بابكر سلك ضقلها يتلولح *بعدما كاس جابت ضقلها اتلولح *انصرف الناس عن فريق الكرة *ودخلوا في مغالطات ومناكفات *أي زول قرأ القرار من الزاوية البتريحو *وأي زول فسر القرار التفسير البريحو ولو كان مكابرا *ذكروني نكتة *زماااان في دارفور *قالوا كان في قرية *القرية دي فيها مسجد *وفيها بيتين أو خشم بابين *أولاد حامد *وبحسب لهجة المنطقة بقولوا ليهم عيال هامد *وأولاد عبد الرحيم *وبقولوا عليهم عيال اندالرهيم *الإمام بتاع المسجد كان من عيال هامد *يوم الجمعة صعد المنبر للخطبة *اكتشف إنو تسعين في المية من الحضور من أولاد عبدالرحيم *اتغاظ شديد *وكان موضوع الخطبة تفسير سورة التين *فسرها على طريقة تفسير أهل المريخ لقرارات كاس *حا أحاول أكتب التفسير حسب لهجة الإمام *الليلة في سورة التين *ربنا ذكر التين والزيتون *تين تعرفا وزيتون ياها تاكلا ده *وطور سنين ده تراها جبل مرة القاعد ده *وهذا البلد الأمين *والبلد الأمين ترا دارفور ده *ربنا ذكر إنا *وورد الجمع للتعظيم *وذكر بعد ذلك خلقة الإنسان *قال خلق الإنسان في أحسن تقويم *وده تره إيال هامد ديل *ثم ردده أسفل سافلين *وده تره أيا أندالرهيم ديل *الزول ده فسر سورة عظيمة بحسب استراتيجيتو *كبر بالتفسير كومو *المهم *انشغل الناس *وكترت البيانات *واختلف الناس *ما اتفقوا إلا على عدم شرعية حازم ومجلسو *سوداكال قال في القرار اعتراف به وإلغاء لعيال أندالرهيم *وحازم قال القرار صاح استبعد عيال أندالرهيم لكن كمان ما اعترف بعيال هامد *يعني قرار قضى بأن يكون مسجد القرية بلا إمام *لا من عيال هامد *ولا من عيال أندالرهيم *ولسه عيال أندالرهيم بصرفوا على المسجد *إن كان القرار مكن عيال هامد *استلموا ولا راجين الأوقاف تسلمهم؟؟؟؟؟ *الأوقاف ذاتها ضقلها يكركب *المهم *أثبت بشه أنه مكسب *وأثبت ودنوباوي أنه كبير *بدون معسكر سنة بره البلد *بدون أجهزة فنية أجنبية *بدون ضوضاء *بدون أجانب *أدخل المريخ والهلال في فتيل *فاز الهلال على ودنوباوي بهدف من أوف يخجل *وفاز المريخ بهدف صدفة واستروبيا *وكسب ودنوباوي احترام الجميع *لأنه أثبت أن أجانب المريخ وأجانب الهلال ما محترفين *ديل مجرد مغتربين *وده دليل على تواضع العقلية التي تدير الناديين الكبيرين *وتفيد بالكرتجية والأرزقية والسماسرة الذين يكون لهم القدح المعلى في جلب الأجانب *والله ديل مره يجيبوا لينا واحد سعران *ياخ قبل كده جبنا محترف عندو (بواسير) *المشي غالبو *اتعالج وشال الفيها النصيب ورجع أهلو *أيها الناس *إن تنصروا الله ينصركم *أها *نجي لي شمارات والي الخرتوم *كان شفت يا والينا *السفينة دقشت السفينة وكشحت السخينة سلك كهربا ننساك كيف والكلب قال السفينتين الاتداقشن يشيلن شيلتن… البارجة جاااااااتن وإلى لقاء.