محمد الطيب الأمين نيالا هلالابية أكتر من أم درمان يا مريخاب !! * طبعاً ناس المريخ عشان هم ذاتهم مشردين وما عارفين يلعبوا وين قاموا استلموا موضوع الوادي نيالا. * استلموا الموضوع من الألف للياء. * وشغالين شتيمة في الهلال. * الهلال مالو؟ * يقول ليك الهلال رفض يستضيف الوادي في ملعبه. * هو أنا استضفتك انت معقولة أبخل للوادي؟ * أنت ذاتك جيتني جاري تبكي وتشكي من سوداكال ومن النجيلة. * شلت فيك حسنة وخليتك تلعب وتتجاوز التمهيدي من استادي. * قوم على حيلك. * العلاقة بين الهلال والوادي نيالا أكبر من (خزعبلات) أهل المريخ. * العلاقة بين الهلال ودارفور وليس الوادي وحده. * يكن الهلال إحترام كبير لدارفور وأهل دارفور. * ويكفي القول إن الهلال دخل معسكر (كلمة) بنيالا ومعسكر أبو شوك بالفاشر في زمن كان فيه المريخ يرقد على أحضان (الكوز) جمال الوالي الشهير ب(عزو). * الهلال لما مشي معسكرات النازحين بدارفور كان المريخ (يتقلب) في نعيم المؤتمر الوطني الذي أشعل حرب دارفور. * وجايين هسه يتكلموا عن الهلال والوطنية ! * دارفور تبادل الهلال ذات الحب والتقدير. * ما حدث في موضوع مباراة الوادي نيالا بحسب ما علمت هو أن الوادي لم يتقدم بطلب يطلب فيه اللعب بإستاد الهلال. * هذا لم يحدث. * وعندما (حدث) كان الآوان قد فات. * أفراد طلبوا من الهلال استضافة مباراة الوادي وقد وافق الهلال ثم لم تمضي ساعات فصدر قرار الكاف. * لو تقدم الوادي بطلب رسمي قبل وقت كاف لوافق الهلال. * ولكن الوادي لم يفعل ذلك واختار ملعب إستاد الخرطوم ثم ملعب شيكان. * لا يعقل أن ينظر الهلال للوداي نيالا من منطلق أن رئيسه الفخري أسامة عطا المنان. * الوادي في هذا المقام يمثل بلد ولا يمثل عطا المنان. * يمثل وطن بحاله. * ومثلما وضع الهلال استاده تحت تصرف المنتخب الوطني كان يمكن أن يضعه تحت تصرف الوادي. * ربما يكون راعي الوادي (متحسس) من الهلال. * الهلال قائد ورائد الحركة الوطنية في البلد دي. * وهو معين ومساعد لكل الأندية التي تلعب بإسم الوطن بما فيهم المريخ نفسه. * لو في عداوة يفترض تكون مع المريخ وليس الوادي. * ورغم هذا وضعنا استادنا تحت تصرف المريخ. * خليناهم يلعبوا في استادنا برغم انهم يقولون (زريبة العيش) ويقولون أن نجيلة الهلال تسببت في إصابة التش. * اتحملنا كل هذا السخف وخليناهم يلعبوا لحدي ما طاروا من البطولة. * استحملنا وقلنا الوطن فوق الجميع. * تعاملنا مع المريخ وهم بهذا الفهم فهل نبخل لإبن الغالية دارفور الوادي؟ * لا يستطيع أحد أن يضرب عمق ومتانة العلاقة بين الهلال والحبيبة دارفور. * لا مجال لهذه الخزعبلات. * إستاد الهلال هو إستاد الوادي نيالا. * يشرفوا في اي وقت. * نحن نتعامل معهم باعتبارهم منتخب وطني. * إن شاء الله الوادي يتأهل للمرحلة القادمة ويجي ويلعب في إستاد الهلال. * أي فريق لاعب باسم السودان حبابو ما عدا المريخ. * عشان ما أكون منافق ساي .. والله اصلو ما بحب المريخ يلعب في استادنا. * بضايق من الحكاية دي جدا. * عموماً .. أمنياتنا للوادي نيالا بتجاوز عقبة الليبي والتأهل للمرحلة القادمة وتشريف أهل دارفور بصفة خاصة وتشريف كل أهل السودان. * ونركب صافنات ونجيبة (دارفورية) واصلو الزول بيموت والذكرى تفضل حية. * و…و.. * نيالا هلالابية أكتر من أم درمان.
