محمد الطيب الأمين شايل منديل بشكير ويشرب في العصير !! * في المواعيد والمقابلات الغرامية بتحصل حالات (غش) مقصودة وأحياناً ظروف خارجة عن الإرادة. * تلقى (الحبيب) قاعد في الكافتريا (تلاتة ساعات وربع) منتظر (الحبيبة). * بتذكر زمان عندنا صاحبنا كان بحب كتير. * كل ما يشوف ليهو (طرحة لافة) بحبها. * قلبو زي دفاع المريخ. * فاتح على طول. * بمناسبة دفاع المريخ. * يوم مباراة القمة، الشوط التاني كلو كان في زول قاعد في كنبة احتياطي المريخ بيصرخ : (مزمل لا). * في ناس جمب جامعة الأحفاد سمعوا الصراخ : (مزمل لا). * لا شنو؟ * مزمل لا .. معناها شنو؟ * أنا الموضوع استفزاني سألت لاعب من لعيبة الهلال قلت ليهو أنت الكان بيصرخ وبيقول مزمل لا ده منو؟ * قال لي المريخ كلو كان بصرخ وبقول مزمل لا. * أول ما ياسر مزمل يمسك الكورة هم بيصرخوا. * وحالتو قالوا عندو رباط صليبي. * مزمل أبو القاسم قال ليهم ياسر مزمل قاطع رباط. * والجماعة ناموا على كده. * قالوا قاطع رباط معناها تاني ما بلعب. * طيب التش ده كان قاطع إشارة المرور !!؟؟ * قوم على حيلك. * المهم. * صاحبنا البحب كتيرة داك ما كان موفق في (المواعيد). * بيواعد البت في الكافتريا الساعة (4) عصراً. * هو بيصل الكافتريا حوالي الساعة (تلاتة ونص) . * (تلاتة إلا خمسة) بمشي بقعد في التربيزة التي ستحتضن اللقاء. * الساعة (أربعة وعشرة) دقايق بطلب (2) برتقال. * بيقول على بال البرتقال يجهز البت ح تجي. * والزمن داك طبعاً التلفونات ما كانت منتشرة بالطريقة دي. * بجي لابس ليهو قميص لونو زي لون أنبوبة غاز (أمان). * وشايل منديل بشكير أخضر. * وشاكي القميص لحدي (فم المعدة). * بقعد تلاتة ساعات البت ما بتجي بيقوم بشرب (الكبايتين بتاعت البرتقال) وبمشي. * كلو مرة كده. * لدرجة إنو انا جاني إحساس إنو الزول ده بجي عشان العصير. * الكان بحصل مع ولدنا ده امبارح حصل مع عمنا غارزيتو. * غارزيتو ساق ولدو أنطونيو ومشى ملعب كوبر منتظر المريخ عشان التمرين. * غارزيتو وصل الملعب الساعة (تلاتة وأربعين دقيقة). * الساعة (تلاتة وسبعة وخمسين دقيقة) قام رص العلامات. * والتمرين المفروض الساعة أربعة. * وحياتك لحدي كلامي معاك ده المريخ ما وصل الملعب . * ما مشوا. * غارزيتو شرب العصير ولقط العلامات ورجع. * طبعاً تدريب الأمس تحت إشراف مجلس سوداكال. * المدرب جا التمرين واللاعبين ما جوا. * وحاجة زي دي ما ممكن تحصل إلا في المريخ. * المريخ ملك الغرائب والعجائب. * أول نادي في تاريخ العالم النجيلة بتاعت استادو بتقوم عكس. * النجيلة في كل الدنيا (بتنبت) خارج الأرض، ونجيلة استاد المريخ بتنبت داخل الأرض. * يعني بدل تقوم لبره بتقوم لجوة. * أول نادي يكون عندو رئيسين. * والرئيسين .. واحد فيهم ممنوع يطلع من السودان والتاني ممنوع يدخل السودان. * أول نادي يخسر بسبب البرد. * أول نادي يتعاقد مع بتاع (كاشير مصري) باعتبارو لاعب كرة. * أول نادي يدافع عن لاعب خرج عن الخلق الرياضي. * داير تعرف بكري المدينة ده اشتر شوف العملوا يوم مباراة القمة. * بكري ضرب صلاح عادل وهو في الحقيقة قاصد يضرب بوغبا. * اتلخبط عليهو (الطُول والعُلا). * ودي طبعاً من علامات الكُبر. * كونو تكون قاصد بوغبا وتضرب صلاح ده شغل كُبر. * بكري لم يكتف بذلك فقد تسبب في طرد فارس عبد الله. * وطرد روحو ذاتا. * لاقتك شتارة أكتر من كده؟ * غايتو الله يكفينا شر (المصدي) اللمعتو الأيام. * و.. و.. * وفي إنتظار عينك كملت ……. (التسالي كلو).