محمد الطيب الأمين الضي الما جاهز أفضل من المجازفة بالغربال!! * لا أنفي أن حزني على إصابة الغربال في لقاء الإثيوبي قد فاقت حزني على التعادل بعد التقدم بهدفين. * وذلك لأن محمد هو حالياً (نمبر ون) ليس على مستوى السودان والهلال بل على المستوى العربي والافريقي. * هو لاعب كبير بكل ما تحمل الكلمة من معنى. * وقبل أن أتحدث في جانب إصابة الغربال لابد من (وقفة صغيرة لتصحيح فهم مغلوط). * كلما تحدثنا عن الغربال تجد المريخاب يقولون : (كتر خير المريخ الذي صنع محمد). * والكلام ده غلط. * كل العملوا المريخ لمحمد هو (علاج). * غير العلاج ما عملوا ليهو شيء. * يعني محمد عبد الرحمن جاكم وما كان بعرف يمرر الكرة ولا شنو؟ * ولا جاكم وما عندو كنترول؟ * ولا ما كان بعرف يراوغ وانتو علمتوا المراوغة؟ * طيب ونحن في الهلال لما أطلقنا لقب (جكسا) على محمد عبد الرحمن ، اللقب ده اطلقناهو عليهو عشان بشبه جكسا في لون الشعر ولا في العيون؟ * جكسا موهبة فطرية لم يقدم لها المريخ شيء بخلاف (العلاج في الدوحة). * وعشان ما نظلمكم بنشكر رابطة المريخ بالدوحة على صبرها وعلاجها للغربال. * غير كده ما في حاجة والله. * حتى تألق محمد مع المريخ كان سببه (زعل) محمد من الهلال. * والله صحي. * لعب عشان يثبت للكاردينال حاجات معينة. * زي فكرة هيثم مصطفى لما مشى المريخ عشان يرد على الأمين البرير. * محمد اجتهد مع المريخ عشان يثبت لمجلس الكاردينال إنو اصابتو ما مزمنة وانو هو ما زجاجي. * يعني يا مولانا حتى تألق محمد معاك أنا في الهلال كنت سبب فيهو. * وعشان ما تجي تقول لي مالك ما عالجتو بقول ليك دي غلطة الكاردينال. * وفي النهاية الحمدلله رابطتكم بتاعت قطر عالجتو وده المهم في الموضوع. * نرجع لموضوعنا. * نتفق إنو محمد حالياً الفرق بينه وجميع اللاعبين السودانيين ، الفرق كبير جداً. * فرق شاسع لدرجة إنك بتحس إنو محمد ما سوداني. * والحقيقة إنه أفضل من عشرات المحترفين الدخلوا البلد دي. * يمكن أن تضع محمد عبد الرحمن في الصف الأول مع ناس (سادومبا وزولو وانقيدي وكلتشي). * وقد يكون أفضل من بعضهم. * محمد عبد الرحمن (دهب خالص) وعملة نادرة. * شال المنتخب في كتفه وبلغ به النهائيات العربية والأفريقية وهو الآن ينفرد بصدارة هدافي الدوري الممتاز برقم كبير وربما ينجح في كسر رقم كلتشي (38) هدف. * محمد خواجي بملامح سودانية. * وجوده في التشكيلة يمنح كثير من الثقة والثبات والهيبة. * سجل هدف ولا ما سجل يبقى مرعب لكل المدافعين وحراس المرمى. * ولذلك إصابته حتى وإن كانت مجرد (كدمة) فإنها مقلقة دون شك. * مدرب المنتخب فيلود قال في تصريح شهير قبل أقل من شهر : (أدعو الله كل صباح بأن لا يتعرض محمد عبد الرحمن للإصابة). * البلد كلها واقفة على الغربال. * وهذا يعني أن غياب محمد عن تشكيلة أي مدرب يخلط الأوراق ويشكل صدمة كبيرة. * إصابة محمد في اللقاء السابق هي إصابة غير مقلقة حسب التشخيص وقد عاد اللاعب لتدريبات التأهيل. * لا أعلم إن كان الغربال قد شارك مع المجموعة بالأمس أم لا ولكن ننصح بعدم المجازفة. * الجهاز الفني هو الأقرب للاعبين ولكن هذا لا يمنع أن نقدم النصح. * إذا لم يتماثل الغربال للشفاء بالدرجة الكاملة يجب أن لا يشارك غداً. * الغياب عن مباراة واحدة أفضل من الغياب عن مباراتين وثلاثة. * ليس هنالك ما يجبر البروف ريكاردو على إشراك الغربال إن لم يكن في تمام عافيته. * مؤكد أن غيابه لن يكون هيناً خاصة في ظل عدم إكتمال فورمة ياسر مزمل وتذبذب مستوى الشعلة وعدم جاهزية محمد موسى الضي. * ولكن الأفضل نتوكل بياسر ووليد ونصبر على شفاء محمد. * أما إذا كان الغربال جاهز ولا يعاني من أي مشاكل فهذا يسعدنا مؤكد. * نثق بأن الجهاز الفني أحرص منا على الغربال وهو يعلم تفاصيل طبية أكثر منا. * عموماً إذا غاب محمد من باب عدم المجازفة يبقي خير وبركة وإذا شارك وهو في كامل العافية يبقى خيرين وبركة. * نسأل الله أن يحفظ الغربال وكل أخوانه وأن يحميهم من الإصابات والعوارض. * ونتمنى أن يحقق الهلال الفوز غدا إن كان الغربال مشاركاً أو غير مشارك. * ونركب صافنات ونجيبة (قطرية) واصلو الزول بيموت والذكرى تفضل حية. * و.. و.. * ومنايا ليك ما وقف واتمنيت أنا…….. (صحة وعافية يارب).
