار طوال الفترة الماضية .. عصفت الازمات بالكرة السودانية ولم نكن نجد الا اسامة عطا المنان في اتحاد الكرة مع الظهور في اوقات (نموذجية) لمجدي شمس الدين .. اما الطريفي الصديق فوجوده مثل عدمه وسفره بدون فائدة ايضا مع البعثات .. راجعين ليك يا الطريفي !! اختفي معتصم جعفر من الساحة الكروية تماما حتي اعتقدنا انه يمهد للانسحاب بهدوء من الوسط الرياضي ليتفرغ لاعماله التجارية .. حتي في عز الازمة الحالية فضل معتصم جعفر الصمت ثم انفجر فجأة وظهر في كل اجهزة الاعلام للدرجة التي تحدث فيها لقناتي النيل الازرق والشروق في يومين متتالين ! بدأ واضحا ان رئيس الاتحاد السوداني الذي فاز برئاسة سيكافا قد فقد القدرة علي المنطق والاقناع وحتي الهدوء الذي اشتهر به .. وبدأ واضحا ان معتصم جعفر (مضغوط) للدرجة التي فارقت الابتسامة وجهه رغم انه اشتهر بالتبسم والضحك ! معتصم جعفر أنفعل في قناة الشروق ومن حقه ان ينفعل طالما انه رئيس مجلس ادارة اتحاد فشل في كل شئ خلال هذا الموسم .. احترمنا لمعتصم هذا الغضب البائن في وجهه عكس اسامة عطا المنان الذي يحاول ان يضحك ويظهر في صور تسجيلات لاعبي الهلال حتي اعتقدنا انه نائب عماد الطيب ! أنفعل معتصم جعفر في قناة الشروق من الاسئلة التي وجهت له حول الاموال والميزانية ودولارات الفيفا وسيطرة اسامة عطا المنان علي اوضاع المال والاعمال في الاتحاد ! معتصم جعفر بدلا من ان يرد بالارقام واصل حديث الاوهام علي طريقة بيان الادارة المالية ولكنه كان اكثر جرأة عندما حكي لنا عن اسامة عطا المنان المظلوم .. الرجل الطيب الذي (يسلف) الاتحاد ! حلال المشاكل اسامة عطا المنان الذي ينقذ الاتحاد الفلسان في وقت الشدة !! يا سبحان الله .. أتحاد استلم اكثر من مليون دولار في موسم واحد . مفلس وبصرف عليه اسامة عطا المنان رجل البر والاحسان !! والله دي يادكتور احسن منها تفسيرات صاحبك سمير فضل في المادة 105 !! كدي عليك الله اشرحها لينا .. اتحاد استلم من الفيفا اكثر من مليون دولار .. بجانب دولارات الاتحاد الافريقي .. دخل المباريات .. دخل التسجيلات .. اموال الرعاية .. اموال النقل التلفزيوني .. معقولة بس يا دكتور .. ده كلو وبتدينو ؟ وبتدينو كم من اسامة ما يكون مليون دولار برضو !! بتعملوا شنو انتو بالقروش دي كلها ! لا مدرب اجنبي .. لا معسكرات .. لا اعداد للمنتخب .. المنتخب الاولمبي تحت رعاية احمد هارون .. منتخب الناشئين موسمي جدا .. منتخب الشباب .. ايوااا .. ما هو السر في كل هذا الصرف علي منتخب الشباب .. لماذا يسافر اربعة اداريين مع منتخب الشباب للجزائر وتونس .. من هو هذا (الشاعر) الذي ظهر فجأة في اتحاد الكرة ليكون في كل سفريات منتخب الشباب !! ما في مشكلة حتي مع الصرف الكبير علي منتخب الشباب برضو (القروش) دي كتيرة جدا يا دكتور ! معقول مع المليون دولار تكون في ديون ! واضح جدا انو صرفكم بذخي خالص خالص خالص ! حدثني احد الاصدقاء المقربين جدا من اللاعب بكري المدينة عندما كان في الهلال بان اتحادكم الفقير جدا قد تبرع للاعب الفقير جدا بكري المدينة بمبلغ 13 مليون جنيه للمساهمة في زواجه.. ما تكونوا ادينتو واتبينتو !! اذا كانت تبرعاتكم للزواج بهذا الكرم (الحاتمي) فنحن نعذركم اذا كانت هناك ديون في الاتحاد يقوم عطا المنان بحلها ! يعني ممكن يكون في عريس تاني اخذ عشرين مليون .. وواحد عيان اخد اربعين مليون .. ونثريات السفر الكثيرة اخذت من دولارات الفيفا الكثير يا شروني ! اهلنا بقولوا جبل الكحل تفنيهو المراود !! وجبل دولارات الفيفا ممكن تفنيهو التبرعات .. 13 مليون تبرع لعريس .. خليتو لي شنو !! والله لو بقيت شفااااف يا دكتور ووريتنا في العزاء بتدفعوا كم ! المشكلة انو نحن ما قادرين نحصل علي معلومات كافية رغم ان اسامة عطا المنان بتحدث عن شفافية الادارة المالية ! كل المتوفر لدينا حتي الان اكثر من مليون دولار استلمها اتحادكم من الفيفا ورغم انك حاولت ان تهرب من الاجابة المباشرة في قناة الشروق عن سؤال اموال الفيفا وتركز علي ال(250) الف دولار لكننا نعود ونقول لكل بكل ثقة ان اتحادك استلم اكثر من مليون دولار وليس اتحادك فقط فكل اتحادات العالم استلمت هذا المبلغ الا اذا كان بلاتر زعلان منكم في حاجة لا سمح الله !! معقولة يا دكتور مليون دولار وبرضو (مفلسين) عايزين كم انتو عشان تكونوا غنيانين .. الدولار في السوق الاسود بي حداشر جنيه لكن نحن عشان خاطرك نحسبوا ليك بعشرة .. مليون دولار دي عشرة مليار .. معاها قروش الرعاية .. والتلفزيون .. ودخل المباريات المحلية ومباريات الهلال والمريخ الافريقية .. والتسجيلات .. اقرارات ولاعبين اجانب وارانيك .. يعني كده لو جاملناك ممكن نتحدث عن 15 مليار .. بعد المجاملة طبعا لانو احتمال تصل عشرين مليار ! وبرضو تقول بكل جرأة اسامة (بدين) الاتحاد .. لييه ؟ انا عارف الاجابة .. بس طول بالك وما تزعل مننا .. نحن والله قاصدين الاصلاح فقط لا غير !