*بنسميها قمة *ومرات بنطلق عليها ديربي *وننفعل *ونلعن أبو خاش التحكيم *ونلوم التنجيم *وكلو زول فينا يقول للتاني الله مرقك *والحال ياهو نفس الحال *وفي جواي صدى الذكري *ذكرى أننا بنحلم بالأميرة السمراء *ومكتفين بأننا نحظى بيها في الأحلام وبس *ما شاهدته بالأمس عبارة عن ملخص لموسمنا الأفريقي القادم *موسم قادم فاشل وحا نطير من بدري كان نحن كان الهلال *والقصة دي ما محتاجه ليها لي قارئة فنجان ولا وداعية ولا بتاع رمل ولا منجم *لأننا ننجم لاعبينا وإداريينا وأجهزتنا الفنية برانا *ثم يقف حمار أحلامنا في عقبة فرق مغمورة من دول مغمورة *والدراويش يلاقوا المداح *الموسم الأفريقي القادم على الأبواب *ونحن لي أسي جهازنا الفني شغال بمحرك واحد *وعدد المصابين عندنا يضاهي مصابي أوكرانيا *والفوضى العارمة تضرب باللوائح (إن وجدت)، عرض الحائط *لاعب يابانا *يمسكل لينا ويرجع طوالي *لاعب يخلينا في سفرنا ويرجع *نحنسو يرجع لينا *ويشارك كمان *ونحلم بالأميرة السمراء *وهي تعشق الانضباط والنادي الكارب قاشو وحميضو نجيييض *لذا نجدها ما شغاله بينا *أيها الناس *نحن أمة ينقصها الوعي في شتى الضروب *أمة انطباعية قرارتها عاطفية وطموحها محدود *لذا كل طموحاتنا محلية وأحلامنا محلية وإنجازاتنا محلية *ومحلياتنا ما شايفه شغلها *نحتاج لوعي سياسي ووعي إجتماعي ووعي ثقافي ووعي فني ووعي رياضي *وإلى ذلك الحين تدعوكم محلية الحميض النجض لحضور مهرجان المطر البمطر حصو *أيها الناس *في حادث أليم أصيب الشاب المريخي الغيور محمد عثمان الشايقي وأجريت له جراحة بالرأس بعلياء *الشايقي يحتاج لدعائكم فلا تبخلوا عليه *وأصيب معه بنفس الحادث الصديق الهلالي وأحد رواد نادي المريخ (شوف سماحة الرياضة دي كيف) حيدر الجموعي وحالته مستقرة بحمد الله *لا تنسوا الدعاء لأجلهما *أيها الناس *إن تنصروا الله ينصركم *أها *نجي لي شمارات والي الخرتوم *كان شفت يا والينا المكلف علينا *بدل يملوا بطوننا قالوا دايرين يوعونا سلك كهربا ننساك كيف والكلب قال كرعين بشيلن بطن ولا بطن بتشيل كرعين ؟؟؟؟ وإلى لقاء.
