======= بركات فكي برهان السر الباتع !!؟ ______________ كتب : هاشم الطيب ______________ & يُحكي أن واحد بلدياتنا عنده حبس بول الله يكرمكم لا علاج بلدي نفع ولا دكاترة المسالك البوليه عرفوا ليه حلل وأخيراً قرر أولاده تسفيره للأردن ومعاه الحاجه ربما وجدوا ليه حلل وحجزوا مقعدين في الطيارة المغادره من الخرطوم إلى المملكة الأردنية الهاشميه …! & الطياره عملت تيك أوف (أقلعت) الحاجه أطلقت زغرودة فرح الركاب ازعجوا شديد في شنو يا حاجه ردت بفرح الراجل ما بالت ..!! & المناسبه شنو؟ ذكرتني هذه حكاية فريقنا القومي لما شارك يا صديقي محمد عبد الماجد مع المدرب الفرنسي كان عنده حبس (أهداف) في ثلاثه مباريات شباكه كان عندها إسهال عشره مرات ولا حتى نقطة بول واحده بس تفك الحبس.!! & بعد ما ركب الفريق الطياره السايقنها محسن وبرهان ونزلت في الكاميرون محمد عبد الرحمن فك منه الحبس بقونين بعد حبس طال لشهور وفرح وجرى حضن ليك الفكي الباتع برهان ومحسن فرحان ! & الحال هذه المناظر ساكت الفلم قدام وما دام فكينا النحس والكُج تاني لا خوف من فراعنه ولا يحزنون بس يا القاعدين تكتبوا ساعدوا الشباب بالصمت والكتابه التي تكسر المقاديف والرقبه وتعمل نفسيات رسلوا ليهم الكلام المفرح وسمح ونادوهم يرموا قدام وهنا الوضع آمن …. النهاية قبل البدايه. : ============= الجمعة2021/12/31ملتقى النهايات ...نهاية أسبوع ..ونهاية شهر ونهاية عام ونسأل الله تكون نهاية معانات وطنا الذي توالت عليه الجراحات يا رب نسألك نهاية هذا العسر ونهاية لكل الأحزان وبداية لعام جديد 2022 بداية كله يسر بعد عسر يا أكرم الأكرمين …