محمد الطيب الأمين المريخ بطاريتو (4٪) وداير يتكلم السعودية !! * من ذكريات (المراهقة) ، عندنا صاحبنا (أشتر) شديد. * وعامل فيها عارف أي حاجة وهو في الحقيقة ما عارف سجم رمادو. * معانا (بت) في الحلة عجاباهو لكن ما قادر يفتح معاها الموضوع. * قلنا ليهو رسل أختك الصغيرة تمشي ليها تقول ليها إنك داير كتاب جغرافيا (تذاكر فيهو) ، وبعدين أكتب ليك خطاب ودخلو في نص الكتاب واديهو لاختك ترجعو ليها تاني يوم. * وبالفعل ده الحصل بالظبط. * لكن بقت المشكلة في الخطاب ذاتو. * كتب ليها خطاب لا تعرفو (نعي) ولا تعرفو (وصية) ولا تعرف (تهنئة) ولا تعرفو (تهديد). * البت بعد (قرت) الخطاب قالت : (اللهم إن كان هذا سحر فأبطله). * وبما أن ذلك كذلك فإن المريخ الشهير ب(الإصيفر) كان قبل فترة قد تقدم بشكوى ضد الهلال في محكمة (كاس). * الشكوى كانت من (18) ورقة. * دفتر عديل. * المحكمة بعد نظرت في الشكوى أرسلت خطاب للإتحاد العام وقالت ليهو : (المريخ مالو وبقصد شنو)؟ * والله صحي. * قالوا ليهم المريخ بشكي من شنو؟ * بشكي من صداع نصفي شكلو. * والكلام ده قالوا شداد في برنامج عالم الرياضة في التلفزيون قومي. * قوم على حيلك. * شداد قال المحكمة قالت لينا (المريخ بقصد شنو)؟ * أكيد قصدو شريف. * تقصد شنو ما عرفتها ما عرفتها. * تجربة خطيرة جد واجتزتها. * امبارح اللجنة المنظمة التابعة للإتحاد العام رفضت شكوى المريخ ضد حي الوادي نيالا. * رفضتها (شكلاً). * المريخ في الشكوى كتب : (السلام عليكم ، حي الوادي أشرك لاعب موقوف وهذا غير قانوني ولذلك ادونا التلاتة نقاط). * على بالقسم لو طلبتو (شاحن نوكيا) بالطريقة دي ما يدوكم ليهو. * الزول لو طلب (شاحن) بطلبو بطريقة أفضل من دي وبمبررات واضحة. * بتقول للزول : عليك الله اديني شاحنك ده ربع ساعة لانو تلفوني عامل (4٪) وعندي مكالمة مهمة من السعودية. * عشان تشيل شاحن بتقدم دفوعات. * وديل دايرين يشيلوا نقاط على طريقة (الخطاب بتاع صاحبنا الختاهو في كتاب الجغرافيا). * اللهم إن كان هذا سحر فأبطله. * المريخ قبل يشتكي لازم يتعلم يشكي. * أول مرة في حياتي يلاقيني زول ما بعرف (يشكي). * ناس الهلال وبدون ضوضاء اشتكوا توتي وكسبوا الشكوى. * بدون إعلام وبدون كواريك. * الهلال أعترض قبل المباراة ثم أكمل بعد ذلك تفاصيل الشكوى وجاب عمر اللاعب ورقمو الوطني وجوازو. * شغل نجيض. * مع إنو نحن والله ما محتاجين لنقاط توتي. * نحمد الله ما محتاجين. * متصدرين الدوري ومتصدرين سباق الهدافين. * وعندنا نجيلة سمحة. * الحمدلله. * وعندنا بوغبا كمان. * مدرب المنتخب الوطني ترك أفضل لاعب سوداني وسافر الأمارات. * غايتو دي بالغتو فيها. * بوغبا ده يفترض لو في منتخب بتاع شطرنج برضو يسافر معاهم خليك من إنو منتخب كرة قدم. * حاجة تكسف. * المهم .. بنقاط توتي وبدونها (القمة ودية). * سنلعب القمة بخط وسط يقوده الثلاثي اباذر وميسرة وعصمت. * وح نطالب بفحص المنشطات اقصد ح نطالب بفحص (المُكملات الغذائية). * وغايتو السنة دي بالذات يا متنا من الضحك ويا كمان الضحك كتلنا. * و.. و.. * وجينا بعد الفرقة نسأل وقلنا نلقى …….. (كتاب الجغرافيا عندك).
