محمد الطيب الأمين رحيل ريكاردو .. مجلس الهلال متهم أول وثاني !! * عندما تصل مرحلة تُسهل فيها للطرف الثاني التخلص منك فذلك يمثل (طرد بالبارد). * ولعل الشاعر الكبير الطاهر إبراهيم قد لخص هذا عبر حنجرة الفنان الذري إبراهيم عوض في أغنية (عزيز دنياي) عندما قال : (أمهد ليك تتخلص مني) . * التمهيد عند الطاهر إبراهيم الغرض منه هو (التخلص من الطاهر إبراهيم نفسه). * بِمهد للطرف التاني عشان يتخلص منو. * والتمهيد هنا يمكن أن يكون في شكل (عدم إهتمام أو نقد من أجل النقد أو تصرف أنت تعلم أنه يُغضب الطرف التاني). * أمهد ليك تتخلص مني. * الطاهر إبراهيم رغم ذلك لقى خطواته تجمعه بمن مهد له للتخلص منه : (وألقى خطاي تجمعني معاك). * ليس بعيداً عن فلسفة الطاهر إبراهيم فقد فعل مجلس السوباط ذات الشيء مع المدرب البرتغالي ريكاردو. * مجلس الهلال (مهد) لريكاردو حتى يتخلص هو من الهلال. * يعني ما (إقالة) لكن هي (إقالة). * الزول الداير يطردك ما على شرط يقول ليك (قوم أمشي). * ممكن يعمل حاجات كتيرة تحسسك إنو هو ما دايرك تقعد. * ما كل الناس أغبياء. * مجلس الهلال للأسف طرد ريكاردو بطريقة غير مباشرة. * أولاً عشان ما نرجع لعهد الكاردينال والكضب (الكبار الكبار) لازم تعرف إنو مغادرة ريكاردو ما عندها علاقة بالانقلاب الحدث في السودان والمظاهرات والموت. * ما عندها أي علاقة. * والدليل أن طاقم ريكاردو المساعد هو الذي يقود الهلال الآن. * يعني ريكاردو بخاف وديل ما خايفين ولا كيف؟ * موضوع الظروف الأمنية ده كذب واضح. * ريكاردو عندما غادر مع الهلال إلى القاهرة لإقامة معسكر قبل مباراة النيجيري كان عارف نفسو ما ح يرجع. * شال كلو حاجاتو. * حتى شاحن الموبايل (الما شغال) شالو معاهو. * يعني عارف نفسو ما جاي. * والزمن داك لا في انقلاب ولا في (إعتصام الموز). * في الفترة الأخيرة تعرض ريكاردو لمضايقات كبيرة جعلته يتململ فعلياً. * كانت هنالك مجموعة تدخل مباريات الهلال وتجلس خلف ريكاردو وتهتف ضده. * ودي حاجة شفناها بعيونا ما في جابها لينا. * ووقتها حذرنا وقلنا أن هذا الأسلوب لا ينفع مع مدرب كبير يجب أن يتم احترامه. * مدرب جاييك هدية وأنت ما دافع قروشو ولا دافع قروش سكنو. * مدرب هدية تقعد تنظر ليهو وتشبكنا ما بلعب نزار حامد وكان يلعب مؤيد وليه بعتمد على عيد مقدم؟ * مدرب جا يعمل ليك مشروع داير تحاسبو باللقطة والقطعة؟ * ليه نخت الفشل في ريكاردو ؟ مش يمكن فاشلين اللاعبين؟ * يقول ليك بصمتو ما ظهرت؟ * ياتو بصمة ظهرت في فريق سوداني قبل كده؟ * الهلال لو جاب مورينهو بصماتو ما ح تظهر طالما إنت بتسجل ليهو اللاعبين وبتجيب ليهو محترفين زي السنغالي بتاع الكبد الوبائي داك. * ما في مدرب بينجح في الهلال إذا كانت هذه هي العقلية. * والله ولا تغشوا رقبتكم. * لجنة التطبيع التي أحسنت في عدد من الملفات عليها أن تكون شجاعة وتتحمل الملفات التي فشلت فيها. * زي ما رجعتو شعار الهلال وصفقنا ليكم في إنجاز كبير يجب أن تعترفوا بالفشل في عديد الملفات. * هسه ملف علاقتكم بالرئيس الفخري تركي آل الشيخ فاشل جدا. * الهلال استفاد شنو من تركي آل الشيخ؟ * وليه الهلال ما استفاد؟ * وهل الأجانب الذين تم تسجيلهم قبل أيام تكفل بقروشهم الرئيس الفخري ولا المجلس؟ * المجلس صاح؟ * طيب مش سعادة المستشار كان أعلن تكفله بالاجانب؟ * الحصل شنو؟ * حقو الناس تكون واضحة. * النعمة التي يتمتع بها تركي آل الشيخ لم يظهر لها أثر في الهلال. * والعيب هنا ليس عيب سعادة المستشار بقدر ما هو عيب مجلس الهلال الذي فشل في الإستفادة من هذا الرجل المحب للهلال . * المهم .. ريكاردو فاشل ولا ما فاشل لم يجد راحته في الهلال. * كان مبسوط في الأيام الأولى ولبس الجلابية والمركوب في أبو حمد وركب الخيل والحمير في غرب كردفان ولكن في نهاية الأمر بطنو طمت. * وبغض النظر عن بصمتو ظهرت ولا ما ظهرت يبقي ليس هنالك فرق كبير بين المجلس الحالي ومجلس الكاردينال فيما يتعلق بملف التدريب في الهلال. * بعد نهاية المجموعات سيغادر الطاقم الموجود الآن وستتم الاستعانة بصلاح آدم وستتم إقالته أيضا. * طالما العقلية هي عقلية (مؤيد عابدين ما لعب ونزار حامد يفترض يكون اساسي وعيد مقدم كان يتشطب). * أنا لا دافع عن ريكاردو بقدر ما أدين تصرفات الهلال مع الأجهزة الفنية. * خلال سبع سنوات تعاقد الهلال مع 34 مدرب وكلهم ذهبوا فهل هم فاشلين أم نحن أصحاب الفشل؟ * و… و.. * والله المستعان.