محمد عبد الماجد ضربوا (ام فتفت) بين الشوطين زمان في حلتنا .. كان عندنا فريق .. وقت يلعب مباراة ومدربه يشعر ان مستوى الفريق غير مقنع والأداء باهت كان بجيب للاعبين بين الشوطين (ام فتفت)… اللاعبون يضربوا ليك (ام فتفت) دي وينزلوا في الشوط التاني بضربوا أي فريق. ببقوا زي (الحصين). الموضوع بتاع (ام فتفت) دا ما عندو علاقة بالموضوع الفي رأسكم دا .. يمكن تكون صادفت ساكت .. ويمكن يكون في شبه. ما تمشوا بعيد. انا ما قاصد حاجة ..ولا بفتش عن العلاقة. في حاجات ما عندها علاقة مع بعض .. لكن بتلقاها مرتبطة ببعضها البعض. زي حميدتي لمن يبقى رئيس اللجنة الاقتصادية. نرجع لموضوع (ام فتفت). عاوز احددها الليلة مع (ام فتفت). من تشعر باللاعبين في حالة خمول وفتور جيب ليهم (ام فتفت).. نحن في السودان عندنا خصوصيتنا.. عندنا حاجات بنعرفها برانا .. لا توجد إلّا في السودان. والحاجات دي من (عبقرية) السودانيين لمن يكون عندك (خصوصية) في أي شيء .. في الثقافة وفي اللبس وفي الاكل وفي اللغة في العالم المفتوح دا .. وتقدر تفرض حاجاتك وتحافظ عليها على الاقل بتكون (زول) ما ساهل. بتكون عبقري عديل. تنقا كان زمان بعكس الكرة بالسلم الموسيقي بالنوتة .. يعني لو كنت مهاجم وما عندك خلفية (موسيقية) ح تشترها وما بتعرف تتعامل مع عكسية تنقا. هيثم مصطفى عندو (تمريرات) بتجيب القون قبل ما يحصل… القون بظهر من التمريرة. التمريرة قون. مهند الطاهر دا مرة جاب ليه قون في الاسماعيلي .. فتشت ليه في (اليوتوب) عند ميسي وعند بلاتيني ورونالدو وبيليه وماردونا .. ما لقيتو. قالوا الهدف ما اتسجل (تلفزيونيا)… قلت القى شبه منو … لغاية الآن ما لقيت. اسامة ريحان سكسك .. الكورة عندو زي (العجينة) بعمل فيها أي شيء .. لا بتعرفها في شماله ولا بتعرفها في يمينه. نحن عندنا كورة طاعمة وحلوة وممتعة .. واي زول بقول ليك غير ذلك يبقى ما ناقش حاجة. نحن في أي حاجة بنختلف حتى في مصطلح (زول) الذي يعرف به السوداني وينادي به في الخارج وفي المطارات والسفارات الاجنبية. يا زول. خلاص الكلام انتهى. عندنا الكسرة والقراصة والويكة وام فتفت ..واي منطقة في السودان عندها (خصوصية) براها في هذا الجانب. في اللبس عندنا الجلابية والعمة والتوب ..عندنا تفاصيل حقتنا برانا. عندنا وردي وعثمان حسين. عندنا تنقا وحامد بريمة. عندنا الهلال والمريخ .. (خصوصية) و (اثارة) و (متعة) بالنسبة لينا لا توجد حتى في الدوري الانجليزي. عندنا (الدافوري) اختراع يخصنا وحدنا في كورة القدم. عندنا قون المغربية بي مية. اعلى سعر للاقوان في العالم. نحن عندنا فهم برانا. ولا بنتلحق. عندنا في رصيد الثورات ثلاث ثورات – اول الاراضي في المنطقة عرفت (الانتفاضات) الشعبية. نحن عندنا حضارات قبل الميلاد – وعندنا تاريخ مشرف – حتى في الحروب ولمعارك. عندنا (الحبوبة) اول فضائية ثقافية اجتماعية للأطفال … وللناس الكبار. يتخيل لي ان صوت عبدالعزيز داؤود دا لو (الروس) لقوه ممكن يصنعوا منو (الصاروخ).. وممكن يكتشفوا فيه (مركبات فضائية). وعالم البحار. نحن عندنا حاجات غريبة. شاي المغرب في أي بلد ممكن يكون باللبن إلّا في السودان بالألفة والمحبة والونسة والصينية. الدكتور محمد حسين كسلا .. قالوا لو لعب في الدوري الاسباني .. وشافوا مهاراته وامكانياته بالتقنيات الحديثة والفضائيات الحالية .. كان لا ميسي ولا رنالدوا فازوا بالكرة الذهبية. كسلا بقى دكتور بي كورتو. ما بتلحق. كمال عبدالوهاب قالوا كورتو كانت زي (الخياطة).. المدافع البدخل عليه بطلع منو بلقى قميصو مقلوب من المحاورة .. وبلقى الفردة الشمال لابسها في اليمين .. والفردة اليمين لابسها في الشمال. بتحصل ليه لخبطة. وعينه الشمال ذاتها بتكون مشيت يمين .. والعين اليمين بتكون نزلت في النخرة. نحن اصلو ما ساهلين. السودان دا فيه حاجات غريبة. ابقوا عليه عشرة.. وطن بهذا التنوع