بابكر سلك اجتماع الديم *عقد اجتماع بالديم الحبيب ضمانا والاشقاء الحبش *وبعد ان قتل المجتمعون الموضوع نقاشا *اقترح احد الاشقاء الحبش الاقتراح التالي *قال نحنا بنموت ليكم بسولارا في بحر دار *وانتوا موتوا لينا هنا بي….بي….بي راحتكم *وبكدة نكون وفرنا علي جمهورنا وجمهوركم عناء السفر وتكاليفه الباهظة *لاقت الفكرة استحسانا من الحضور واتفقوا علي تنفيذها بحذافيرها *وتظل الاشكالية فقط في النقل التلفزيوني للمباراة *المباراة الهنا *البعض يقول ان المباراة ستكون ام غمتي *والبعض يقول ان العروض التلفزيونية ضعيفة *وبعض ثالث يسأل ضعيفة بالضا؟؟؟ *بدورنا طمأنا الاشقاء الحبش *وقلنا ليهم انتوا حاتلعبوا علي ارض لايظلم فيها بشر *واسألوا الحيمودي ومحل الحقنة *كما وان الاخوة في الصومال اشتهروا بالنزاهة وكرههم الشديد للمال بالذات الدولار *وعلمنا تحت تحت ان مساعد الحكم الاول عضو مؤسس في حركة الشباب المسلم الصومالية *والمساعد التاني داعشي اورنيك جمارك يادوبك رجع من كورس في افغانستان *اما حكم الوسط *فهو من المتشددين الذين يرون ان الرشوة فساد وان مس الدولار مس للحرام وكل ذلك عقوبته الاعدام بحد السيف *ضف الي ذلك ان استاد (الشيخة) يضم اللقاء *اذن لا ظلم سيحدث ولا يحزنون *وان عدم النقل التلفزيوني ماهو الا لتواضع العروض المقدمة من القنوات *المهم *بعد الاجتماع انتهي *والناس راجعين بيوتهم *اتنين من الشفوت بتونسوا *الاول:زولك ده ماوافق ينقل كورتنا للابيض؟؟؟ *التاني:ينقلها الابيض ليه؟ *الاول:عشان ندخلها *التاني:يعني ينقلها ليك هو الابيض عشان انت تحضرها وهو مايحضرها؟؟؟؟؟ *المهم *مباريات اعلان التأهل للمرحلة القادمة شارفت *بروح الثورة نتمني ان نري السودان بانديته الاربعة في المرحلة الجديدة *بروح الثورة *واللهم طولك ياروح *المهم *اذا وفق الله الهلال في التأهل *علي الاتحاد العام ان يشوف طريقة فترة انتقالات جديدة وسريعة *لانو مشروع العليقي اتضح من المباراة الاولي انو لحق مشروع الجزيرة *تشليع شديد *شلعوها العليقاب *وفطومة اختي تنتظر بفارغ الصبر *ساصبر حتي يعجز الصبر عن صبري *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *المطرة بتجي من فوق بي ضبانها وطينا *ده عشان عاليها بقي واطيها وواطيها واطينا سلك كهربا ننساك كيف والكلب قال نحنا ذاتنا واطينا في طينا وبواعيضها وطنينا والي لقاء سلك
