محمد الطيب الأمين الكاردينال لا يسجل اللاعب (المرتبط) ولا اللاعب (المخطوب) !! * عندما كانت الدنيا بخيرها كان الخبيز بالصينية والحمام بالجردل .. * وبعد هذه التحولات أصبح الخبيز بالجردل والحمام بالابريق .. * أزمة الموية فرضت علي الكثيرين الحمام بالابريق فهو اقتصادي وفيه كثير من التقشف .. * أيضا التحولات التي حدثت في الدنيا ظهرت بوضوح في حركة التسجيلات .. * زمان الهلال بسجل العايزو وبيخلي الباقي للمريخ وباقي الأندية .. * وحاليا اصبح الهلال يسجل الما عايزو ويخلي العايزو للمريخ .. * وذهاب تيري للمريخ لا نقيسه بحاجتنا لسيف تيري بقدر ما اننا نقيسه بحجم فشلنا في كسب معاركنا مع المريخ .. * في الموسمين الماضيين سجل الكاردينال ستة لاعبين يلعبون في خانة محور الارتكاز وهم (ابوعاقلة ، شيبوب ، جابسون ، ابوستة ، ودراج والطاهر سادومبا) مع وجود الشغيل ونزار ، لتبقي المحصلة ثمانية لاعبين في خانة واحدة .. * هؤلاء الثمانية ذهب من ذهب واستمر من استمر .. * السؤال الذي يفرض نفسه لماذا لم يسجل الهلال سيف تيري ؟ * الإجابة علي السؤال بعيدا عن الغرض والمرض تقول أن رئيس الهلال لا يستطيع تسجيل لاعب عقده ساري مع ناديه إلا نادرا ونادرا جدا .. * هذه هي الحقيقة .. * القصة ما قصة الشعلة أفضل من تيري أو ولاء الدين افضل من تيري .. * القصة قصة أن الكاردينال يبحث عن اللاعب مطلوق السراح لأن تكلفته المالية أقل .. * الحاجة دي واضحة وما دايرة تنظير وفلسفة .. * ما عندنا شك إنو الكاردينال عندو قروش .. * ما عندنا شك في الحاجة دي .. * لكن كمان عندنا سوابق وأرشيف بياكد انو الكاردينال ما بيسجل لاعب عندو نادي .. * والشواهد كتيرة .. * الكاردينال عندما سجل شيبوب في عملية (ذات الطوابق) لم يدفع للمريخ .. * دفع للاعب فقط .. * الكاردينال عندما سجل فارس لم يدفع لأهلي شندي .. * يعني لقي فارس فاكي .. * الكاردينال عندما سجل جابسون لم يدفع للمريخ ، لقي جابسون لافي وعقدو منتهي .. * الكاردينال عندما سجل اوكرا لم يدفع للمريخ ، لقي اوكرا لافي وعقدو منتهي .. * الآن الثلاثي الاجنبي الذي دخل كشف الهلال ليس لهم أندية .. * وقبلهم البرازيلي جوفياني برضو عقدو منتهي .. * وحتي المدافع الجزائري القشي طلبه الكاردينال ووصل الخرطوم وعندما علم رئيس الهلال أن اللاعب مرتبط مع نادي تركه .. * أليس هذا كافي لمعرفة كيف يسجل الكاردينال .. * نعم الكاردينال عندو قروش وعمل جوهرة ، طيب ده نسميهو بخل ولا بخل ؟ * البعمل جوهرة ما بغلبو يسجل سيف تيري .. * وما تقول لي الهلال ما محتاج لسيف تيري .. * الهلال ما كان محتاج لجابسون ومع ذلك سجلو ، الهلال ما كان محتاج لابوستة ومع ذلك سجلو ، الهلال ما كان محتاج للطاهر سادومبا ومع ذلك سجلو .. * يبقي الحنك بتاع إنو الهلال ما محتاج لسيف تيري ، هذا حنك ميت .. * الهلال في عهد الكاردينال اصلا ما قاعد يسجل حسب الحاجة .. * الكاردينال بسجل كيري ساكت .. * ممكن يسجل حداشر لاعب في خط الوسط بينما خط الدفاع بدون احتياطي .. * عادي الحاجة دي بتحصل مع الكاردينال .. * ثم ثانيا الهلال فاوض سيف تيري وجرى وراهو.. * طيب لما تمت مفاوضته هل ما كان الريس يعلم بأن الهلال غير محتاج له ؟ * وحتي تكتمل الصورة .. نجي للاعبين العقوداتهم سارية مع انديتهم وتركهم الكاردينال للمريخ .. * السماني الصاوي .. قول واحد .. * التش .. قول اتنين .. * احمد آدم .. قول تلاتة .. * حمزة داؤود .. قول اربعة .. * سيف تيري .. قول خمسة .. * هذا باضافة الغربال والعقرب اللذان فاوضهما المريخ وفشل الكاردينال في اقناعهما .. * الكاردينال في موضوع العقرب والغربال فشل وكضب .. * فشل في التجديد لهما وكضب عندما قال أن اصابة الغربال مزمنة وكضب عندما قال بكري المدينة تاني ما بدقها .. * يبقي الصورة واضحة جدا .. * والحقيقة وفق هذه الوقائع تؤكد أن (باني الجوهرة) لا يسجل لاعبا مقيد في نادي آخر خوفا من الدفع المزدوج .. * كده خليك من سيف تيري هل الهلال ما محتاج لحمزة داؤود ؟ * يعني عاجبكم حسين الجريف البيرجف 90 دقيقة في المباراة .. * والله ده كلو كوم وبشة الصغير ونزار حامد والثعلب كوم تاني .. * لاحظ .. لما بكري المدينة عقدو انتهي مع الهلال والمريخ تدخل قام الكاردينال انسحب .. * والآن لما الطاهر سادومبا عقدو انتهي ولم يتدخل المريخ نجح الكاردينال في اعادة قيد سادومبا وياريتو لو كان فشل .. * يبقي يامولانا الكاردينال ح يجدد لنزار والثعلب وبشة الصغير في حالة واحدة بس .. *في حالة المريخ ما يدخل .. * والله صحي .. * ونركب صافنات ونجيبة (هلالبية) واصلو الزول بيموت والذكرى تفضل حية .. * و..و.. * قصة وآخرها لسه ..
تطبيق كورة سودانية لتصفح أسرع وأسهل لزوارنا حمل من السودان متجر موبايل1 http://www.1mobile.com/net.koorasudan.app-2451076.html 2,456حملو التطبيق لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app 17756 حملو التطبيق على متجر apkpure https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app على متجر facequizz http://www.facequizz.com/android/apk/1995361/ على متجر mobogenie https://www.mobogenie.com/download-net.koorasudan.app-3573651.html على متجر apk-dl http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9 على متجر apkname https://apkname.com/ar/net.koorasudan.app