وهذه الثقافات .. امريكا بتفتش عنه منذ سنوات. وطن بالنيل والهلال والمريخ والازهري ومحمد وردي وعثمان حسين ما تفرطوا فيه. ما بتلقى وطن بهذا الجمال. النعام آدم كان ما بشوف .. لكن الناس البتشوف ما شافت زول امهر منو في (الطنبور). النعام آدم وقت يغني ليك (الزول الوسيم).. لو ما كنت لابس ليك ساعة بتلقى نفسك لابسها. الله يحفظ البلاد والعباد .. ويبقى على هذا الوطن بهذا التنوع .. وبهذه الروعة. بالهلال والمريخ. ناس المريخ يشدوا حيلهم شوية. الموضوع دا كدا ما بمشي. ألحقوا روحكم. حالتكم دي ممكن تسوقكم بعيد. حلوا مشاكلكم .. قبل ما يفوت الاوان. اعملوا ليكم رئيس واحد. النجيلة هينة. اتفقوا. واقعدوا في الواطة. الكورة دي غريبة .. ونتائجها مرات ما عندها علاقة بالمنطق. لا المنطق ولا الطيب الشعراوي. الطيب الشعراوي ذنبو شنو؟ عاوز افك (ام فتفت) وامسك ليكم في (المنطق). لو مسكت ليكم (المنطق) للصباح ما بتمرقوا من هنا. انا بتكلم ليكم عن حاجة ما عندها علاقة بالمنطق .. لذلك ما تسألوني عن أي منطق. بتكلم بدون منطق. بمنطق الكورة. عشان كدا ما تقولوا لي ليه؟ واشمعنا. وما ممكن. المريخ فيه (9) محترفين. ممكن نقول ( محترفين بعد انهاء التعاقد مع مروان السعيدي. والمريخ بقوده جهاز فني من تونس. عنده مدير كورة تونسي. بالمناسبة امس المنتخب الاولمبي التونسي فشل امام منتخب الكنغو من التأهل للدور القادم في التصفيات المؤهلة الى المغرب. المريخ عندو (3) رؤساء. الرئيس (مشترك) حازم مصطفى كان شغال (تسريبات صوتية) وزرف دموع .. هسع بقى شغال (بنكك) و(لافتات)… حازم الحاسم .. انا اول مرة اشوف لي زول حاسم بزرف في الدموع. اكيد هسع بزرف في دموع الحسرة والندم. والله نحن لو ما كلمة (يزرف) دي ما كان اشتغلنا بالموضوع .. الدموع في حد ذاتها ما عندنا معاها قضية لكن (يزرف) دي كتيرة على حازم. يزرف وهو في التمهيدي. طيب لو اتأهل من المجموعات كان عمل شنو؟ المريخ عندو (نجيلة) تركية سوف تصل في غضون الايام القادمة من تركيا. وقلاب رملة. ولجان الاتحاد العام كلها مسيطر عليها المريخاب. المريخ بعد (9) محترفين و (3) رؤساء اتغلب من الرابطة كوستي 0 / 1. كورة ما عندها (منطق). الرابطة ما فيها محترف واحد. لكن الكسمبر كان بخمسة محترفين. ايمن باشري كان بعشرة محترفين. عشان كدا ما في زول تاني يسألني من المنطق او يجيب لي ولو بالغلط سيرة (المنطق). انا قنعت من (المنطق). خلاص عاوز امرق من الحتة دي. …………….. متاريس يا ناس قناة النيلين انتوا المباريات دي لو بتنقلوها (دم) ما كان بتعملوا فينا كدا. تقول ناقلنها من زحل. لكن في نقطة يجب ان نشيد بها في قناة النيلين وهي اعادة المباريات الاخيرة بصورة مستمرة. شبعنا في مباراة الرابطة والمريخ وقون ايمن باشري. ناس قناة الملاعب .. الاعادة عندهم كانت اصعب من النقل المباشر للمباراة. الارسنال الايامات دي مالو؟ عندهم (مشروع) برضو. برشلونة شكلهم جابوا ليهم (قلاب رملة). الله يستر عليهم. الحمدلله. بشرى سارة. خبر مفرح. قالوا نهائي الكأس سوف يتبرمج في الفترة ما بين 14 الى 18 نوفمبر. الحمدلله. عاوزين نفرح باللقب. والأهلي الخرطوم برضو من حقو يبحث عن ذلك. عطبرة فيها طفرة كروية كبيرة. الامل غلب ود نوباوي في الخرطوم والفلاح غلب الزومة في عطبرة .. والجمعة القادمة ديربي عطبرة الذي سوف يجمع بين الامل والفلاح. بين الحديد والنار. نتمنى ان تكون قناة النيلين هنالك وتنقل هذه المباراة. قروب دورينا العطبراوي بفضل محمد جاد الله واخرين عامل شغل وحراك اجتماعي ورياضي ممتاز في عطبرة. ما شاءالله عليهم كلهم. عطبرة كدا. ناس المريخ قالوا بفتشوا ليهم عن مدرب. اقصد بفتشوا ليهم عن (رئيس). ناس الاهلي شندي كلموهم من الآن يشدوا حيلهم. قولوا ليهم بدأت تنقط في كوستي. ما تضيعوا الفرصة. ………. ترس اخير : على موعد مع نهائي كأس السودان .. في الانتظار.
